ഇന്ത്യന്‍ ക്രിക്കറ്റ് താരം ഹാര്‍ദിക് പാണ്ഡ്യയും ബോളിവുഡ് നടി മഹിയേക ശര്‍മയും ഡേറ്റിങ്ങില്‍ ആണെന്ന് റിപ്പോര്‍ട്ട്. ഏഷ്യ കപ്പിനായുള്ള ഇന്ത്യന്‍ ടീമിന്റെ ഭാഗമായ ഹാര്‍ദിക് ഇപ്പോള്‍ ദുബായിലുണ്ട്. മഹിയേക ശര്‍മയും കഴിഞ്ഞ ദിവസം ദുബായിലെത്തിയിരുന്നു. ഇതോടെയാണ് ഇരുവരും ഡേറ്റിങ്ങില്‍ ആണെന്ന വാര്‍ത്തകള്‍ പ്രചരിച്ചു തുടങ്ങിയത്.
ഏഷ്യ കപ്പിലെ ഇന്ത്യ-പാക്കിസ്ഥാന്‍ മത്സരം കാണാനാണ് മഹിയേക ദുബായിലെത്തിയത്. താരം ഇപ്പോഴും ദുബായില്‍ തുടരുന്നതായാണ് റിപ്പോര്‍ട്ടുകള്‍. വിവേക് ഒബ്‌റോയി നായകനായ പിഎം നരേന്ദ്ര മോദി എന്ന സിനിമയില്‍ മഹിയേക അഭിനയിച്ചിട്ടുണ്ട്.
ഒരിക്കല്‍ മഹിയേക റെഡ്ഡിറ്റില്‍ (Reddit) ഒരു ചിത്രം പങ്കുവെച്ചിരുന്നു. ഈ ചിത്രത്തിന്റെ പശ്ചാത്തലത്തില്‍ ഒരു പുരുഷനെയും കാണാം. മുഖം വ്യക്തമല്ലായിരുന്നെങ്കിലും ഇത് ഹാര്‍ദിക് പാണ്ഡ്യയാണെന്ന് ആരാധകര്‍ക്കു സംശയം തോന്നി. അന്ന് മുതലാണ് ഹാര്‍ദിക്കും മഹിയേകയും ഡേറ്റിങ്ങില്‍ ആണെന്ന ഗോസിപ്പ് പ്രചരിക്കാന്‍ തുടങ്ങിയത്. എന്നാല്‍ ഇരുവരും ഇതേവരെ ഇക്കാര്യത്തില്‍ ഔദ്യോഗിക പ്രതികരണം നടത്തിയിട്ടില്ല.
മോഡലിങ്ങിലൂടെയാണ് മഹിയേക അഭിനയരംഗത്തേക്ക് എത്തിയത്. ഇന്ത്യന്‍ ഫാഷന്‍ അവാര്‍ഡ്‌സ് 2024 ല്‍ മോഡല്‍ ഓഫ് ദി ഇയര്‍ ആയി മഹിയേക തിരഞ്ഞെടുക്കപ്പെട്ടു. ന്യൂഡല്‍ഹിയിലെ നേവി ചില്‍ഡ്രന്‍ സ്‌കൂളിലാണ് സ്‌കൂള്‍ പഠനം പൂര്‍ത്തിയാക്കിയത്. അമേരിക്കയില്‍ നിന്ന് കമ്യൂണിറ്റി സൈക്കോളജിയില്‍ ബിരുദം നേടി. ഇക്കണോമിക്‌സ് ആന്റ് ഫിനാന്‍സിലും ബിരുദം കരസ്ഥമാക്കിയിട്ടുണ്ട്. മകളെ ഡോക്ടറോ എഞ്ചിനിയറോ ആക്കണമെന്നായിരുന്നു മാതാപിതാക്കളുടെ ആഗ്രഹം. എന്നാല്‍ ചെറുപ്പം മുതലേ മഹിയേകയ്ക്കു മോഡലിങ്ങിലാണ് താല്‍പര്യം. യോഗ ടീച്ചര്‍ ട്രെയ്‌നിങ്ങും താരം പൂര്‍ത്തിയാക്കിയിട്ടുണ്ട്.
മഹിയേക ഒരു ചിത്രത്തില്‍ ഹാര്‍ദിക് പാണ്ഡ്യയുടെ ജഴ്‌സി നമ്പറായ 33 ധരിച്ച് പ്രത്യക്ഷപ്പെട്ടതോടെയാണ് ഇരുവരും പ്രണയത്തിലാണെന്ന ഗോസിപ്പുകള്‍ ശക്തമായത്. അതേസമയം ഹാര്‍ദിക് പാണ്ഡ്യ വിവാഹമോചിതനാണ്. 2020 ല്‍ സെര്‍ബിയന്‍ മോഡലായ നടാഷ സ്റ്റാന്‍കോവിച്ചിനെ ഹാര്‍ദിക് വിവാഹം കഴിച്ചു. കഴിഞ്ഞ വര്‍ഷമാണ് ഇരുവരും പിരിഞ്ഞത്. പാണ്ഡ്യയുടെ മകന്‍ അഗസ്ത്യ നടാഷയ്‌ക്കൊപ്പമാണ് താമസിക്കുന്നത്. വിവാഹമോചന ശേഷം ഗായിക ജാസ്മിന്‍ വാലിയയുമായി ഹാര്‍ദിക് ഡേറ്റിങ്ങില്‍ ആണെന്ന റിപ്പോര്‍ട്ടുകളുണ്ടായിരുന്നു. പിന്നീട് ഇരുവരും വേര്‍പിരിഞ്ഞെന്നും വാര്‍ത്തകളുണ്ട്.
