തിരുവനന്തപുരം: കേരള ക്രിക്കറ്റ് ലീഗ് (കെസിഎൽ) രണ്ടാം സീസൺ അവസാനിക്കുമ്പോൾ രണ്ടാം തവണയും പർപ്പിൾ ക്യാപ്പ് സ്വന്തമാക്കിയിരിക്കുകയാണ് കാലിക്കറ്റ് ഗ്ലോബ്സ്റ്റാർസിന്റെ ബൗളറായ അഖിൽ സ്കറിയ. 11 കളിയിൽ നിന്നും 25 വിക്കറ്റുകളാണ് അഖിൽ വീഴ്ത്തിയത്. കാലിക്കറ്റ് ഗ്ലോബ്സ്റ്റാർസ് സെമിയിയിൽ തോറ്റ് പുറത്തായെങ്കിലും വിക്കറ്റ് നേട്ടത്തിൽ സ്വന്തം ടീമിനെ മുന്നിലെത്തിച്ചിരിക്കുകയാണ് ഈ 26കാരൻ.
കഴിഞ്ഞ സീസണിലും 25 വിക്കറ്റ് വീഴ്ത്തി പർപ്പിൾ ക്യാപ്പ് സ്വന്തമാക്കിയിരുന്നു. കഴിഞ്ഞ സീസണിലും ഈ സീസണിലും 25 വിക്കറ്റുകൾ വീഴ്ത്തി കെ സി എല്ലിൽ 50 വിക്കറ്റ് തികയ്ക്കുന്ന ആദ്യ താരം എന്ന റെക്കോർഡ് കൂടെ തന്റെ പേരിൽ കുറിച്ചിരിക്കുകയാണ് അഖിൽ സ്കറിയ. ഓൾറൗണ്ടർ കൂടിയായ അഖിൽ ബൗളിങ്ങിൽ മാത്രമല്ല ബാറ്റിംഗിലും മികവു കാണിച്ച താരം കൂടിയാണ്. ടൂർണമെന്റിൽ ആകെ 314 റൺസ് നേടിയ താരത്തിന്റെ ഉയർന്ന വ്യക്തിഗത സ്കോർ 72 റൺസാണ്.
കൊല്ലം ഏരീസിന്റെ അമൽ എ ജിയാണ് വിക്കറ്റ് വേട്ടക്കാരിൽ രണ്ടാം സ്ഥാനത്തുള്ളത്. 12 മത്സരങ്ങളിൽ നിന്ന് 17 വിക്കറ്റുകളാണ് അമൽ സ്വന്തമാക്കിയിട്ടുള്ളത്. മൂന്നും നാലും സ്ഥാനങ്ങളിലായി കൊച്ചി ബ്ലൂടൈഗേഴ്സിന്റെ കെ എം ആസിഫ് 16 വിക്കറ്റ്, തൃശ്ശൂർ ടൈറ്റൻസ് താരം സിബിൻ ഗിരീഷ്, പി എസ് ജെറിൻ എന്നിവർ15 വിക്കറ്റ് വീതം വീഴ്ത്തി. കെ സി എൽ രണ്ടം സീസൺ അവസാനിക്കുമ്പോൾ ചാംപ്യന്മാരായത് കൊച്ചി ബ്ലൂടൈഗേഴ്സാണ്.
