ഏഷ്യ കപ്പ് ഇന്ത്യക്ക് കൈമാറില്ലെന്ന നിലപാട് തുടര്‍ന്ന് ഏഷ്യന്‍ ക്രിക്കറ്റ് കൗണ്‍സില്‍ അധ്യക്ഷനും പാക്കിസ്ഥാന്‍ ആഭ്യന്തരമന്ത്രിയുമായ മൊഹ്‌സിന്‍ നഖ്വി. ദുബായിലെ ഏഷ്യന്‍ ക്രിക്കറ്റ് കൗണ്‍സില്‍ ആസ്ഥാനത്താണ് നിലവില്‍ കിരീടം. തന്റെ അനുമതിയില്ലാതെ വിജയികളായ ഇന്ത്യക്ക് കിരീടം നല്‍കരുതെന്നാണ് കൗണ്‍സിലിനു നഖ്വി നല്‍കിയിരിക്കുന്ന നിര്‍ദേശം.
സെപ്റ്റംബര്‍ 28 നു ദുബായില്‍ നടന്ന ഏഷ്യ കപ്പ് ഫൈനലില്‍ പാക്കിസ്ഥാനെ പരാജയപ്പെടുത്തിയാണ് ഇന്ത്യ ജേതാക്കളായത്. പാക്കിസ്ഥാന്‍ ക്രിക്കറ്റ് ബോര്‍ഡ് ചെയര്‍മാന്‍ കൂടിയായ നഖ്വിയില്‍ നിന്ന് കിരീടം സ്വീകരിക്കില്ലെന്ന് ഇന്ത്യ തീരുമാനമെടുക്കുകയായിരുന്നു. പഹല്‍ഗാം ഭീകരാക്രമണത്തില്‍ പ്രതിഷേധിച്ചാണ് പാക് മന്ത്രിയില്‍ നിന്ന് കിരീടം സ്വീകരിക്കില്ലെന്ന് ഇന്ത്യ നിലപാടെടുത്തത്.
‘ ഫൈനലിനു ശേഷം ഈസമയം വരെ ഏഷ്യ കപ്പ് ദുബായിലെ ഏഷ്യന്‍ ക്രിക്കറ്റ് കൗണ്‍സില്‍ ആസ്ഥാനത്തുണ്ട്. തന്റെ നിര്‍ദേശം ഇല്ലാതെ കിരീടം ആര്‍ക്കെങ്കിലും നല്‍കുകയോ ഇവിടെ നിന്ന് മാറ്റുകയോ ചെയ്യരുതെന്ന് നഖ്വി നിര്‍ദേശം നല്‍കിയിട്ടുണ്ട്. ആര്‍ക്കെങ്കിലും കിരീടം കൈമാറുകയാണെങ്കില്‍ അത് തന്റെ സാന്നിധ്യത്തില്‍ വേണമെന്നും അദ്ദേഹം പറഞ്ഞിട്ടുണ്ട്,’ നഖ്വിയുമായി അടുത്ത വൃത്തങ്ങളെ ഉദ്ധരിച്ച് പിടിഐ റിപ്പോര്‍ട്ട് ചെയ്യുന്നു.
ഇന്ത്യന്‍ ടീമിനോ ബിസിസിഐയ്‌ക്കോ ഏഷ്യ കപ്പ് ട്രോഫി നല്‍കണമെങ്കില്‍ അത് തന്റെ സാന്നിധ്യത്തില്‍ മാത്രമായിരിക്കണം. മാത്രമല്ല അവര്‍ക്കു ട്രോഫി കൊടുക്കുക ഏഷ്യ ക്രിക്കറ്റ് കൗണ്‍സില്‍ ചെയര്‍മാനായ താന്‍ ആയിരിക്കുമെന്നും നഖ്വി നിലപാടെടുത്തിട്ടുണ്ട്.
നഖ്വിയുടെ കൈയില്‍ നിന്ന് കിരീടം വാങ്ങില്ലെന്നു നിലപാടെടുത്ത ഇന്ത്യ ഏഷ്യ കപ്പ് ഫൈനലിലെ ജയത്തിനു ശേഷം ആഘോഷപ്രകടനം നടത്തിയത് കിരീടമില്ലാതെയാണ്. നഖ്വിക്കു പകരം ഏഷ്യ ക്രിക്കറ്റ് കൗണ്‍സില്‍ ഭരണാധികാരികളില്‍ മറ്റാരെങ്കിലും കിരീടം നല്‍കിയാല്‍ അത് സ്വീകരിക്കാന്‍ ഇന്ത്യ തയ്യാറായിരുന്നു. എന്നാല്‍ താനല്ലാതെ മറ്റാരെങ്കിലും കപ്പ് നല്‍കുന്നതിനോടു നഖ്വിക്കും താല്‍പര്യമില്ലായിരുന്നു. ഇന്ത്യന്‍ ടീം കിരീടം ഏറ്റുവാങ്ങാന്‍ തയ്യാറാകാതെ വന്നപ്പോള്‍ അത് ഏഷ്യ ക്രിക്കറ്റ് കൗണ്‍സില്‍ ആസ്ഥാനത്തേക്ക് കൊണ്ടുപോകാന്‍ നിര്‍ദേശിച്ചത് നഖ്വിയാണ്.
