ദക്ഷിണാഫ്രിക്കയ്‌ക്കെതിരായ രണ്ടാം ടെസ്റ്റിലും ഇന്ത്യ തോല്‍വി മുന്നില്‍കാണുകയാണ്. ഒന്നാം ഇന്നിങ്‌സില്‍ 288 റണ്‍സിന്റെ ലീഡാണ് ഇന്ത്യ വഴങ്ങിയത്. ഹോം ഗ്രൗണ്ടില്‍ ഇന്ത്യ ഇത്രയും പ്രതിരോധത്തിലാകുന്നത് ഒരുകാലത്ത് ഓര്‍ക്കാന്‍ പോലും കഴിഞ്ഞിരുന്നില്ല. എന്നാല്‍ ഗൗതം ഗംഭീര്‍ പരിശീലകസ്ഥാനം ഏറ്റെടുത്ത ശേഷം ഹോം ഗ്രൗണ്ടിലാണ് ഇന്ത്യ ഏറ്റവും കൂടുതല്‍ നാണംകെട്ടത്.
ഗുവാഹത്തിയില്‍ പുരോഗമിക്കുന്ന രണ്ടാം ടെസ്റ്റിന്റെ ഒന്നാം ഇന്നിങ്‌സില്‍ ദക്ഷിണാഫ്രിക്ക 489 റണ്‍സ് നേടിയപ്പോള്‍ ഇന്ത്യ 201 നു ഓള്‍ഔട്ട് ആകുകയായിരുന്നു. രണ്ടാം ഇന്നിങ്‌സില്‍ ദക്ഷിണാഫ്രിക്ക വിക്കറ്റ് നഷ്ടമില്ലാതെ 26 റണ്‍സ് നേടിയിട്ടുണ്ട്. ആകെ ലീഡ് 314 ലേക്ക് എത്തി. ലീഡ് 450 കടന്നാല്‍ ദക്ഷിണാഫ്രിക്ക ഇന്ത്യയെ ബാറ്റിങ്ങിനു അയക്കാനാണ് സാധ്യത. ഇപ്പോഴത്തെ പ്രകടനം പരിഗണിക്കുമ്പോള്‍ 450+ വിജയലക്ഷ്യം ഇന്ത്യക്കു ബാലികേറാമലയായിരിക്കും.
കൊല്‍ക്കത്തയില്‍ നടന്ന ഒന്നാം ടെസ്റ്റിലും ഇന്ത്യ തോല്‍വി വഴങ്ങിയിരുന്നു. ഗുവാഹത്തിയില്‍ കൂടി തോറ്റാല്‍ ഐസിസി ടെസ്റ്റം ചാംപ്യന്‍ഷിപ്പ് ഫൈനല്‍ സ്വപ്‌നം പൊലിയുമെന്ന് ഉറപ്പാണ്.
നാട്ടില്‍വെച്ച് ന്യൂസിലന്‍ഡിനോടു 3-0 ത്തിനു തോറ്റതാണ് ഇന്ത്യ സമീപകാലത്ത് കണ്ട ഏറ്റവും വലിയ പരമ്പര തോല്‍വി. അക്ഷരാര്‍ഥത്തില്‍ നാണംകെട്ടു നില്‍ക്കുകയായിരുന്നു ഇന്ത്യ. ഗൗതം ഗംഭീര്‍ പരിശീലകസ്ഥാനം ഏറ്റെടുത്ത ശേഷമുള്ള സുപ്രധാന ടെസ്റ്റ് പരമ്പര കൂടിയായിരുന്നു ഇത്. അതിനു പിന്നാലെ താരതമ്യേന ദുര്‍ബലരായ വെസ്റ്റ് ഇന്‍ഡീസിനെ 2-0 ത്തിനു തോല്‍പ്പിച്ചത് ചെറിയൊരു ആശ്വാസമായെന്നു മാത്രം. ദക്ഷിണാഫ്രിക്കയ്‌ക്കെതിരായ ഒന്നാം ടെസ്റ്റിലെ തോല്‍വിയോടെ നാട്ടില്‍ വെച്ച് നടന്ന അവസാന ആറ് ടെസ്റ്റുകളില്‍ നാലിലും തോറ്റ ടീമായി ഇന്ത്യ.
ടെസ്റ്റ് ഫോര്‍മാറ്റില്‍ ഗംഭീര്‍ നടത്തിക്കൊണ്ടിരിക്കുന്ന പരീക്ഷണങ്ങളാണ് ഇപ്പോഴത്തെ മോശം പ്രകടനത്തിനു കാരണമെന്ന വിമര്‍ശനങ്ങള്‍ ഉയരുന്നുണ്ട്. ഏകദിനത്തിലും ട്വന്റി 20 യിലും ഗംഭീര്‍ പരിശീലകസ്ഥാനത്ത് തുടരട്ടെയെന്നും ടെസ്റ്റില്‍ പുതിയ പരിശീലകനെ പരീക്ഷിക്കുകയാണ് വേണ്ടതെന്നും ഇന്ത്യന്‍ ആരാധകര്‍ ആവശ്യപ്പെടുന്നു.
