വാഷിങ്ടൺ: എച്ച് 1 ബി വിസ പദ്ധതി പരിഷ്കരണത്തിന് തുടക്കമിട്ട് ഡോണൾഡ് ട്രംപ് ഭരണകൂടം. നിലവിൽ അപേക്ഷകരെയെല്ലാം തുല്യമായി പരിഗണിച്ചു കൊണ്ടുള്ള ലോട്ടറി സമ്പ്രദായത്തിലൂടെയാണ് വിസ അനുവദിച്ചിരുന്നത്. ഈ സമ്പ്രദായം നിർത്തലാക്കാനാണ് ട്രംപിന്റെ നിർദേശം. ലോട്ടറി സമ്പ്രദായത്തിന് പകരമായി യോഗ്യതയും ശമ്പളവും വൈദഗ്ധ്യവും കൂടുതലുള്ളവർക്ക് മുൻഗണന നൽകാനാണ് തീരുമാനം. ഇതിനായി വെയ്റ്റഡ് സെലക്‌ഷൻ രീതി നടപ്പിലാക്കും.
വെയ്റ്റഡ് സെലക്‌ഷൻ രീതിയുടെ അടിസ്ഥാനത്തിൽ പുതിയ ശമ്പള ബാൻഡുകൾ സൃഷ്ടിക്കും. ഏറ്റവും ഉയർന്ന ശമ്പളമുള്ളവരെ വിസക്കായി നാല് തവണ പരിഗണിക്കും. അതേസമയം വേതനം കുറവുള്ളവരെ ഒരു തവണ മാത്രമായിരിക്കും പരിഗണിക്കുക. ഈ പരിഷ്കാരം യുഎസ് സർവകലാശാലകളിൽ പഠിക്കുന്ന വിദേശ വിദ്യാർഥികൾക്ക് ഉൾപ്പടെ ഗുണം ചെയ്യുമെന്നാണ് വിലയിരുത്തപ്പെടുന്നത്. എച്ച് വൺ ബി വിസ സംബന്ധിച്ചുള്ള പുതിയ നിർദ്ദേശങ്ങൾ ആഗോള പ്രതിഭകളെ യുഎസ് സമ്പദ്‌വ്യവസ്ഥയിലേക്ക് ആകർഷിക്കാൻ വഴിയൊരുക്കുമെന്നാണ് മാനിഫെസ്റ്റ് ലോയിലെ പ്രിൻസിപ്പൽ ഇമിഗ്രേഷൻ അറ്റോർണി നിക്കോൾ ഗുണാര പറഞ്ഞു.
ട്രംപ് ഭരണകൂടത്തിന്റെ എച്ച് 1 ബി വിസ പരിഷ്കരണത്തിന് പിന്നാലെ ആഗോള പ്രതിഭകളെ ആകർഷിക്കാൻ യുകെ ഒരുങ്ങുന്നതായും റിപ്പോർട്ടുകൾ വന്നിരുന്നു. കെ വിസയുമായി ചൈന രംഗത്തെത്തിയതിനെ തുടർന്നാണ് എച്ച് 1 ബി വിസ പദ്ധതി പരിഷ്കരിക്കാൻ യുഎസ് ഭരണൂടം തീരുമാനമെടുത്തത്.
