മലയാളി താരവും ഐപിഎല്ലില്‍ രാജസ്ഥാന്‍ റോയല്‍സ് നായകനുമായ സഞ്ജു സാംസണ്‍ ചെന്നൈ സൂപ്പര്‍ കിങ്‌സിലേക്ക് കൂടുമാറുകയാണെന്ന വാര്‍ത്തകളാണ് ഇപ്പോള്‍ ക്രിക്കറ്റ് ലോകത്തെ ചര്‍ച്ച. തനിക്കു ഏറ്റവും പ്രിയപ്പെട്ട ഫ്രാഞ്ചൈസി വിടാന്‍ സഞ്ജു തീരുമാനിച്ചതു എന്തുകൊണ്ടായിരിക്കും? ഏറ്റവും വിശ്വസ്തനായി കണ്ടിരുന്ന താരത്തെ ട്രേഡിങ്ങില്‍ മറ്റൊരു ഫ്രാഞ്ചൈസിക്കു വിട്ടുകൊടുക്കാന്‍ മാത്രം രാജസ്ഥാനെ പ്രേരിപ്പിക്കുന്നത് എന്താണ്?
രാജസ്ഥാനും സഞ്ജുവും തമ്മിലുള്ള അഭിപ്രായ ഭിന്നത ആരംഭിക്കുന്നത് 2025 സീസണു മുന്നോടിയായി നടന്ന മെഗാ താരലേലത്തിനു പിന്നാലെയാണ്. ഇംഗ്ലണ്ട് താരം ജോസ് ബട്ലറെയും ഇന്ത്യന്‍ സ്പിന്നര്‍ യുസ്വേന്ദ്ര ചഹലിനെയും രാജസ്ഥാന്‍ മാനേജ്മെന്റ് റിലീസ് ചെയ്തതില്‍ സഞ്ജുവിനു അതൃപ്തിയുണ്ടായിരുന്നു. ഇരുവരെയും നിലനിര്‍ത്തണമെന്ന് സഞ്ജു ആവശ്യപ്പെട്ടിരുന്നെങ്കിലും ഫ്രാഞ്ചൈസി ക്യാപ്റ്റന്റെ ആവശ്യം ചെവികൊണ്ടില്ല.
2025 സീസണില്‍ പോയിന്റ് ടേബിളില്‍ ഒന്‍പതാം സ്ഥാനക്കാരായാണ് രാജസ്ഥാന്‍ ഫിനിഷ് ചെയ്തത്. ബട്ലറും ചഹലും ഉണ്ടായിരുന്നെങ്കില്‍ രാജസ്ഥാന്റെ പ്രകടനം മെച്ചപ്പെടുമായിരുന്നു എന്നാണ് സഞ്ജു വിശ്വസിക്കുന്നത്. നിലനിര്‍ത്തേണ്ട താരങ്ങളെ കുറിച്ച് മാനേജ്മെന്റിനു കൃത്യമായ പദ്ധതികളില്ലായിരുന്നെന്ന് സഞ്ജു കരുതുന്നു. ഇവിടെ നിന്നാണ് സഞ്ജുവും മാനേജ്മെന്റും തമ്മിലുള്ള സ്വരചേര്‍ച്ചക്കുറവ് ആരംഭിച്ചത്.
മാനേജ്മെന്റ് റിയാന്‍ പരാഗിനു നല്‍കുന്ന അമിത പ്രസക്തിയാണ് സഞ്ജുവിന്റെ നിരാശപ്പെടുത്തിയ മറ്റൊരു കാര്യം. പരാഗിനെ സ്ഥിരം ക്യാപ്റ്റനാക്കാന്‍ രാജസ്ഥാന്‍ മാനേജ്മെന്റ് ആഗ്രഹിക്കുന്നതായി നേരത്തെ ചില റിപ്പോര്‍ട്ടുകളുണ്ടായിരുന്നു. മറുവശത്ത് സഞ്ജുവിനു ക്യാപ്റ്റന്‍സി ഓഫര്‍ ചെയ്ത് ചെന്നൈ അടക്കമുള്ള ഫ്രാഞ്ചൈസികള്‍ അപ്പുറത്തുണ്ട്. ഈ സാഹചര്യത്തില്‍ കൂടിയാണ് സഞ്ജു രാജസ്ഥാന്‍ വിടുന്ന കാര്യം ആലോചിച്ചു തുടങ്ങിയത്.
യുവതാരം വൈഭവ് സൂര്യവന്‍ശിയുടെ ഉദയവും സഞ്ജുവിന്റെ ഫ്രാഞ്ചൈസി മാറ്റത്തിനുള്ള ആലോചനകള്‍ക്കു ബലം പകര്‍ന്നു. യശസ്വി ജയ്‌സ്വാളിനൊപ്പം സൂര്യവന്‍ശി ഓപ്പണറായാല്‍ ടീമിനു ഗുണം ചെയ്യുമെന്ന വിലയിരുത്തല്‍ രാജസ്ഥാന്‍ മാനേജ്‌മെന്റിനുള്ളില്‍ ഉണ്ട്. മാത്രമല്ല വൈഭവ് ഭാവിയിലേക്കുള്ള താരം കൂടിയാണ്. അങ്ങനെ വന്നാല്‍ സഞ്ജുവിനു ഓപ്പണര്‍ സ്ഥാനം നഷ്ടപ്പെടും. സൂര്യവന്‍ശിയെ സ്ഥിരം ഓപ്പണറാക്കാന്‍ മാനേജ്മെന്റ് ആഗ്രഹിക്കുന്നുണ്ടെന്ന് മനസിലാക്കി കൂടിയാണ് സഞ്ജു ടീം മാറ്റത്തെ കാര്യമായി എടുത്തത്.
മാത്രമല്ല സഞ്ജുവിനെ ‘വിശ്വസ്തന്‍’ ആയി കണ്ടിരുന്ന മാനേജ്‌മെന്റിനും താരത്തെ റിലീസ് ചെയ്യുന്നതില്‍ ബുദ്ധിമുട്ടില്ല എന്ന അവസ്ഥയിലേക്ക് കാര്യങ്ങള്‍ എത്തിയിട്ടുണ്ട്. നായകനായി പരാഗും ഓപ്പണറായി സൂര്യവന്‍ശിയും വിക്കറ്റ് കീപ്പറായി ധ്രുവ് ജുറലും ഉള്ളതിനാല്‍ സഞ്ജുവിന്റെ അസാന്നിധ്യം ടീമിന്റെ സന്തുലിതാവസ്ഥയെ ഒരുതരത്തിലും ബാധിക്കില്ലെന്നാണ് രാജസ്ഥാന്‍ മാനേജ്‌മെന്റിന്റെ വിലയിരുത്തല്‍.
