ദക്ഷിണാഫ്രിക്കയ്‌ക്കെതിരായ രണ്ടാം ടെസ്റ്റ് തോല്‍വിയോടെ ഇന്ത്യന്‍ ക്രിക്കറ്റ് ടീം മുഖ്യപരിശീലകന്‍ ഗൗതം ഗംഭീര്‍ പ്രതിരോധത്തില്‍. നാട്ടില്‍ തുടര്‍ച്ചയായി ടെസ്റ്റ് മത്സരങ്ങള്‍ തോല്‍ക്കുന്ന രീതിയിലേക്ക് ഇന്ത്യന്‍ ടീം അധപതിക്കാന്‍ കാരണം ഗംഭീറാണെന്നും ഉടന്‍ പരിശീലകനെ മാറ്റണമെന്നും ആരാധകര്‍ ആവശ്യപ്പെടുന്നു.
നാട്ടില്‍ വെച്ച് നടന്ന അവസാന ഏഴ് ടെസ്റ്റ് മത്സരങ്ങളില്‍ അഞ്ചിലും ഇന്ത്യ തോറ്റു. ന്യൂസിലന്‍ഡിനെതിരായ 3-0 തോല്‍വിയില്‍ നിന്നാണ് തുടക്കം. അതിനു പിന്നാലെ താരതമ്യേന ദുര്‍ബലരായ വെസ്റ്റ് ഇന്‍ഡീസിനെ 2-0 ത്തിനു തോല്‍പ്പിച്ചത് ചെറിയൊരു ആശ്വാസമായെന്നു മാത്രം. ഇപ്പോള്‍ ഇതാ ദക്ഷിണാഫ്രിക്കയ്‌ക്കെതിരെ 2-0 ത്തിന്റെ കീഴടങ്ങല്‍. ഈ അഞ്ച് തോല്‍വികളും പരിശോധിച്ചാല്‍ ഒരിടത്തും ഇന്ത്യ എതിരാളികള്‍ക്കു ചെറിയ തോതിലുള്ള വെല്ലുവിളി പോലും ഉയര്‍ത്തിയിട്ടില്ലെന്നു മനസിലാകും.
ന്യൂസിലന്‍ഡിനെതിരായ ആദ്യ ടെസ്റ്റില്‍ ഇന്ത്യ തോറ്റത് എട്ട് വിക്കറ്റിനാണ്. രണ്ടാം ടെസ്റ്റില്‍ അത് 113 റണ്‍സിന്റെ തോല്‍വിയായി. മൂന്നാം ടെസ്റ്റില്‍ 147 റണ്‍സ് വിജയലക്ഷ്യവുമായി ഇറങ്ങിയ ഇന്ത്യ 121 നു ഓള്‍ഔട്ട് ആയത് ഇപ്പോഴും ക്രിക്കറ്റ് ആരാധകരില്‍ ദുഃസ്വപ്‌നമായി തുടരുന്നു. 36 വര്‍ഷങ്ങള്‍ക്കു ശേഷമാണ് ന്യൂസിലന്‍ഡ് ഇന്ത്യയില്‍ വെച്ച് ഇന്ത്യയ്‌ക്കെതിരെ ടെസ്റ്റ് പരമ്പര നേടുന്നത്.
ന്യൂസിലന്‍ഡിനെതിരായ പരമ്പരയ്ക്കു പിന്നാലെ വെസ്റ്റ് ഇന്‍ഡീസിനെ നാട്ടില്‍വെച്ച് 2-0 ത്തിനു തോല്‍പ്പിച്ചെങ്കിലും അതില്‍ ഗംഭീറിനു ക്രെഡിറ്റ് അവകാശപ്പെടാനൊന്നുമില്ല. വെസ്റ്റ് ഇന്‍ഡീസ് താരതമ്യേന വളരെ ദുര്‍ബലരായ ടെസ്റ്റ് ടീം ആണ്. ഇപ്പോള്‍ ദക്ഷിണാഫ്രിക്കയ്‌ക്കെതിരെ ഒന്നാം ടെസ്റ്റില്‍ തോറ്റത് 30 റണ്‍സിനാണെങ്കില്‍ രണ്ടാം ടെസ്റ്റില്‍ അത് 408 റണ്‍സിനായി ! ഓസ്‌ട്രേലിയയില്‍ പോയുള്ള 3-1 തോല്‍വിയും ഗംഭീറിന്റെ പ്രോഗസ് കാര്‍ഡില്‍ ബ്ലാക്ക് മാര്‍ക്കാണ്.
ഗംഭീറിന്റെ കീഴില്‍ ഇന്ത്യ ഇതുവരെ കളിച്ചത് 19 ടെസ്റ്റ് മത്സരങ്ങള്‍. അതില്‍ ജയിക്കാനായത് ഏഴെണ്ണത്തില്‍ മാത്രം. രണ്ട് മത്സരങ്ങള്‍ സമനിലയായപ്പോള്‍ 10 മത്സരങ്ങളില്‍ തോറ്റു. കഴിഞ്ഞ 10 വര്‍ഷമെടുത്താല്‍ ഇന്ത്യന്‍ ടെസ്റ്റ് ടീം ഇത്രയും മോശം അവസ്ഥയില്‍ നിന്നിട്ടില്ലെന്നു പറയാം. വിരാട് കോലി, രോഹിത് ശര്‍മ, അജിങ്ക്യ രഹാനെ, ചേതേശ്വര്‍ പൂജാര, രവിചന്ദ്രന്‍ അശ്വിന്‍ തുടങ്ങിയ മുതിര്‍ന്ന താരങ്ങളുടെ അഭാവം നികത്താന്‍ ഗംഭീറിനു സാധിക്കാത്തതാണ് ഈ തോല്‍വികളുടെയെല്ലാം പ്രധാന കാരണം. ഗംഭീര്‍ പരിശീലക സ്ഥാനം ഒഴിയണമെന്ന ആവശ്യം സമൂഹമാധ്യമങ്ങളില്‍ ശക്തമാണ്. ബിസിസിഐ ആവശ്യപ്പെട്ടാല്‍ ടെസ്റ്റ് പരിശീലകസ്ഥാനം ഒഴിയുമെന്ന നിലപാടിലാണ് ഗംഭീറും.
