ക്വീന്‍സ്‌ലാന്‍ഡ്: ഓസ്ട്രേലിയക്കെതിരെയുള്ള നാലാം ട്വന്റി 20യിൽ 168 റണ്‍സ് വിജയലക്ഷ്യമുയര്‍ത്തി ഇന്ത്യ. നിശ്ചിത 20 ഓവറില്‍ എട്ട് വിക്കറ്റ് നഷ്ടത്തിലാണ് ഇന്ത്യ 167 റണ്‍സെടുത്തത്. 46 റണ്‍സെടുത്ത ഗില്ലാണ് ഇന്ത്യയുടെ ടോപ് സ്‌കോറര്‍. മൂന്ന് വിക്കറ്റ് വീതം വീഴ്ത്തിയ ആദം സാംപയും നതാന്‍ എല്ലിസും ഓസീസിന് രക്ഷകരായി. അഞ്ചുമത്സരങ്ങളടങ്ങിയ പരമ്പരയില്‍ ഒരു മത്സരം മഴ മൂലം ഉപേക്ഷിച്ചിരുന്നു. ഇരുടീമുകളും ഓരോ മത്സരം വിജയിച്ചിട്ടുണ്ട്.
ടോസ് നേടിയ ഓസിസ് ഇന്ത്യയെ ബാറ്റിങ്ങിനയക്കുകയായിരുന്നു. ഓപ്പണർമാരായി ഇറങ്ങിയ അഭിഷേക് ശര്‍മയും ശുഭ്മാന്‍ ഗില്ലും ചേര്‍ന്ന് 6 ഓവർ പിന്നിടുമ്പോൾ 49എന്ന നിലയിലെത്തിച്ചു. 28 റണ്‍സെടുത്ത അഭിഷേകിന്റെ വിക്കറ്റാണ് ഇന്ത്യക്ക് ആദ്യം നഷ്ടമായത്. തുടർന്ന വൺഡൗണായി ഇറങ്ങിയ ശിവം ദുബെ 18 പന്തില്‍ 22 റണ്‍സെടുത്ത് പുറത്തായി. ദുബെയുടെ വിക്കറ്റ് നഷ്ടപ്പെടുമ്പോൾ 88 റൺസ് എന്ന നിലയിലായിരുന്നു ഇന്ത്യ.
ക്യാപ്റ്റൻ സൂര്യകുമാർ യാദവുമായി ചേർന്ന് ശുഭ്മാൻ ഗിൽ ടീമിനെ നൂറുകടത്തി. 39 പന്തിൽ 46 റൺസെടുത്ത് ഗില്ലും കൂടാരം കയറി. ഗിൽ പുറത്താകുമ്പോൾ ടീം 121-3 എന്ന നിലയിലായിരുന്നു. സൂര്യ പത്തു പന്തിൽ 20 റൺസെടുത്ത് മടങ്ങി. സൂര്യക്ക് പിന്നാലെ ക്രീസിലെത്തിയ തിലക് വര്‍മ(5), ജിതേഷ് ശര്‍മ(3) എന്നിവര്‍ നിരാശപ്പെടുത്തി. വാഷിങ്ടണ്‍ സുന്ദറും അക്ഷര്‍ പട്ടേലും ചേര്‍ന്ന് ഇന്ത്യയെ 150 കടത്തി. ഒടുവിൽ 20 ഓവർ അവസാനിച്ചപ്പോൾ എട്ട് വിക്കറ്റ് നഷ്ടത്തിലായിരുന്നു ഇന്ത്യ 167 റണ്‍സെന്ന നിലയിലെത്തിയത്.
