സാന്റിയാഗോ: അണ്ടർ-20 ലോകകപ്പ് ഫുട്ബോൾ ഫൈനലിൽ ചരിത്രവിജയം നേടി മൊറോക്കോ. ഫൈനലിൽ അർജന്റീനയെ തോൽപ്പിച്ചാണ് മൊറോക്കോ ചാമ്പ്യന്മാരായത്. ചിലിയിലെ സാന്തിയാഗോയിൽ നടന്ന മത്സരത്തിൽ മൊറോക്കോ എതിരില്ലാത്ത രണ്ട് ഗോളുകൾക്കാണ് അർജന്റീനയെ പരാജയപ്പെടുത്തിയത്. ഇതോടെ, അണ്ടർ-20 ലോകകപ്പ് കിരീടം നേടുന്ന ചരിത്രത്തിലെ ആദ്യ ആഫ്രിക്കൻ രാജ്യമെന്ന നേട്ടവും മൊറോക്കോ സ്വന്തമാക്കി.
മത്സരത്തിന്റെ 12ാം മിനിറ്റിൽ യാസിർ സബിരി നേടിയ പെനാൽറ്റിയിലൂടെ മൊറോക്കോയ്ക്ക് ആദ്യ ലീഡ് ലഭിച്ചു. 29ാം മിനിറ്റിൽ ഒത്മാൻ മാമയുടെ പാസ് ഗോളാക്കി മാറ്റി സബിരി തന്നെ ടീമിന് രണ്ടാമത്തെ ഗോൾ സമ്മാനിച്ചു. രണ്ടാം പകുതിയിൽ ഇരുടീമുകൾക്കും അവസരങ്ങൾ ലഭിച്ചെങ്കിലും ഗോൾ ഒന്നും തന്നെ ഉണ്ടായില്ല. മൊറോക്കോയുടെ ഈ വിജയത്തോടെ, 2009ൽ ഘാനയ്ക്ക് ശേഷം അണ്ടർ-20 ലോകകപ്പ് കിരീടം സ്വന്തമാക്കുന്ന ആദ്യ ആഫ്രിക്കൻ രാജ്യമായി മൊറോക്കോ മാറിയിരിക്കുകയാണ്.
അതേസമയം ശനിയാഴ്ച നടന്ന മൂന്നാം സ്ഥാനത്തിനായുള്ള മത്സരത്തിൽ കൊളംബിയ ഫ്രാൻസിനെ ഏകപക്ഷീയമായ ഒരു ഗോളിന് തോൽപ്പിച്ച് മൂന്നാം സ്ഥാനം നേടി. അർജന്റീനയോട് 1-0ന് തോറ്റതിനെത്തുടർന്നാണ് കൊളംബിയ മൂന്നാം സ്ഥാനത്തിനായുള്ള മത്സരത്തിനിറങ്ങിയത്. പെനാൽറ്റിയിൽ മൊറോക്കോയോട് തോറ്റായിരുന്നു ഫ്രാൻസിന്റെ ഫൈനൽ പ്രതീക്ഷ അവസാനിച്ചത്.
