ഇന്ത്യ-ഓസ്‌ട്രേലിയ ട്വന്റി 20 പരമ്പരയിലെ നാലാം മത്സരം നവംബര്‍ ആറ് വ്യാഴാഴ്ച നടക്കും. കരാര ഓവലിലെ ക്യൂന്‍സ് ലാന്‍ഡിലാണ് കളി. അഞ്ച് മത്സരങ്ങളുടെ പരമ്പര 1-1 എന്ന നിലയിലാണ് ഇപ്പോള്‍.
മൂന്നാം ടി20 യില്‍ പ്ലേയിങ് ഇലവനില്‍ നിന്ന് മാറ്റിനിര്‍ത്തിയ മലയാളി താരം സഞ്ജു സാംസണ്‍ ഇത്തവണയും പുറത്തിരിക്കേണ്ടിവരും. മൂന്നാം ടി20 യില്‍ ഇന്ത്യ ജയിച്ചതിനു പ്രധാന കാരണം ബാറ്റിങ് ഓര്‍ഡറില്‍ കൊണ്ടുവന്ന മാറ്റമാണ്. സഞ്ജുവിനെ മാറ്റി ജിതേഷ് ശര്‍മ പ്ലേയിങ് ഇലവനില്‍ എത്തിയത് ടീമിന്റെ മികച്ച പ്രകടനത്തിനു കാരണമായി.
ജിതേഷിന്റെ വരവോടെ പ്ലേയിങ് ഇലവന്‍ സന്തുലിതമായെന്നാണ് ടീം മാനേജ്മെന്റ് വിലയിരുത്തുന്നത്. മൂന്നാം ടി20 മത്സരത്തിലെ പ്ലേയിങ് ഇലവനെ നിലനിര്‍ത്താമെന്നാണ് പരിശീലകന്‍ ഗൗതം ഗംഭീറിന്റെ നിലപാട്. മൂന്നാം ടി20 യില്‍ ഏഴാമനായി ക്രീസിലെത്തിയ ജിതേഷ് 13 പന്തില്‍ പുറത്താകാതെ 22 റണ്‍സ് നേടി ടീമിന്റെ വിജയത്തില്‍ നിര്‍ണായക പങ്കുവഹിച്ചിരുന്നു. ജിതേഷിനെ പോലെ ഫിനിഷര്‍ മികവ് സഞ്ജുവിനു ഇല്ല. നിലവിലെ സാഹചര്യത്തില്‍ ടീമിനു ആവശ്യവും ജിതേഷിനെ പോലൊരു ഹാര്‍ഡ് ഹിറ്ററെയാണ്. ഇതെല്ലാം പരിഗണിച്ചാണ് നാലാം ട്വന്റി 20 മത്സരത്തിലും സഞ്ജുവിനെ പുറത്തിരുത്താന്‍ തീരുമാനിച്ചിരിക്കുന്നത്.
ഓപ്പണറായി 17 ഇന്നിങ്സുകളില്‍ നിന്ന് 178.8 സ്ട്രൈക് റേറ്റില്‍ 522 റണ്‍സുള്ള സഞ്ജു നോണ്‍ ഓപ്പണറായി ഇറങ്ങിയപ്പോള്‍ 26 ഇന്നിങ്സുകളില്‍ നിന്ന് നേടിയത് 111.2 സ്ട്രൈക് റേറ്റില്‍ 483 റണ്‍സ് മാത്രമാണ് നേടിയിട്ടുള്ളത്. അഭിഷേക് ശര്‍മ, ശുഭ്മാന്‍ ഗില്‍, സൂര്യകുമാര്‍ യാദവ്, തിലക് വര്‍മ എന്നിവര്‍ പ്ലേയിങ് ഇലവനില്‍ സ്ഥാനം ഉറപ്പിച്ചതിനാല്‍ ടോപ് ഓര്‍ഡറില്‍ സഞ്ജുവിനു ഒരു സാധ്യതയും ഇല്ല.
അതേസമയം നാലാം ടി20 മത്സരത്തില്‍ തിലക് വര്‍മ തിളങ്ങിയില്ലെങ്കില്‍ അഴസാന ടി 20 മത്സരത്തില്‍ സഞ്ജു പ്ലേയിങ് ഇലവനില്‍ എത്താനുള്ള സാധ്യതയുണ്ട്.
