ഏഷ്യ കപ്പിലെ പാക്കിസ്ഥാനെതിരായ സൂപ്പര്‍ ഫോര്‍ മത്സരത്തില്‍ നിറംമങ്ങി ഇന്ത്യയുടെ ഫീല്‍ഡിങ്. ടോസ് നഷ്ടപ്പെട്ടു ആദ്യം ബാറ്റ് ചെയ്ത പാക്കിസ്ഥാന്റെ അരഡസനോളം ക്യാച്ചുകളാണ് ഇന്ത്യ നഷ്ടമാക്കിയത്. മികച്ച ഫീല്‍ഡര്‍മാരായ ശുഭ്മാന്‍ ഗില്ലും അഭിഷേക് ശര്‍മയുമടക്കം ക്യാച്ചുകള്‍ നഷ്ടപ്പെടുത്തി.
ഹാര്‍ദിക് പാണ്ഡ്യ എറിഞ്ഞ ആദ്യ ഓവറിലെ മൂന്നാം പന്തില്‍ ഓപ്പണര്‍ സാഹിബ്‌സദ ഫര്‍ഹാനെ പുറത്താക്കാന്‍ ഇന്ത്യക്ക് ലഭിച്ച അവസരം തുലച്ചത് അഭിഷേക് ശര്‍മയാണ്. ഫര്‍ഹാന്റെ ബാറ്റില്‍ നിന്ന് എഡ്ജ് എടുത്തുവന്ന പന്ത് തേര്‍ഡ് മാനില്‍ ക്യാച്ചാക്കാന്‍ സുവര്‍ണാവസരം ലഭിച്ചിട്ടും അഭിഷേക് ശര്‍മ പരാജയപ്പെട്ടു.
അപകടകാരിയായി തോന്നിച്ച ഫഖര്‍ സമാനെ (ഒന്‍പത് പന്തില്‍ 15) മൂന്നാം ഓവറില്‍ ഹാര്‍ദിക് പാണ്ഡ്യ പുറത്താക്കി. വിക്കറ്റ് കീപ്പര്‍ സഞ്ജു സാംസണ്‍ ആണ് ക്യാച്ചെടുത്തത്. അതേസമയം ക്യാച്ചിന്റെ സാധുത പരിശോധിക്കാന്‍ പ്രധാന അംപയര്‍ തേര്‍ഡ് അംപയറുടെ സഹായം തേടി. പന്ത് കൈകളിലേക്ക് എത്തും മുന്‍പ് ഗ്രൗണ്ടില്‍ സ്പര്‍ശിച്ചോ എന്നാണ് അംപയര്‍ പരിശോധിച്ചത്. പല ആംഗിളുകളില്‍ നിന്ന് നോക്കിയ ശേഷം തേര്‍ഡ് അംപയര്‍ ഔട്ട് വിളിച്ചു. പന്ത് ഗ്രൗണ്ടില്‍ സ്പര്‍ശിച്ചിട്ടില്ലെന്നായിരുന്നു അംപയറുടെ അന്തിമ തീരുമാനം. എന്നാല്‍ ഫഖര്‍ സമാന്‍ അംപയറുടെ തീരുമാനത്തില്‍ അതൃപ്തനായാണ് ക്രീസ് വിട്ടത്. ഡ്രസിങ് റൂമില്‍ എത്തിയ ശേഷം ഫഖര്‍ സമാന്‍ പാക്കിസ്ഥാന്‍ പരിശീലകന്‍ മൈക്ക് ഹസനോടു പരാതി പറയുന്നുണ്ടായിരുന്നു.
