ഗവർണർ ഒഴിവാക്കിയ ഭാ​ഗം അം​ഗീകരിച്ച് നിയമസഭ ; മന്ത്രിസഭ അം​ഗീകരിച്ച നയപ്രഖ്യാപനത്തിൽ മാറ്റം വരുത്തിയതിൽ വിമർശനവുമായി മുഖ്യമന്ത്രി

തിരുവനന്തപുരം: നയപ്രഖ്യാപന പ്രസം​ഗത്തിൽ ഗവർണർ ഒഴിവാക്കിയ ഭാ​ഗം അം​ഗീകരിച്ച് നിയമസഭ. മന്ത്രിസഭ അം​ഗീകരിച്ച നയപ്രഖ്യാപനത്തിൽ ചില ഭാ​ഗങ്ങൾ ഗവർണർ വെട്ടിമാറ്റിയിരുന്നു. ഈ ഭാ​ഗങ്ങളാണ് മുഖ്യമന്ത്രിയുടെ നിർദേശമനുസരിച്ച് നിയമസഭ അം​ഗീകരിച്ചത്.

നിയമസഭാ സമ്മേളനം ആരംഭിച്ച ആദ്യ ദിവസം തന്നെ ​ഗവർണറുടെ ഭാ​ഗത്ത് നിന്ന് അസാധാരണ നടപടിയാണ് ഉണ്ടായത്. മന്ത്രിസഭ അം​ഗീകരിച്ച നയപ്രഖ്യാപനത്തിൽ ​ഗവർണർ മാറ്റം വരുത്തി. കേന്ദ്രത്തിനെതിരെയുള്ള വിമർശനങ്ങളിൽ തിരുത്തൽ വരുത്തിയായിരുന്നു ​ഗവർണർ നയപ്രഖ്യാപനം സഭയിൽ അവതരിപ്പിച്ചത്.

എന്നാൽ ​ഗവർണർ വായിക്കാതെ വിട്ട ഭാ​ഗം മുഖ്യമന്ത്രി സഭയിൽ വായിച്ചു. ​ഗവർണർ നിയമസഭയെ അഭിസംബോധന ചെയ്ത് നടത്തിയ നയപ്രഖ്യാപന പ്രസം​ഗത്തിൽ ചില കൂട്ടിച്ചേർക്കലും ഒഴിവാക്കലും നടത്തിയതായി നിയമസഭാ അം​ഗങ്ങളുടേയും സ്പീക്കറുടേയും ശ്രദ്ധയിൽപ്പെട്ടിട്ടുണ്ടാകുമെന്ന് പറഞ്ഞ് മുഖ്യമന്ത്രി വിഷയം സഭയിൽ അവതരിപ്പിച്ചു. ഭരണഘടനയുടെ അന്തസ്സത്തയ്ക്കും സഭയുടെ കീഴ്വഴക്കങ്ങൾക്കും അനുസൃതമായി മന്ത്രിസഭ അം​ഗീകരിച്ച നയപ്രഖ്യാപനമാണ് നിലനിൽക്കുകയെന്ന് മുഖ്യമന്ത്രി വ്യക്തമാക്കി.

അനുഛേദം 176 പ്രകാരം ​ഗവർണർ ഒരു വർഷത്തെ ആദ്യ നിയമസഭാസമ്മേളനം ചേരുമ്പോൾ സഭയെ അഭിസംബോധന ചെയ്യാറുണ്ട്. ​ഗവൺമെന്റിന്റെ നയപ്രഖ്യാനമാണ് ​ഗവർണർ ഇതിൽ വായിക്കുന്നത്. ​ഗവർണർ മാറ്റം വരുത്തിയ മന്ത്രിസഭ അം​ഗീകരിച്ച 12, 15, 16 ഖണ്ഡികകൾ അതേപടി നിലനിൽക്കുന്നതാണെന്ന് മുഖ്യമന്ത്രി പ്രഖ്യാപിച്ചു. ഇതുസംബന്ധിച്ച് നിരവധി തവണ സ്പീക്കറുടെ റൂളിങ് ഉണ്ടായിട്ടുള്ളതാണെന്ന് മുഖ്യമന്ത്രി പറഞ്ഞു. തുടർന്നാണ് ഗവർണർ ഒഴിവാക്കിയ ഭാ​ഗം മുഖ്യമന്ത്രി പിണറായി വിജയൻ പൂർണമായും സഭയിൽ വായിച്ചത്.

നയപ്രഖ്യാപനത്തിൽ ഗവർണർ ഒഴിവാക്കിയ ഖണ്ഡിക 12, ഖണ്ഡിക 15 എന്നിവയിലെ ഭാ​ഗങ്ങൾ മുഖ്യമന്ത്രി സഭയിൽ വായിച്ചു. ഖണ്ഡിക 16 ൽ ചില വാക്കുകൾ കൂട്ടിച്ചേർത്തുവെന്നും മുഖ്യമന്ത്രി പറഞ്ഞു.

ഗവർണർ ഒഴിവാക്കിയ ഖണ്ഡിക 12 ലെ ഭാ​ഗം

ഇത്തരം സാമൂഹ്യവും സ്ഥാപനപരവുമായ നേട്ടങ്ങൾ കൈവരിച്ച് ഭരണഘടനാപരമായ തത്വങ്ങളെ ദുർബലപ്പെടുത്തുന്ന യൂണിയൻ ​ഗവൺമെന്റിന്റെ തുടർച്ചയായ പ്രതികൂല നടപടികളുടെ ഭാ​ഗമായി കേരളം ​ഗുരുതരമായ സാമ്പത്തിക ഞെരുക്കം അനുഭവിച്ചു കൊണ്ടിരിക്കുകയാണ്.

ഗവർണർ ഒഴിവാക്കിയ ഖണ്ഡിക 15 ലെ ഭാ​ഗം

സംസ്ഥാന നിയസഭകൾ പാസ്സാക്കിയ ബില്ലുകൾ ദീർഘകാലമായി കെട്ടിക്കിടക്കുകയാണ്. ഈ വിഷയങ്ങളിൽ രണ്ടു സർക്കാരുകൾ സുപ്രീംകോടതിയെ സമീപിക്കുകയും അവ നിലവിൽ ഭരണഘടനാ ബഞ്ചിന് റഫർ ചെയ്തിരിക്കുകയുമാണ്.

ഖണ്ഡിക 16 അതേപടി ​ഗവർണർ വായിച്ചെങ്കിലും ഇതോടൊപ്പം ചില വാക്കുകൾ കൂട്ടിച്ചേർത്തുവെന്നും മുഖ്യമന്ത്രി പറഞ്ഞു. ”എന്റെ സര്‍ക്കാര്‍ കരുതുന്നു” എന്ന് ഗവര്‍ണര്‍ കൂട്ടിച്ചേര്‍ത്തതായാണ് മുഖ്യമന്ത്രി പറയുന്നത്.

ഖണ്ഡിക 16

നികുതി വിഹിതവും ധനകാര്യ കമ്മിഷൻ ​ഗ്രാൻഡുകളും സംസ്ഥാനങ്ങളുടെ ഭരണഘടനാപരമായ അവകാശങ്ങളാകുന്നതും ഔദാര്യമല്ലാത്തതും ഈ ചുമതല ഏൽപ്പിക്കപ്പെട്ടിട്ടുള്ള ഭരണഘടനാ സ്ഥാപനങ്ങൾക്കുമേലുള്ള ഏതൊരു സമ്മർദ്ദവും ഫെഡറൽ തത്വങ്ങളെ ദുർബലപ്പെടുത്തുന്നതുമാണ്.