ദക്ഷിണാഫ്രിക്കയ്‌ക്കെതിരായ ഒന്നാം ടെസ്റ്റിനിടെ പരുക്കേറ്റ ഇന്ത്യന്‍ നായകന്‍ ശുഭ്മാന്‍ ഗില്‍ ഗുവാഹത്തിയില്‍ നടക്കാനിരിക്കുന്ന രണ്ടാം ടെസ്റ്റില്‍ കളിക്കില്ല. ഏകദിന പരമ്പര വരാനിരിക്കെ ഗില്ലിനെ വെച്ച് റിസ്‌ക്കെടുക്കാന്‍ ടീം മാനേജ്‌മെന്റ് തയ്യാറല്ല. ഗില്ലിനു കളിക്കാന്‍ താല്‍പര്യമുണ്ടെങ്കിലും വേണ്ട എന്ന നിലപാടിലാണ് ബിസിസിഐ മെഡിക്കല്‍ സംഘം.
കഴുത്ത് വേദന കുറഞ്ഞതിനെ തുടര്‍ന്ന് ഇന്നലെ നെറ്റ്‌സില്‍ പ്രാക്ടീസ് ചെയ്യാന്‍ ഗില്‍ താല്‍പര്യം പ്രകടിപ്പിച്ചിരുന്നു. ഒരു മണിക്കൂറെങ്കിലും നെറ്റ്‌സില്‍ ബാറ്റ് ചെയ്യണമെന്ന് ആഗ്രഹിച്ചു ഗില്‍ പാഡ് ധരിക്കുകയും ചെയ്തു. എന്നാല്‍ പരുക്ക് ഗുരുതരമായാലോ എന്ന പേടി കാരണം ബിസിസിഐ വൈദ്യസംഘം താരത്തോടു പരിശീലനം ഉപേക്ഷിക്കാന്‍ നിര്‍ദേശിച്ചു. പരുക്ക് വഷളായാല്‍ ദക്ഷിണാഫ്രിക്കയ്‌ക്കെതിരായ ഏകദിന പരമ്പരയില്‍ ഗില്ലിനു കളിക്കാന്‍ കഴിയില്ല. ഈ സാഹചര്യത്തിലാണ് ഗുവാഹത്തി ടെസ്റ്റില്‍ ഗില്‍ കളിക്കേണ്ടതില്ലെന്ന തീരുമാനത്തിലേക്ക് ബിസിസിഐ എത്തിയത്.
ഒന്നാം ടെസ്റ്റിനിടെ ഗില്ലിനു കഴുത്ത് വേദന അനുഭവപ്പെടുകയായിരുന്നു. തുടര്‍ന്ന് താരത്തെ സ്‌കാനിങ്ങിനു വിധേയനാക്കുകയും ആശുപത്രിയില്‍ പ്രവേശിപ്പിക്കുകയും ചെയ്തു. വേദന രൂക്ഷമായതിനെ തുടര്‍ന്ന് രണ്ടാം ഇന്നിങ്‌സില്‍ ഗില്‍ ബാറ്റ് ചെയ്തതുമില്ല. പൂര്‍ണ വിശ്രമം താരത്തിനു വേണമെന്നാണ് ബിസിസിഐ തീരുമാനം.
അതേസമയം ഗില്ലിന്റെ അഭാവത്തില്‍ ഉപനായകന്‍ റിഷഭ് പന്ത് ക്യാപ്റ്റന്‍സി ഏറ്റെടുക്കും. ഒന്നാം ടെസ്റ്റ് കളിച്ച അക്‌സര്‍ പട്ടേലിനെയും ഇത്തവണ പ്ലേയിങ് ഇലവനില്‍ നിന്ന് ഒഴിവാക്കാനാണ് സാധ്യത.
ഇന്ത്യ, സാധ്യത ഇലവന്‍: കെ.എല്‍.രാഹുല്‍, യശസ്വി ജയ്‌സ്വാള്‍, സായ് സുദര്‍ശന്‍, ദേവ്ദത്ത് പടിക്കല്‍, റിഷഭ് പന്ത്, ധ്രുവ് ജുറല്‍, രവീന്ദ്ര ജഡേജ, വാഷിങ്ടണ്‍ സുന്ദര്‍, നിതീഷ് കുമാര്‍ റെഡ്ഡി, മുഹമ്മദ് ഷമി, ജസ്പ്രിത് ബുംറ
നാളെ മുതലാണ് രണ്ടാം ടെസ്റ്റ്. സ്റ്റാര്‍ സ്‌പോര്‍ട്‌സിലും ജിയോ ഹോട്ട്സ്റ്റാറിലും മത്സരം തത്സമയം കാണാം. രണ്ട് മത്സരങ്ങളുടെ പരമ്പര 1-1 എന്ന നിലയിലാണ് ഇപ്പോള്‍.
