ദക്ഷിണാഫ്രിക്കയ്‌ക്കെതിരായ ഒന്നാം ടെസ്റ്റിലെ തോല്‍വിക്കു പിന്നാലെ ഇന്ത്യന്‍ ക്രിക്കറ്റ് ടീമിനെ രൂക്ഷമായി വിമര്‍ശിച്ച് മുന്‍ താരം മുഹമ്മദ് കൈഫ്. ടീം മാനേജ്‌മെന്റിന്റെ നിലപാടുകളെ കൈഫ് ചോദ്യം ചെയ്തു. ഇന്ത്യന്‍ ടീമില്‍ എല്ലാവരും ഭയപ്പെട്ടാണ് കളിക്കുന്നതെന്നും കൈഫ് പറഞ്ഞു.
‘ കളിക്കുന്ന താരങ്ങളില്‍ ആര്‍ക്കും ടീമിലെ ആരെങ്കിലും തങ്ങള്‍ക്കുവേണ്ടി നിലകൊള്ളുന്നുണ്ടെന്ന വിശ്വാസമില്ല. ആരും ആരെയും പിന്തുണയ്ക്കാനില്ല, എല്ലാവരും പേടിച്ചാണ് കളിക്കുന്നത്. സ്വാതന്ത്ര്യത്തോടെ ആസ്വദിച്ച് ആരും ഈ ടീമില്‍ കളിക്കുന്നില്ല,’ കൈഫ് പറഞ്ഞു.
ടീം തിരഞ്ഞെടുപ്പിലെ പാളിച്ചകളും കൈഫ് ചോദ്യംചെയ്തു. ‘ ഒരു സെഞ്ചുറി നേടിയിട്ടും സര്‍ഫ്രാസ് ഖാന്റെ സ്ഥാനം ടീമില്‍ ഉറപ്പായിട്ടില്ല. ഒരു തിരിച്ചുവരവ് നടത്താനുള്ള സാധ്യത പോലും നല്‍കിയില്ല. സായ് സുദര്‍ശന്‍ കഴിഞ്ഞ കളിയില്‍ 87 റണ്‍സെടുത്തു. അതിനുശേഷമുള്ള ഈ ടെസ്റ്റില്‍ പ്ലേയിങ് ഇലവനില്‍ സ്ഥാനം നല്‍കിയില്ല. ഈ ടീമില്‍ എന്തൊക്കെയോ കുഴപ്പങ്ങളുണ്ട്. ഭയത്തോടെയാണ് എല്ലാവരും കളിക്കുന്നത് – കൈഫ് പറഞ്ഞു.
ഉള്ളില്‍ സുരക്ഷിതത്വം ഇല്ലാതിരിക്കുകയും പേടിക്കുകയും ചെയ്താല്‍ ഇത്തരം ടേണിങ് ട്രാക്കുകളില്‍ എങ്ങനെയാണ് കളിക്കാന്‍ സാധിക്കുക. എന്തുകൊണ്ടാണ് വാഷിങ്ടണ്‍ സുന്ദര്‍ നന്നായി കളിച്ചത് ? അവന്‍ വരുന്നത് ചെന്നൈയില്‍ നിന്നാണ്. സ്പിന്‍ പിച്ചുകളില്‍ കളിച്ച് നല്ല ശീലമുണ്ട്. സായ് സുദര്‍ശനും ചെന്നൈയില്‍ നിന്നുള്ള താരമാണ്. സായ് സുദര്‍ശന്‍ മൂന്നാമതും വാഷിങ്ടണ്‍ സുന്ദര്‍ എട്ടാമതും ആയിരുന്നെങ്കില്‍ ഈ കളി ഇന്ത്യ ജയിക്കുമായിരുന്നെന്നും കൈഫ് കൂട്ടിച്ചേര്‍ത്തു.
സ്പിന്നിനു അനുകൂലമായ കൊല്‍ക്കത്തയിലെ ഈഡന്‍ ഗാര്‍ഡന്‍സ് പിച്ചില്‍ സ്പിന്നര്‍മാരാണ് ദക്ഷിണാഫ്രിക്കയെ ജയത്തിലെത്തിച്ചത്. സ്പിന്‍ ബൗളര്‍മാരെ കളിക്കാന്‍ ഇന്ത്യന്‍ ബാറ്റര്‍മാര്‍ പാടുപെട്ടു. 30 റണ്‍സിനാണ് ഇന്ത്യയുടെ തോല്‍വി.
