ഹരാരെ: അണ്ടര് 19 ഏകദിന ക്രിക്കറ്റ് ലോകകപ്പിലെ ഫൈനലിലെ താരമായി വൈഭവ് സൂര്യവന്ഷി. ഈ നേട്ടം ടീമിന്റെ കഠിനാധ്വാനത്തിന് ലഭിച്ച അംഗീകാരമാണെന്ന് താരം പറഞ്ഞു. വൈഭവിന്റെ വാക്കുകള്… ”ഈ പുരസ്കാരങ്ങള് ടീമിന്റെ സപ്പോര്ട്ടിംഗ് സ്റ്റാഫിന് സമര്പ്പിക്കുന്നു. കഴിഞ്ഞ 6-8 മാസമായി ടീമിലെ എല്ലാവരും കഠിനാധ്വാനത്തിലായിരുന്നു. പരിശീലകര് ഞങ്ങളുടെ ഓരോ നീക്കങ്ങളും കൃത്യമായി നിരീക്ഷിക്കുകയും ആവശ്യമായ നിര്ദ്ദേശങ്ങള് നല്കുകയും ചെയ്തിരുന്നു. മത്സരങ്ങളില് അനാവശ്യമായ സമ്മര്ദ്ദം ഞങ്ങള് ചെലുത്തിയിരുന്നില്ല. കാര്യങ്ങള് ലളിതമായി കാണാനാണ് ശ്രമിച്ചത്. ടൂര്ണമെന്റിലുടനീളം ഞങ്ങള് പിന്തുടര്ന്ന അതേ ശൈലി തന്നെ ഫൈനലിലും തുടര്ന്നു.” വൈഭവ് പറഞ്ഞു
ഫൈനലില് 80 പന്തില് 175 റണ്സ് നേടിയ വൈഭവ് ടൂര്ണമെന്റിലൊന്നാകെ ഏഴ് മത്സരങ്ങളില് നിന്ന് 439 റണ്സാണ് അടിച്ചെടുത്തത്. ടൂര്ണമെന്റില് ഏറ്റവും കൂടുതല് റണ്സ് നേടിയ പട്ടികയില് രണ്ടാം സ്ഥാനത്തുണ്ട് വൈഭവ്. ഏഴ് മത്സരങ്ങളില് 444 റണ്സ് നേടിയ ബെന് മയേസാണ് ഒന്നാം സ്ഥാനത്ത്. ഫൈനലില് ഇംഗ്ലണ്ടിനെതിരെ 100 റണ്സിനായിരുന്നു ഇന്ത്യയുടെ ജയം.
