ഏകദിനത്തില്‍ സച്ചിനെ മറികടക്കുക കോലിക്കു സാധ്യമോ? കണക്കുകള്‍ ഇങ്ങനെ

ഓസ്‌ട്രേലിയയ്‌ക്കെതിരായ മൂന്നാം ഏകദിനത്തില്‍ അര്‍ധ സെഞ്ചുറിയുമായി വിരാട് കോലി ഇന്ത്യയുടെ വിജയത്തില്‍ നിര്‍ണായക സ്വാധീനമായതിനൊപ്പം ശ്രീലങ്കന്‍ ഇതിഹാസം കുമാര്‍ സംഗക്കാരയുടെ റെക്കോര്‍ഡും മറികടന്നിരുന്നു. ഏകദിനത്തില്‍ ഏറ്റവും കൂടുതല്‍ റണ്‍സ് നേടുന്ന രണ്ടാമത്തെ താരമായിരിക്കുകയാണ് കോലി. 305 ഏകദിന മത്സരങ്ങളില്‍ നിന്ന് 57.69 ശരാശരിയില്‍ 14,250 റണ്‍സാണ് കോലി നേടിയിരിക്കുന്നത്.

404 മത്സരങ്ങളില്‍ നിന്ന് 14,234 റണ്‍സ് നേടിയ കുമാര്‍ സംഗക്കാരയെ 99 മത്സരങ്ങളുടെ വ്യത്യാസത്തിലാണ് കോലി മറികടന്നത്. 463 മത്സരങ്ങളില്‍ നിന്ന് 44.83 ശരാശരിയില്‍ 18,426 റണ്‍സുള്ള സച്ചിന്‍ ടെന്‍ഡുല്‍ക്കറാണ് ഏകദിനത്തില്‍ ഒന്നാമന്‍. കരിയറിന്റെ അവസാന ലാപ്പില്‍ നില്‍ക്കുന്ന കോലിക്ക് സച്ചിനെ മറികടക്കുക സാധ്യമാണോ?

2027 ഏകദിന ലോകകപ്പ് വരെ കോലി കളിച്ചാലും സച്ചിന്റെ ഏകദിന റണ്‍സ് മറികടക്കുക അസാധ്യമാണ്. 2026 വരെ 12 ഏകദിനങ്ങളാണ് ഇതുവരെ ഇന്ത്യക്ക് ഷെഡ്യൂള്‍ ചെയ്തിരിക്കുന്നത്. 2027 ഏകദിന ലോകകപ്പ് ഫൈനലില്‍ ഇന്ത്യ എത്തുകയാണെങ്കില്‍ 11 മത്സരങ്ങള്‍ കൂടി കളിക്കാന്‍ സാധിക്കും. അതായത് 2027 ഏകദിന ലോകകപ്പ് വരെ ഇന്ത്യക്കായി എല്ലാ ഏകദിനങ്ങളും കോലി കളിച്ചാല്‍ തന്നെ 23 മത്സരങ്ങള്‍ കൂടിയാണ് ലഭിക്കുക. ഈ കളികളില്‍ ഓരോ ഇന്നിങ്‌സിലും 40 റണ്‍സ് വീതം എടുത്താല്‍ കോലിക്ക് സ്‌കോര്‍ ചെയ്യാന്‍ സാധിക്കുക 920 റണ്‍സ് മാത്രം. ഓരോ ഇന്നിങ്‌സിലും 60 റണ്‍സോ അതില്‍ അധികമോ സ്‌കോര്‍ ചെയ്താല്‍ പോലും 1,350 മുതല്‍ 1,500 റണ്‍സ് വരെയാണ് നേടാന്‍ സാധിക്കുക. അങ്ങനെ വന്നാലും കോലിക്ക് സച്ചിനെ മറികടക്കുക അസാധ്യം.

അതേസമയം ഏകദിനത്തില്‍ സച്ചിനേക്കാള്‍ അധികം സെഞ്ചുറികള്‍ കോലിക്ക് ഇപ്പോള്‍ തന്നെയുണ്ട്. സച്ചിന്‍ 49 സെഞ്ചുറികളാണ് സച്ചിന്‍ നേടിയിരിക്കുന്നത്. കോലിയാകട്ടെ 51 സെഞ്ചുറികള്‍ നേടിയിട്ടുണ്ട്.