ആഷസ് പരമ്പരയിലെ ഒന്നാം ടെസ്റ്റില്‍ ആതിഥേയരായ ഓസ്‌ട്രേലിയ ജയിച്ചതിനു പിന്നാലെ ട്രോളുമായി ക്രിക്കറ്റ് ആരാധകര്‍. തോല്‍ക്കുമെന്ന് ഉറപ്പിച്ചിടത്തുനിന്ന് ഇങ്ങനെയൊക്കെ ജയിക്കണമെങ്കില്‍ ഓസ്‌ട്രേലിയയെ പോലൊരു സൈക്കോ ടീമിനേ സാധിക്കൂവെന്നാണ് ആരാധകരുടെ കമന്റ്. ഒന്നാം ഇന്നിങ്‌സില്‍ 40 റണ്‍സിനു പിന്നില്‍ നിന്ന ശേഷമാണ് ഓസ്‌ട്രേലിയയുടെ തിരിച്ചുവരവ്.
ഇംഗ്ലണ്ട് ഒന്നാം ഇന്നിങ്‌സില്‍ 172 റണ്‍സിനു ഓള്‍ഔട്ട് ആയപ്പോള്‍ ഓസ്‌ട്രേലിയയുടെ ഒന്നാം ഇന്നിങ്‌സ് 132 ല്‍ അവസാനിച്ചു. ഓസ്‌ട്രേലിയയുടെ പ്രധാന ബാറ്റര്‍മാരെല്ലാം സ്വന്തം ഗ്രൗണ്ടില്‍ റണ്‍സെടുക്കാന്‍ പാടുപെടുകയായിരുന്നു. ഇംഗ്ലണ്ടിനു ഒന്നാം ഇന്നിങ്‌സില്‍ 40 റണ്‍സിന്റെ ലീഡ് ഉണ്ടായിരുന്നു. ബാറ്റിങ് ദുഷ്‌കരമായ പിച്ചില്‍ ഇംഗ്ലണ്ട് രണ്ടാം ഇന്നിങ്‌സില്‍ നേടിയത് 164 റണ്‍സ്. ഒന്നാം ഇന്നിങ്‌സ് ലീഡ് അടക്കം ആതിഥേയര്‍ക്കു ജയിക്കാന്‍ വേണ്ടിയിരുന്നത് 205 റണ്‍സ്. ഒന്നാം ഇന്നിങ്‌സില്‍ 132 റണ്‍സെടുക്കാന്‍ പാടുപെട്ടവര്‍ രണ്ടാം ഇന്നിങ്‌സില്‍ 205 റണ്‍സെടുക്കാന്‍ യാതൊരു സാധ്യതയുമില്ലെന്നാണ് ഭൂരിഭാഗം പ്രേക്ഷകരും പ്രവചിച്ചിരുന്നത്. എന്നാല്‍ തോല്‍വി ഉറപ്പിച്ചിടത്തുനിന്ന് ജയത്തിലേക്ക് കയറിവന്നു ശീലമുള്ള ഓസ്‌ട്രേലിയ ഇവിടെയും അത് ആവര്‍ത്തിച്ചു.
ഓസ്‌ട്രേലിയയുടെ രണ്ടാം ഇന്നിങ്‌സിലെ ബാറ്റിങ് ഏകദിന ശൈലിയില്‍ ആയിരുന്നു. 205 റണ്‍സ് വിജയലക്ഷ്യം വെറും 28.2 ഓവറില്‍ നേടി. തുടക്കംമുതല്‍ ആക്രമിച്ചു കളിച്ച ഓസ്‌ട്രേലിയ ഒരുവിധത്തിലും ഒന്നാം ഇന്നിങ്‌സിലെ പിഴവുകള്‍ ആവര്‍ത്തിക്കാതിരിക്കാന്‍ ശ്രദ്ധിച്ചു.
ട്രാവിഡ് ഹെഡ് ഓസ്‌ട്രേലിയയ്ക്കായി സെഞ്ചുറി നേടി. വെറും 83 പന്തില്‍ 16 ഫോറും നാല് സിക്‌സും സഹിതം 123 റണ്‍സെടുത്താണ് ഹെഡ് പുറത്തായത്. മര്‍നസ് ലബുഷെയ്ന്‍ (49 പന്തില്‍ പുറത്താകാതെ 51), ജേക് വെതറാള്‍ഡ് (34 പന്തില്‍ 23) എന്നിവരും തിളങ്ങി. രണ്ട് ഇന്നിങ്‌സിലുമായി പത്ത് വിക്കറ്റുകള്‍ നേടിയ ഓസീസ് പേസര്‍ മിച്ചല്‍ സ്റ്റാര്‍ക്കാണ് കളിയിലെ താരം. അഞ്ച് മത്സരങ്ങളുടെ പരമ്പര 1-0 ത്തിനു ഓസീസ് ലീഡ് ചെയ്യുകയാണ്.
