സൂപ്പര്‍ ഫോറിലെ നിര്‍ണായക മത്സരത്തില്‍ ശ്രീലങ്കയെ തോല്‍പ്പിച്ച് പാക്കിസ്ഥാന്‍ ഫൈനല്‍ പ്രതീക്ഷകള്‍ നിലനിര്‍ത്തിയിരിക്കുകയാണ്. ശ്രീലങ്കയോടു തോറ്റിരുന്നെങ്കില്‍ പാക്കിസ്ഥാന്‍ ഫൈനലില്‍ എത്തില്ലെന്ന് ഏറെക്കുറെ ഉറപ്പിക്കാമായിരുന്നു. നിലവിലെ സ്ഥിതിയില്‍ പാക്കിസ്ഥാന്‍ ഫൈനലിലെത്തിയാല്‍ ഇന്ത്യയെ ആയിരിക്കും നേരിടേണ്ടിവരിക !
സൂപ്പര്‍ ഫോറിലെ ആദ്യ മത്സരത്തില്‍ ഇന്ത്യയോടു തോറ്റ പാക്കിസ്ഥാന്‍ പോയിന്റ് ടേബിളില്‍ അവസാനത്തേക്ക് വീണതായിരുന്നു. ശ്രീലങ്കയ്‌ക്കെതിരായ വിജയത്തോടെ ഇന്ത്യക്കു താഴെ രണ്ടാം സ്ഥാനത്തേക്ക് പാക്കിസ്ഥാനു പ്രൊമോഷന്‍ ലഭിച്ചു. നിലവില്‍ സൂപ്പര്‍ ഫോറിലെ ഒരു കളിയില്‍ ജയിച്ച് രണ്ട് പോയിന്റോടെ ഇന്ത്യ ഒന്നാമതും രണ്ട് കളിയില്‍ ഒരു ജയവും ഒരു തോല്‍വിയുമായി പാക്കിസ്ഥാന്‍ രണ്ടാമതുമാണ്. സൂപ്പര്‍ ഫോറിലെ ആദ്യ രണ്ട് സ്ഥാനക്കാരാണ് ഫൈനല്‍ കളിക്കുക.
ബംഗ്ലാദേശ് മൂന്നാമതും ശ്രീലങ്ക നാലാമതുമാണ്. രണ്ട് കളികളും തോറ്റ ശ്രീലങ്കയ്ക്കു ശേഷിക്കുന്ന ഇന്ത്യക്കെതിരായ മത്സരത്തില്‍ ജയിച്ചാലും ഇനി ഫൈനല്‍ പ്രതീക്ഷകള്‍ വളരെ അകലെയാണ്. ഇന്ത്യക്കാകട്ടെ ശ്രീലങ്കയോടും ബംഗ്ലാദേശിനോടുമാണ് ശേഷിക്കുന്ന മത്സരങ്ങള്‍. ഇന്ത്യക്ക് ഫൈനലില്‍ പ്രവേശിക്കാന്‍ ഇതില്‍ ഏതെങ്കിലും ഒരു കളിയില്‍ ജയിച്ചാല്‍ മാത്രം മതി.
ഇന്ത്യക്ക് എതിരാളിയായി പാക്കിസ്ഥാനോ ബംഗ്ലാദേശോ? ഈ ചോദ്യത്തിനു മാത്രമാണ് ഇനി ഉത്തരം ലഭിക്കേണ്ടത്. നാളെ നടക്കാന്‍ പോകുന്ന പാക്കിസ്ഥാന്‍ – ബംഗ്ലാദേശ് മത്സരമായിരിക്കും ഫൈനലിസ്റ്റുകളെ തീരുമാനിക്കുക. ഈ കളിയില്‍ പാക്കിസ്ഥാന്‍ ജയിക്കുകയാണെങ്കില്‍ വീണ്ടുമൊരു ഇന്ത്യ-പാക്കിസ്ഥാന്‍ പോരാട്ടമായിരിക്കും ഏഷ്യ കപ്പില്‍ കാണാന്‍ സാധിക്കുക.
പാക്കിസ്ഥാനെതിരെ ജയിക്കുകയും ഇന്ത്യയോടു തോല്‍ക്കുകയും ചെയ്താലും ബംഗ്ലാദേശിനു ഫൈനലില്‍ എത്താന്‍ സാധിക്കും. അതുകൊണ്ട് പാക്കിസ്ഥാനെ പരാജയപ്പെടുത്തുക മാത്രമായിരിക്കും ബംഗ്ലാദേശിന്റെ ലക്ഷ്യം.
അതേസമയം ഇന്ത്യക്കെതിരെ ബംഗ്ലാദേശ് അട്ടിമറി ജയം സ്വന്തമാക്കുകയും പാക്കിസ്ഥാന്‍ ബംഗ്ലാദേശിനെ പരാജയപ്പെടുത്തുകയും ചെയ്താല്‍ ഇന്ത്യ-ശ്രീലങ്ക മത്സരം നിര്‍ണായകമാകും. ശ്രീലങ്കയോടു കൂടി ഇന്ത്യ തോല്‍ക്കുകയാണെങ്കില്‍ ഫൈനല്‍ കാണാതെ പുറത്താകുകയും പാക്കിസ്ഥാനും ബംഗ്ലാദേശും ഫൈനല്‍ കളിക്കുകയും ചെയ്യും.
പാക്കിസ്ഥാന്‍ ബംഗ്ലാദേശിനെ തോല്‍പ്പിക്കുകയും ഇന്ത്യ ബംഗ്ലാദേശിനോടു തോല്‍ക്കുകയും ചെയ്ത ശേഷം ഇന്ത്യ ശ്രീലങ്കയോടും തോറ്റാല്‍ മൂന്ന് ടീമുകള്‍ക്കും നാല് പോയിന്റ് വീതമാകും. അങ്ങനെ വന്നാല്‍ ഫൈനലിസ്റ്റുകളെ തീരുമാനിക്കുക നെറ്റ് റണ്‍റേറ്റിന്റെ അടിസ്ഥാനത്തിലായിരിക്കും.
