അഹമ്മദബാദിലെ നരേന്ദ്ര മോദി സ്റ്റേഡിയത്തില്‍ ഇന്ത്യന്‍ ക്രിക്കറ്റ് ആരാധകരുടെ കണ്ണുനീര്‍ വീണിട്ട് ഇന്നേക്ക് രണ്ട് വര്‍ഷം. 2023 ഏകദിന ലോകകപ്പ് ഫൈനലില്‍ ഓസ്‌ട്രേലിയയോടു ആറ് വിക്കറ്റിനു തോറ്റാണ് ഇന്ത്യയുടെ മൂന്നാം ഏകദിന ലോകകപ്പ് എന്ന സ്വപ്‌നം പൊലിഞ്ഞത്.
ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ നിശ്ചിത 50 ഓവറില്‍ 240 ന് ഓള്‍ഔട്ടായി. മറുപടി ബാറ്റിങ്ങില്‍ ഓസ്ട്രേലിയ നാല് വിക്കറ്റ് മാത്രം നഷ്ടപ്പെടുത്തി 43 ഓവറില്‍ ലക്ഷ്യം കണ്ടു. ഓസ്ട്രേലിയയ്ക്കായി ട്രാവിസ് ഹെഡ് സെഞ്ചുറി നേടി. 120 പന്തില്‍ 137 റണ്‍സാണ് ഹെഡ് നേടിയത്. 15 ഫോറുകളും നാല് സിക്സുകളും അടങ്ങിയതാണ് ഹെഡിന്റെ കിടിലന്‍ ഇന്നിങ്സ്. മാര്‍നസ് ലബുഷാനെ 110 പന്തില്‍ 58 റണ്‍സുമായി പുറത്താകാതെ നിന്നു.
ഇരു ടീമുകളുടെയും ഫൈനലിലേക്കുള്ള വരവ് വല്ലാത്ത വൈരുദ്ധ്യങ്ങളോടെയായിരുന്നു. ഒരിടത്ത് ആതിഥേയരായ ഇന്ത്യ ഗ്രൂപ്പ് സ്റ്റേജിലെ എല്ലാ മത്സരങ്ങളും ജയിച്ച് സെമിയും കടന്ന് ഫൈനലില്‍. ഫൈനല്‍ വരെ ഒരു തോല്‍വി പോലും വഴങ്ങിയില്ല. മറുവശത്ത് ഓസ്ട്രേലിയ സെമി കാണാതെ പുറത്താകുമെന്ന ഘട്ടത്തില്‍ വരെ എത്തിയവര്‍. ഗ്രൂപ്പ് സ്റ്റേജില്‍ ആദ്യ രണ്ട് മത്സരങ്ങളും തോറ്റ ശേഷമാണ് ഓസ്‌ട്രേലിയയുടെ തിരിച്ചുവരവ്. ഒരു ഘട്ടത്തില്‍ അവരേക്കാള്‍ ദുര്‍ബലരായ അഫ്ഗാനിസ്ഥാനോടു തോല്‍വി വഴങ്ങി പുറത്തായേക്കാമെന്ന ഘട്ടം വരെ എത്തിയിരുന്നു.
ഫൈനലില്‍ ഓപ്പണര്‍ ശുഭ്മാന്‍ ഗില്ലിനെ ഇന്ത്യക്ക് അതിവേഗം നഷ്ടമായെങ്കിലും നായകന്‍ രോഹിത് ശര്‍മ (31 പന്തില്‍ 47), വിരാട് കോലി (63 പന്തില്‍ 54) എന്നിവര്‍ ചേര്‍ന്ന് ഇന്ത്യയ്ക്കു വലിയ പ്രതീക്ഷകള്‍ നല്‍കിയതായിരുന്നു. ഇന്ത്യയുടെ സ്‌കോര്‍ 300 കടക്കുമെന്ന് പോലും ഒരുഘട്ടത്തില്‍ തോന്നി. എന്നാല്‍ പത്താം ഓവറിലെ നാലാം പന്തില്‍ ടീം ടോട്ടല്‍ 76 ല്‍ നില്‍ക്കെ രോഹിത്തിനെ നഷ്ടമായതോടെ ഇന്ത്യ പതറി തുടങ്ങി. തൊട്ടുപിന്നാലെ ശ്രേയസ് അയ്യര്‍ (മൂന്ന് പന്തില്‍ നാല്) കൂടാരം കയറി. മികച്ച ഫോമില്‍ ബാറ്റ് ചെയ്യുകയായിരുന്ന വിരാട് കോലി ഓസീസ് നായകന്‍ പാറ്റ് കമ്മിന്‍സിനു മുന്നില്‍ വീണു. കെ.എല്‍.രാഹുല്‍ മെല്ലെപ്പോക്ക് ഇന്നിങ്‌സിലൂടെ (107 പന്തില്‍ 66) പ്രതിരോധക്കോട്ട തീര്‍ത്തെങ്കിലും ഫലമുണ്ടായില്ല.
വിരാട് കോലിയും രോഹിത് ശര്‍മയും ഫൈനല്‍ തോല്‍വിക്കു ശേഷം അക്ഷരാര്‍ഥത്തില്‍ കരയുകയായിരുന്നു. ലോകകപ്പില്‍ ഉടനീളം മികച്ച പ്രകടനം കാഴ്ചവെച്ചിട്ടും ടീമിലെ കിരീടം ചൂടിക്കാന്‍ കഴിയാത്തതിന്റെ നിരാശ. വിരാട് കോലി 11 ഇന്നിങ്‌സുകളില്‍ നിന്ന് 95.62 ശരാശരിയോടെ 765 റണ്‍സ് നേടി ലോകകപ്പിലെ താരവും ടോപ് സ്‌കോററുമായി. രോഹിത് ശര്‍മ 11 ഇന്നിങ്‌സുകളില്‍ നിന്ന് 597 റണ്‍സുമായി രണ്ടാം സ്ഥാനത്തുണ്ടായിരുന്നു. എന്നാല്‍ വ്യക്തിഗത നേട്ടത്തിനും വലുതായിരുന്നു ഇരുവര്‍ക്കും രാജ്യത്തിനു ലോകകപ്പ് നേടിക്കൊടുക്കുക എന്ന സ്വപ്‌നം. 2027 ഏകദിന ലോകകപ്പിലേക്ക് അടുക്കുകയാണ്. വിരാട് കോലിയും രോഹിത് ശര്‍മയും ഇന്ത്യക്ക് വേണ്ടി ഒരു ലോകകപ്പ് കൂടി കളിക്കുമോ എന്ന ചോദ്യം ഉയരുന്ന സമയത്താണ് 2023 ഏകദിന ലോകകപ്പ് തോല്‍വിയുടെ രണ്ടാം വാര്‍ഷികം.
