ദോഹ: ലയണല് മെസി മാര്ച്ചിലും കേരളത്തിലേക്കില്ല. മാര്ച്ച് വിന്ഡോയില് ഖത്തറിലാകും അര്ജന്റീനയുടെ മത്സരങ്ങള് എന്നാണ് പുതിയ പ്രഖ്യാപനം. മാര്ച്ചില് ഉറപ്പായും കേരളത്തില് എത്തുമെന്ന് അര്ജന്റീന പ്രതിനിധികള് ഈമെയില് അയച്ചെന്നാണ് നവംബര് മൂന്നിന് മലപ്പുറത്ത് കായികവകുപ്പ് സംഘടിപ്പിച്ച സെമിനാറില് കായികമന്ത്രി വി അബ്ദുറഹിമാന് പറഞ്ഞത്. ഖത്തറിലെ മത്സരത്തോടെ കേരളത്തിലെ കാര്യം തീരുമാനമായെന്നാണ് സൂചന.
ഖത്തര് ഫുട്ബോള് ഫെസ്റ്റിവലിന്റെ ഭാഗമായാകും അര്ജന്റീനയുടെ മത്സരങ്ങള്. മാര്ച്ച് 26നും 31നും ഇടയില് ദോഹ വേദിയായ ഖത്തര് ഫുട്ബോള് ഫെസ്റ്റിവലിലാണ് അര്ജന്റീന ടീമിന്റെ പങ്കാളിത്തം സംഘാടകര് പ്രഖ്യാപിച്ചത്.
2022ല് അര്ജന്റീന വിശ്വകിരീടം ഉയര്ത്തിയ ലുസൈല് സ്റ്റേഡിയത്തില് തന്നെയാകും മത്സരങ്ങള്. ലോകകപ്പ് യോഗ്യത ഉറപ്പാക്കിയ സൌദി അറേബ്യ, ഈജിപ്ത്, ടീമുകള്ക്കൊപ്പം സെര്ബിയയും ഖത്തര് ഫുട്ബോള് ഫെസ്റ്റിവലിന്റെ ഭാഗമാകുമെന്നും അടുത്ത മാസം ടിക്കറ്റ് വില്പ്പന തുടങ്ങുമെന്നും സംഘാടക സമിതി വ്യക്തമാക്കി.
ആരാധകര് കാത്തിരിക്കുന്ന ഫൈനലിസിമ പോരാട്ടത്തില് മാര്ച്ച് 27ന് അര്ജന്റീന യൂറോപ്യന് ചാംപ്യന്മാരായ സ്പെയിനിനെ നേരിടും. 31-ാം തീയതി ആതിഥേയരായ ഖത്തറുമായി ആണ് രണ്ടാം മത്സരം.
