ഏഷ്യ കപ്പിലെ യുഎഇ-പാക്കിസ്ഥാന്‍ മത്സരം നാടകീയത നിറഞ്ഞതായിരുന്നു. കളി നടക്കില്ലെന്നു പോലും ഒരു ഘട്ടത്തില്‍ ക്രിക്കറ്റ് പ്രേമികള്‍ കരുതി. ഒടുവില്‍ പാക്കിസ്ഥാന്റെ ‘പിടിവാശി’ ഏറെക്കുറെ ലക്ഷ്യംകണ്ടു. അതിനുശേഷമാണ് മത്സരം ആരംഭിച്ചത്.
ഏഷ്യ കപ്പിലെ ഇന്ത്യ-പാക്കിസ്ഥാന്‍ മത്സരമാണ് പ്രശ്‌നങ്ങള്‍ക്കു തുടക്കമിട്ടത്. മത്സരശേഷം ഇന്ത്യന്‍ താരങ്ങള്‍ പാക്കിസ്ഥാന്‍ താരങ്ങള്‍ക്കു കൈ കൊടുത്തില്ല. ഇതില്‍ ക്ഷുഭിതരായ പാക്കിസ്ഥാന്‍ ക്രിക്കറ്റ് ബോര്‍ഡ് ഐസിസിയെ സമീപിച്ചിരുന്നു. മാച്ച് റഫറിയായ ആന്‍ഡി പൈക്രോഫ്റ്റിനെ ഏഷ്യ കപ്പില്‍ നിന്ന് മാറ്റിനിര്‍ത്തണമെന്നായിരുന്നു പാക്കിസ്ഥാന്റെ ആവശ്യം. സ്‌പോര്‍ട്‌സ്മാന്‍ സ്പിരിറ്റിനു ചേരാത്ത വിധം ഇന്ത്യ പ്രവൃത്തിച്ചപ്പോള്‍ മാച്ച് റഫറിയായ പൈക്രോഫ്റ്റ് ഇടപെട്ടില്ലെന്നും ഇന്ത്യക്ക് അനുകൂലമായി നിലപാട് സ്വീകരിച്ചെന്നുമാണ് പാക്കിസ്ഥാന്‍ ആരോപിച്ചത്. ഇതേ പൈക്രോഫ്റ്റ് തന്നെയായിരുന്നു പാക്കിസ്ഥാന്‍-യുഎഇ മത്സരം നിയന്ത്രിക്കേണ്ടിയിരുന്നത്.
ഇന്ത്യന്‍ സമയം രാത്രി എട്ടിനാണ് ഏഷ്യ കപ്പ് മത്സരങ്ങള്‍ ആരംഭിക്കേണ്ടത്. ടോസ് 7.30 നും. മത്സരത്തിനായി പാക്കിസ്ഥാന്‍ ടീം ദുബായ് രാജ്യാന്തര സ്റ്റേഡിയത്തിലേക്ക് എത്തിയത് ഏഴ് മണി കഴിഞ്ഞാണ്. അതുവരെ ഹോട്ടലില്‍ തുടരുകയായിരുന്നു താരങ്ങള്‍. മത്സരം റദ്ദാക്കണമെന്ന ആവശ്യം പോലും ഇതിനിടെ പാക്കിസ്ഥാന്‍ ക്രിക്കറ്റ് ബോര്‍ഡ് ഉയര്‍ത്തി. ഏഷ്യന്‍ ക്രിക്കറ്റ് കൗണ്‍സില്‍ തലവനും പാക്കിസ്ഥാന്‍ മന്ത്രിയുമായ മൊഹ്സിന്‍ നഖ്വി ഇടപെട്ടാണ് ഒടുവില്‍ പാക്കിസ്ഥാന്‍ ടീം ഹോട്ടലില്‍ നിന്ന് ഗ്രൗണ്ടിലേക്ക് എത്തിയത്.
മാച്ച് റഫറി ആന്‍ഡി പൈക്രോഫ്റ്റിനെ മാറ്റി നിര്‍ത്തണമെന്ന് ആവശ്യപ്പെട്ടിരുന്ന പാക് ക്രിക്കറ്റ് ബോര്‍ഡ് നിലപാടില്‍ അല്‍പ്പം മയം വരുത്തി. പൈക്രോഫ്റ്റുമായി ചര്‍ച്ച വേണമെന്ന് ആവശ്യപ്പെട്ടു. പാക്കിസ്ഥാന്‍ ക്രിക്കറ്റ് ടീമിന്റെ മാനേജര്‍ നവീദ് ചീമയും പാക് നായകന്‍ സല്‍മാന്‍ അഗയും പൈക്രോഫ്റ്റുമായി ഏതാനും മിനിറ്റുകള്‍ സംസാരിച്ചു. ഈ ചര്‍ച്ചയ്ക്കു ശേഷമാണ് മത്സരം ആരംഭിച്ചത്.
ഹസ്തദാന വിവാദത്തില്‍ ഇന്ത്യക്കെതിരായ മത്സരം നിയന്ത്രിച്ച പൈക്രോഫ്റ്റ് ക്ഷമാപണം നടത്തിയെന്ന് പാക് ക്രിക്കറ്റ് ബോര്‍ഡ് പിന്നീട് പ്രസ്താവനയിറക്കി. സെപ്റ്റംബര്‍ 14 ലെ സംഭവം ആശയവിനിമയത്തിലെ പിഴവുമൂലം ഉണ്ടായതാണെന്ന് പൈക്രോഫ്റ്റ് പറയുകയും മാപ്പ് പറയുകയും ചെയ്തെന്നാണ് പാക്കിസ്ഥാന്‍ അവകാശപ്പെടുന്നത്. മാത്രമല്ല ഇന്ത്യ – പാക്കിസ്ഥാന്‍ മത്സരത്തിലെ പെരുമാറ്റച്ചട്ട ലംഘനത്തെക്കുറിച്ച് അന്വേഷണം നടത്താന്‍ ഐസിസി സന്നദ്ധത അറിയിച്ചിട്ടുണ്ടെന്നും പാക് ക്രിക്കറ്റ് ബോര്‍ഡിന്റെ പ്രസ്താവനയില്‍ പറയുന്നു.
മത്സരത്തില്‍ പാക്കിസ്ഥാന്‍ 41 റണ്‍സിനു ജയിച്ച് ഏഷ്യ കപ്പ് സൂപ്പര്‍ ഫോറിലേക്ക് പ്രവേശിച്ചു. ആദ്യം ബാറ്റ് ചെയ്ത പാക്കിസ്ഥാന്‍ ടീം നിശ്ചിത 20 ഓവറില്‍ ഒന്‍പത് വിക്കറ്റ് നഷ്ടത്തില്‍ 146 റണ്‍സാണ് നേടിയത്. മറുപടി ബാറ്റിങ്ങില്‍ യുഎഇ 105 നു ഓള്‍ഔട്ട് ആയി. അതേസമയം ഏഷ്യ കപ്പിലെ വിവാദങ്ങള്‍ ഉടനൊന്നും അവസാനിക്കാന്‍ സാധ്യതയില്ല. കാരണം സൂപ്പര്‍ ഫോര്‍ ഘട്ടത്തില്‍ ഇന്ത്യയും പാക്കിസ്ഥാനും വീണ്ടും ഏറ്റുമുട്ടണം. ഈ കളിയില്‍ പാക് ക്രിക്കറ്റ് ടീമിനോടു ഇന്ത്യയുടെ നിലപാട് എന്തായിരിക്കുമെന്ന് കാത്തിരുന്ന് കാണേണ്ടിവരും.
