ലയണല്‍ മെസിയും അര്‍ജന്റീന ടീമും കേരളത്തിലെത്തുന്നതിന്റെ ത്രില്ലിലാണ് ഫുട്‌ബോള്‍ ആരാധകര്‍. മെസിയുടെ കളി കാണാന്‍ എന്തൊക്കെ ചെയ്യണമെന്ന് ആരാധകര്‍ ഇപ്പോഴേ അന്വേഷിച്ചു തുടങ്ങി. തിരുവനന്തപുരത്തായിരിക്കും കളിയെന്നാണ് ആദ്യം പുറത്തുവന്ന വിവരം. എന്നാല്‍ മെസി പന്ത് തട്ടുക തിരുവനന്തപുരത്ത് ആയിരിക്കില്ല, മറിച്ച് കൊച്ചിയില്‍ ആയിരിക്കും !
തിരുവനന്തപുരം ഗ്രീന്‍ഫീല്‍ഡ് സ്റ്റേഡിയമാണ് മെസിയുടെ കളി നടത്താനായി ആദ്യം ആലോചിച്ചിരുന്നത്. എന്നാല്‍ ഇവിടെ അര്‍ജന്റീനയെ പോലൊരു ടീമിനു ഫുട്‌ബോള്‍ കളിക്കാന്‍ പാകത്തില്‍ ഗ്രൗണ്ട് സജ്ജമാക്കുക ദുഷ്‌കരമാണ്. ഗ്രീന്‍ഫീല്‍ഡ് പ്രധാനമായും ഒരു ക്രിക്കറ്റ് സ്റ്റേഡിയമാണ്. ക്രിക്കറ്റിനു അനുയോജ്യമായ രീതിയിലാണ് ഗ്രൗണ്ടിന്റെ ഘടന. ഫുട്‌ബോള്‍ മത്സരങ്ങള്‍ നടത്തണമെങ്കില്‍ ഒട്ടേറെ മാറ്റങ്ങള്‍ കൊണ്ടുവരണം.
ഗ്രീന്‍ഫീല്‍ഡ് സ്റ്റേഡിയം കുറഞ്ഞ സമയംകൊണ്ട് ഫുട്‌ബോളിനു അനുയോജ്യമായ രീതിയിലേക്ക് മാറ്റുക അസാധ്യമാണ്. ഇതേ തുടര്‍ന്നാണ് മത്സരവേദി മാറ്റാന്‍ തീരുമാനമായിരിക്കുന്നത്. ഐഎസ്എല്‍ മത്സരങ്ങള്‍ നടക്കുന്ന കൊച്ചിയിലെ കലൂര്‍ ജവഹര്‍ലാല്‍ നെഹ്‌റു സ്റ്റേഡിയത്തിലായിരിക്കും അര്‍ജന്റീനയുടെ കളി സംഘടിപ്പിക്കുക. ഫുട്‌ബോള്‍ മത്സരങ്ങള്‍ക്കു ഉപയോഗിച്ചു വരുന്ന ഗ്രൗണ്ട് ആയതിനാല്‍ അര്‍ജന്റീനയുടെ കളിക്കായി വളരെ കുറച്ച് ഒരുക്കങ്ങള്‍ കൂടി നടത്തിയാല്‍ മതി.
സാമ്പത്തിക ചെലവ് കൂടി പരിഗണിച്ചാണ് ഈ മാറ്റം. ഗ്രീന്‍ഫീല്‍ഡ് സ്റ്റേഡിയം ഫുട്‌ബോളിനു അനുയോജ്യമായ രീതിയിലേക്ക് മാറ്റണമെങ്കില്‍ ഭീമമായ ചെലവുണ്ട്. കൊച്ചിയില്‍ ആണെങ്കില്‍ ചെലവ് ഗണ്യമായി കുറയും.
നവംബര്‍ 15 നും 18 നും ഇടയിലായിരിക്കും അര്‍ജന്റീന ടീം കേരളത്തില്‍ എത്തുക. 16 നും 17 നും കളികള്‍ നടത്താനാണ് ആലോചന. ഓസ്‌ട്രേലിയയായിരിക്കും എതിരാളി. അര്‍ജന്റീനയ്ക്കും ഓസ്‌ട്രേലിയയ്ക്കും പുറമെ ഒരു ടീമിനെ കൂടി കൊണ്ടുവരാനും ആലോചന നടക്കുന്നുണ്ട്. അത് സാധ്യമായില്ലെങ്കില്‍ രണ്ട് കളിയും ഓസ്‌ട്രേലിയയ്‌ക്കെതിരെ ആയിരിക്കും.
