Cricket Homepage Featured Sports

ആഷസില്‍ ഇംഗ്ലണ്ടിനു മോശം തുടക്കം; മിന്നലായി സ്റ്റാര്‍ക്ക്, അപൂര്‍വനേട്ടങ്ങള്‍

ടെസ്റ്റ് ക്രിക്കറ്റ് എല്‍-ക്ലാസിക്കോയ്ക്ക് ഓസ്‌ട്രേലിയയിലെ പെര്‍ത്തില്‍ തുടക്കം. ഓസ്‌ട്രേലിയയും ഇംഗ്ലണ്ടും ഏറ്റുമുട്ടുന്ന ആഷസ് പരമ്പരയിലെ ഒന്നാം ടെസ്റ്റാണ് പെര്‍ത്തില്‍ നടക്കുന്നത്. അഞ്ച് മത്സരങ്ങളാണ് ടെസ്റ്റ് പരമ്പരയിലുള്ളത്.

ടോസ് ലഭിച്ചു ആദ്യം ബാറ്റ് ചെയ്യാന്‍ തീരുമാനിച്ച ഇംഗ്ലണ്ടിന്റെ തുടക്കം പാളി. ഒന്നാം ഇന്നിങ്‌സില്‍ 172 റണ്‍സിനു ഇംഗ്ലണ്ട് ഓള്‍ഔട്ട് ആകുകയായിരുന്നു. ഹാരി ബ്രൂക്ക് (61 പന്തില്‍ 52), ഒലി പോപ്പ് (58 പന്തില്‍ 46), ജാമി സ്മിത്ത് (22 പന്തില്‍ 33), ബെന്‍ ഡക്കറ്റ് (20 പന്തില്‍ 21) എന്നിവരൊഴികെ എല്ലാവരും രണ്ടക്കം കാണാതെ പുറത്തായി. സാക് ക്രൗലി (പൂജ്യം), ജോ റൂട്ട് (പൂജ്യം), ബെന്‍ സ്റ്റോക്‌സ് (ആറ്) എന്നിവര്‍ പൂര്‍ണമായി നിരാശപ്പെടുത്തി.

ഓസ്‌ട്രേലിയയ്ക്കായി പേസര്‍ മിച്ചല്‍ സ്റ്റാര്‍ 12.5 ഓവറില്‍ ഏഴ് വിക്കറ്റ് നേടി. സ്‌കോട്ട് ബോളണ്ടിനു രണ്ടും കാമറൂണ്‍ ഗ്രീനിനു ഒരു വിക്കറ്റും. സ്‌കോര്‍ ബോര്‍ഡില്‍ 39 റണ്‍സ് ആകുമ്പോഴേക്കും ഇംഗ്ലണ്ടിനു ആദ്യ മൂന്ന് വിക്കറ്റ് നഷ്ടമായിരുന്നു.

ഏഴ് വിക്കറ്റുകള്‍ നേടിയതിനൊപ്പം ആഷസ് പരമ്പരയില്‍ സ്വപ്‌ന നേട്ടങ്ങള്‍ കൈവരിക്കാനും സ്റ്റാര്‍ക്കിനു സാധിച്ചു. ആഷസില്‍ 100 വിക്കറ്റ് നേട്ടം സ്വന്തമാക്കിയിരിക്കുകയാണ് സ്റ്റാര്‍ക്ക്. 44.9 സ്ട്രൈക് റേറ്റോടെയാണ് താരത്തിന്റെ നേട്ടം. ഓസ്ട്രേലിയയുടെ ഗ്ലെന്‍ മഗ്രാത്ത് ആഷസില്‍ 157 വിക്കറ്റുകള്‍ നേടിയത് 46.3 സ്ട്രൈക് റേറ്റിലാണ്. ആഷസില്‍ ഏറ്റവും കുറഞ്ഞ സ്ട്രൈക് റേറ്റില്‍ 100 വിക്കറ്റ് നേട്ടം കൈവരിക്കാനും സ്റ്റാര്‍ക്കിനു സാധിച്ചു.

ടെസ്റ്റ് ക്രിക്കറ്റില്‍ ഇംഗ്ലണ്ടിനെതിരെ 100 വിക്കറ്റുകള്‍ നേടുന്ന ആദ്യ ഇടംകൈയന്‍ പേസര്‍ ആയിരിക്കുകയാണ് സ്റ്റാര്‍ക്ക്. 87 വിക്കറ്റുകളുമായി മിച്ചല്‍ ജോണ്‍സണ്‍ ആണ് രണ്ടാമത്.

പാറ്റ് കമ്മിന്‍സിന്റെ അഭാവത്തില്‍ സ്റ്റീവ് സ്മിത്താണ് ആഷസ് ഒന്നാം ടെസ്റ്റില്‍ ഓസ്‌ട്രേലിയയെ നയിക്കുന്നത്.

Related Posts