അഞ്ചാം ഓവറിലെ നാലാം പന്തിലും ഇന്ത്യയുടെ ഫീല്‍ഡിങ് പിഴവ് പാക്കിസ്ഥാനു ജീവന്‍ നല്‍കി. വരുണ്‍ ചക്രവര്‍ത്തിയുടെ ഓവറില്‍ കുല്‍ദീപ് യാദവ് കൈവിട്ടത് പാക്കിസ്ഥാന്‍ വണ്‍ഡൗണ്‍ ബാറ്റര്‍ സായിം അയൂബിനെയാണ്. ഷോര്‍ട്ട് ഫൈന്‍ ലെഗില്‍ ഉയര്‍ന്നുപൊങ്ങിയ പന്ത് കുല്‍ദീപ് വിട്ടുകളയുകയായിരുന്നു. പവര്‍പ്ലേ അവസാനിക്കുമ്പോള്‍ പാക്കിസ്ഥാന്‍ ആറ് ഓവറില്‍ ഒരു വിക്കറ്റ് നഷ്ടത്തില്‍ 55 റണ്‍സ് നേടിയിരുന്നു. ടീം ടോട്ടല്‍ 180 കടക്കുമെന്ന് തോന്നിപ്പിച്ച തുടക്കമായിരുന്നു പാക്കിസ്ഥാന്റേത്.
പൂജ്യത്തില്‍ നില്‍ക്കെ പുറത്താകേണ്ടിയിരുന്ന ഷാഹിബ്‌സദ ഫര്‍ഹാനു വരുണ്‍ ചക്രവര്‍ത്തിയുടെ എട്ടാം ഓവറിലും ലോട്ടറിയടിച്ചു. വരുണ്‍ ചക്രവര്‍ത്തിയുടെ പന്തില്‍ ബൗണ്ടറി ലൈനിനു അരികെ അഭിഷേക് ശര്‍മയാണ് ഷാഹിബ്‌സദയെ കൈവിട്ടത്. അത് സിക്‌സ് ആകുകയും ചെയ്തു. കുല്‍ദീപ് എറിഞ്ഞ ഒന്‍പതാം ഓവറിലെ അഞ്ചാം പന്തില്‍ സ്റ്റംപിങ്ങില്‍ നിന്നും ഫര്‍ഹാന്‍ അത്ഭുതകരമായി രക്ഷപ്പെട്ടു. 12-ാം ഓവറിലെ രണ്ടാം പന്തില്‍ പാക്കിസ്ഥാന്‍ 100 കടന്നു.
മൂന്ന് തവണ പുറത്താകലിന്റെ വക്കില്‍ നിന്ന് രക്ഷപ്പെട്ട ഫര്‍ഹാനെ 15-ാം ഓവറിലെ ആദ്യ പന്തില്‍ ശിവം ദുബെ പുറത്താക്കി. നായകന്‍ സൂര്യകുമാര്‍ യാദവിന്റെ ക്യാച്ചിലൂടെ. 45 പന്തില്‍ 58 റണ്‍സാണ് ഫര്‍ഹാന്‍ നേടിയത്. പിന്നീട് ഇന്ത്യ കളി തിരിച്ചുപിടിച്ചു. കൃത്യമായ ഇടവേളകളില്‍ പിന്നീട് വിക്കറ്റുകള്‍ വീഴുകയും ഇന്ത്യന്‍ ബൗളര്‍മാര്‍ റണ്ണൊഴുക്ക് തടയുകയും ചെയ്തു. ജസ്പ്രിത് ബുംറ എറിഞ്ഞ 19-ാം ഓവറിലെ അഞ്ചാം പന്തില്‍ ഫഹീം അഷറഫിനെ പുറത്താക്കാനുള്ള അവസരം വൈസ് ക്യാപ്റ്റന്‍ ശുഭ്മാന്‍ ഗില്‍ തുലച്ചു. ഡീപ് മിഡ് വിക്കറ്റില്‍ അനായാസം സ്വന്തമാക്കാവുന്ന ക്യാച്ചാണ് ഗില്‍ കൈവിട്ടത്. ഒടുവില്‍ പാക്കിസ്ഥാന്‍ ഇന്നിങ്‌സ് 20 ഓവറില്‍ അഞ്ച് വിക്കറ്റ് നഷ്ടത്തില്‍ 171 എന്ന നിലയില്‍ അവസാനിച്ചു.
