ദക്ഷിണാഫ്രിക്കയ്‌ക്കെതിരായ രണ്ടാം ടെസ്റ്റില്‍ ഇന്ത്യ തോല്‍വിയുടെ പാടിവാതില്‍ക്കല്‍ നില്‍ക്കുകയാണ്. രണ്ടാം സെഷന്‍ പുരോഗമിക്കുമ്പോള്‍ ആറ് വിക്കറ്റ് നഷ്ടത്തില്‍ 109 റണ്‍സാണ് ഇന്ത്യ നേടിയിരിക്കുന്നത്. നാല് വിക്കറ്റ് ശേഷിക്കെ ഇന്ത്യ എങ്ങനെ പിടിച്ചുനില്‍ക്കുമെന്നാണ് ആരാധകര്‍ ഉറ്റുനോക്കുന്നത്.
നിര്‍ണായക സമയത്ത് ബാറ്റ് ചെയ്യാനെത്തി വന്‍ പരാജയമായി ഡ്രസിങ് റൂമിലേക്കു കയറിപ്പോയ ഇന്ത്യന്‍ നായകന്‍ റിഷഭ് പന്തിനെയാണ് ആരാധകര്‍ ഇപ്പോള്‍ രൂക്ഷമായി വിമര്‍ശിക്കുന്നത്. ആറാമനായി ക്രീസിലെത്തിയ പന്ത് ആക്രമിച്ചു കളിക്കാനുള്ള തിടുക്കത്തിനിടയില്‍ ക്യാച്ചില്‍ പുറത്താകുകയായിരുന്നു. ക്യാപ്റ്റന്‍സി ഉത്തരവാദിത്തം പോലും പന്ത് കാണിച്ചില്ലെന്നാണ് വിമര്‍ശനം.
16 പന്തുകള്‍ നേരിട്ട ഇന്ത്യന്‍ നായകന്‍ 13 റണ്‍സെടുത്താണ് പുറത്തായത്. ഒരു സിക്‌സും ഒരു ഫോറും അടങ്ങിയതാണ് ഇന്നിങ്‌സ്. ഇന്ത്യ പൂര്‍ണമായി പ്രതിരോധത്തിലായപ്പോഴാണ് പന്ത് ക്രീസിലെത്തുന്നത്. മത്സരം സമനിലയാക്കുക എന്നൊരു ഓപ്ഷന്‍ മാത്രമാണ് ഇന്ത്യക്ക് മുന്നിലുള്ളത്. എന്നിട്ടും തന്റെ പതിവ് ആക്രമണശൈലിയിലാണ് പന്ത് ഇന്നിങ്‌സ് തുടങ്ങിയത്. മികച്ച തുടക്കം ലഭിച്ചിട്ടും അത് ടീമിനു ഗുണമാകുന്ന രീതിയില്‍ ഉപയോഗിക്കാന്‍ പന്തിനു സാധിച്ചില്ല.
സിമണ്‍ ഹാര്‍മറിന്റെ പന്തില്‍ ഏദന്‍ മാര്‍ക്രത്തിനു ക്യാച്ച് നല്‍കിയാണ് പന്ത് പുറത്തായത്. പന്ത് ആക്രമിച്ചു കളിക്കുമെന്ന് മനസിലാക്കിയ ദക്ഷിണാഫ്രിക്കന്‍ നായകന്‍ തെംബ ബാവുമ അതിനനുസരിച്ചുള്ള ഫീല്‍ഡ് ഒരുക്കി ഇന്ത്യന്‍ നായകനു കെണിവെച്ചു. അപ്പോള്‍ പോലും കൂടുതല്‍ ശ്രദ്ധയോടെ ക്രീസില്‍ നിലയുറപ്പിക്കുകയെന്ന ചിന്ത പന്തിനുണ്ടായില്ല. ഇതാണ് ആരാധകരെ ചൊടിപ്പിച്ചിരിക്കുന്നത്.
ഒന്നാം ഇന്നിങ്‌സിലും പന്ത് ബാറ്റിങ്ങില്‍ പൂര്‍ണ പരാജയമായിരുന്നു. എട്ട് പന്തില്‍ ഏഴ് റണ്‍സാണ് പന്ത് ഒന്നാം ഇന്നിങ്‌സില്‍ സ്‌കോര്‍ ചെയ്തത്. രണ്ട് ഇന്നിങ്‌സിലുമായി ഇന്ത്യന്‍ നായകന്‍ എടുത്തത് വെറും 20 റണ്‍സ് ! ശുഭ്മാന്‍ ഗില്ലിനു പരുക്കേറ്റ് പുറത്താകേണ്ട സാഹചര്യം വന്നപ്പോഴാണ് ഉപനായകനായ പന്ത് ഗുവാഹത്തിയില്‍ ക്യാപ്റ്റന്‍സി ഏറ്റെടുത്തത്.
