ബ്രാൻഡ് മൂല്യത്തിൽ രാജാവ് കോഹ്‌ലി തന്നെ; ഷാരൂഖ് ഖാൻ വരെ പിന്നിൽ

ഇന്ത്യൻ സെലിബ്രിറ്റികളുടെ ബ്രാൻഡ് മൂല്യത്തിൽ ഇത്തവണയും രാജാവായി വിരാട് കോഹ്‌ലി. രാജ്യാന്തര ധനകാര്യ സ്ഥാപനമായ ക്രോളിന്റെ 2024 ലെ റിപ്പോർട്ടുകൾ പ്രകാരം 25 പേരടങ്ങിയ പട്ടികയിൽ 231.1 മില്യൻ ഡോളർ ബ്രാൻഡ് മൂല്യവുമായി കോഹ്‌ലി ഒന്നാം സ്ഥാനത്ത് തുടരുന്നു. 2023ലെ 227.9 മില്യനെ അപേക്ഷിച്ച് കോലിയുടെ മൂല്യം 2024ൽ കൂടിയിട്ടുണ്ട്. പട്ടികയിൽ ഇത്തവണയും മുന്നിൽ സിനിമാ, സ്പോർട്സ് താരങ്ങളാണ്.

ബോളിവുഡ് താരം രൺവീർ സിങ്ങാണ് പട്ടികയിൽ രണ്ടാം സ്ഥാനത്തുള്ളത്. 170.7 മില്യനാണ് രൺവീറിന്റെ ബ്രാൻഡ് മൂല്യം. മുൻവർഷത്തെ 203.1 മില്യനിൽ നിന്ന് രൺവീറിന്റെ ബ്രാൻഡ് മൂല്യം കുറഞ്ഞിട്ടുണ്ട്. ബോളിവുഡിന്റെ കിങ് ഖാൻ ഷാരൂഖ് 145.7 മില്യനുമായി മൂന്നാം സ്ഥാനത്തുണ്ട്. ഷാരൂഖിന്റെ ബ്രാൻഡ് മൂല്യം 21% ആയി ഉയർന്നിട്ടുണ്ട്. 4-ാം സ്ഥാനത്ത് 116.4 മില്യൻ ബ്രാൻഡ് മൂല്യവുമായി ആലിയ ഭട്ടാണ്.

ക്രിക്കറ്റിൽനിന്നും വിരമിച്ചെങ്കിലും സച്ചിൻ ടെൻഡുൽക്കറുകളുടെ ബ്രാൻഡ് മൂല്യം ഇടിഞ്ഞിട്ടില്ലെന്നാണ് പുതിയ പട്ടിക കാണിക്കുന്നത്. 2023ലെ 91.3 മില്യനിൽ നിന്ന് കഴിഞ്ഞവർഷം 112.2 മില്യനിലേക്ക് സച്ചിൻ മൂല്യം ഉയർത്തിയിട്ടുണ്ട്. പട്ടികയിൽ അഞ്ചാം സ്ഥാനത്താണ് സച്ചിൻ. കഴിഞ്ഞ വര്‍ഷം നാലാം സ്ഥാനത്തായിരുന്ന അക്ഷയ് കുമാര്‍ പുതിയ ലിസ്റ്റില്‍ ആറാംസ്ഥാനത്തേക്ക് പോയി. 7-ാം സ്ഥാനത്ത് 102.9 മില്യൻ മൂല്യവുമായി ദീപിക പദുക്കോൺ ആണ്.

ഇന്ത്യൻ ക്രിക്കറ്റ് ടീം മുൻ ക്യാപ്റ്റൻ എം.എസ്. ധോണി 102.9 മില്യൻ ഡോളർ മൂല്യവുമായി 7-ാം സ്ഥാനത്തുണ്ട്. 92.2 മില്യൻ മൂല്യവുമായി ഹൃത്വിക് റോഷൻ 9-ാം സ്ഥാനത്തും 83.7 മില്യൻ മൂല്യവുമായി ബിഗ് ബി അമിതാഭ് ബച്ചൻ 10-ാം സ്ഥാനത്തുമാണ്. കരീന കപൂർ 11-ാം സ്ഥാനത്തും രൺബീർ കപൂർ 12-ാം സ്ഥാനത്തുമാണ്.

സ്പോർട്സ് താരങ്ങളിൽ 48.4 മില്യനുമായി രോഹിത് ശർമ്മ 17-ാം സ്ഥാനത്തും 43.1 മില്യനുമായി ഹാർദിക് പാണ്ഡ്യ 20-ാം സ്ഥാനത്തും 38.1 മില്യനുമായി ജസ്പ്രീത് ബുമ്ര 22-ാം സ്ഥാനത്തുമുണ്ട്.

ഇത്തവണ ചില താരങ്ങൾ തങ്ങളുടെ ബ്രാൻഡ് മൂല്യം ഉയർത്തിയിട്ടുമുണ്ട്. 2023ൽ 27-ാമതായിരുന്ന ബോളിവുഡ് നടി കൃതി സാനോൺ ഇത്തവണ 19-ാം സ്ഥാനത്തേക്ക് എത്തിയിട്ടുണ്ട്. തമന്ന 28 ൽനിന്നും 21 ലേക്കും അനന്യ പാണ്ഡ്യ 46 ൽനിന്നും 25 ലേക്കും സ്ഥാനം ഉയർത്തിയിട്ടുണ്ട്. കൃതി സാനോണിന്റെ ബ്രാൻഡ് മൂല്യം 44.8 മില്യനും, തമന്നയുടേത് 40.4 മില്യനുമാണ്. അനന്യയുടെ ബ്രാൻഡ് മൂല്യം 35.2 മില്യനാണ്. അതേസമയം, രശ്മിക മന്ദാന 58.9 മില്യൻ മൂല്യവുമായി 15-ാം റാങ്കിൽ ഇടംപിടിച്ചു. അല്ലു അർജുൻ 24-ാം സ്ഥാനത്താണ്.