ന്യൂഡൽഹി: ഇന്ത്യൻ ഫുട്ബോൾ ആരാധകരെ സംബന്ധിച്ചിടത്തോളം ഏറെ ആശ്വാസകരമായ ഒരു വാർത്തയാണ് സുപ്രീം കോടതിയുടെ ഭാഗത്ത് നിന്നുണ്ടായിരിക്കുന്നത്. വർഷങ്ങൾ നീണ്ടുനിന്ന നിയമ പോരാട്ടങ്ങൾ അവസാനിക്കുന്നു. അനിശ്ചിതത്വങ്ങളെല്ലാം അവസാനിച്ച് എഐഎഫ്എഫിന്റെ പുതിയ കരട് ഭരണഘടനയ്ക്ക് അംഗീകാരം. നാലാഴ്ചയ്ക്കകം എക്സിക്യുട്ടീവ് യോഗം വിളിച്ച് പുതിയ ഭരണഘടന സ്വീകരിക്കാൻ ജസ്റ്റിസ് പി.എസ്. നരസിംഹയും ജോയ്മാല ബഗ്ചിയും ഉൾപ്പെട്ട ബഞ്ച് ഫെഡറേഷനോട് ആവശ്യപ്പെട്ടു. ഇതോടെ ഐഎസ്എൽ നടത്തിപ്പ് സാധ്യമാകുന്നതോടൊപ്പം ഫിഫ വിലക്ക് ഭീഷണിയും ഒഴിയുകയാണ്.
എന്താണ് ഉത്തരവ്?
നിലവിലുള്ള ഭാരവാഹികളുടെ തിരഞ്ഞെടുപ്പും കോടതി അംഗീകരിച്ചു. ഇതോടെ പ്രസിഡന്റ് കല്യാൺ ചൗബെയുടെ നേതൃത്വത്തിലുള്ള ഫെഡറേഷൻ ഭരണസമിതിക്ക് 2026-വരെയുള്ള കാലാവധി പൂർത്തിയാക്കാം. അതിനുമുൻപായി തിരഞ്ഞെടുപ്പ് നടത്തേണ്ടതില്ല.
വിപ്ലവകരമായ മാറ്റങ്ങൾ
ജസ്റ്റിസ് റാവു തയ്യാറാക്കിയിരിക്കുന്ന കരട് ഭരണഘടന വിപ്ലവകരമായ മാറ്റങ്ങളായിരിക്കും ഇന്ത്യൻ ഫുട്ബോളിൽ കൊണ്ടുവരിക. പുതിയ ദേശീയ കായിക നയത്തിന് അനുസൃതമായാണ് ഭരണഘടന തയ്യാറാക്കിയിരിക്കുന്നത്. അതനുസരിച്ച് ഭാരവാഹികൾക്ക് പരമാവധി 12 വർഷം മാത്രമായിരിക്കും പദവിയിൽ തുടരാൻ സാധിക്കുക. തുടർച്ചയായി എട്ട് വർഷം ഭരണ ചുമതലയിൽ ഉണ്ടെങ്കിൽ നാല് വർഷത്തെ ഇടവേളയ്ക്ക് ശേഷം മാത്രമായിരിക്കും വീണ്ടും ഭാരവാഹിയാകാൻ സാധിക്കുക. ഭാരവാഹിയാകാനുള്ള പ്രായപരിധി 70 ആയും നിശ്ചയിച്ചിട്ടുണ്ട്.
അംഗങ്ങളെ പുറത്താക്കാനും വകുപ്പ്
14 അംഗങ്ങളായിരിക്കും എക്സിക്യൂട്ടീവ് കമ്മിറ്റിയിൽ ഉണ്ടായിരിക്കുക. ഒരു പ്രസിഡന്റ്, രണ്ട് വൈസ് പ്രസിഡന്റുമാർ, ഒരു ട്രഷറർ എന്നിവരെ കൂടാതെ പത്ത് അംഗങ്ങളും കമ്മിറ്റിയുടെ ഭാഗമാകും. പ്രിസിഡന്റ് അടക്കമുള്ള ഭാരവാഹികളെ അവിശ്വാസ പ്രമേയത്തിലൂടെ പുറത്താക്കാനും പുതിയ ഭരണഘടന അനുസരിച്ച് സാധിക്കും.
ഫിഫ വിലക്ക് മാറും
ഒക്ടോബർ 30-നകം പുതിയ ഭരണഘടന അംഗീകരിച്ചില്ലെങ്കിൽ ഇന്ത്യക്ക് വിലക്കേർപ്പെടുത്തുമെന്ന് ഫിഫയും ഏഷ്യൻ ഫുട്ബോൾ കോൺഫെഡറേഷനും മുന്നറിയിപ്പുനൽകിയിരുന്നു. ഫിഫയുടെ വിലക്ക് ഭീഷണിയും ഇല്ലാതാകുന്നതോടെ ഇന്ത്യൻ താരങ്ങൾക്കും ക്ലബ്ബുകൾക്കും രാജ്യാന്തര വേദികളിൽ കളിക്കാൻ സാധിക്കും. ഫിഫ വിലക്ക് നിലവിൽ വന്നിരുന്നുവെങ്കിൽ അർജന്റീനയുടെ കേരള സന്ദർശനവും പ്രതിസന്ധിയിലാകുമായിരുന്നു. ആ ആശങ്കകൂടിയാണ് ഇപ്പോൾ ഒഴിഞ്ഞിരിക്കുന്നത്.
ഐഎസ്എല്ലിൽ പന്തുരുളും
ഇന്ത്യൻ സൂപ്പർ ലീഗിലെയും പ്രതിസന്ധി കോടതിവിധിയോടെ മാറുമെന്ന പ്രതീക്ഷയിലാണ് ആരാധകർ. ഐഎസ്എൽ നടത്തിപ്പുകാരായ ഫുട്ബോൾ സ്പോർട്സ് ഡെവലപ്മെന്റ് ലിമിറ്റഡും ഇന്ത്യൻ ഫുട്ബോൾ ഫെഡറേഷനും തമ്മിലുള്ള കരാർ പുതുക്കാനാകത്തതായിരുന്നു ഐഎസ്എൽ നടത്തിപ്പ് പ്രതിസന്ധിയിലാക്കിയത്. ഭരണഘടന നിലവിൽ വരുന്നതോടെ ആ പ്രശ്നത്തിനും പരിഹാരമാകും.
ഖാലിദ് ജമീലിന് കീഴിൽ കളിക്കളത്തിൽ പുതിയ തീരങ്ങൾ തേടുന്ന ഇന്ത്യൻ ഫുട്ബോളിനെ സംബന്ധിച്ചടുത്തോളം ഭരണ സംവിധാനത്തിലെയും അഴിച്ചുപണി വലിയ പ്രതീക്ഷയാണ് നൽകുന്നത്.
