തൃശൂർ: ആധാറിന്റെ ഏറെക്കാലമായി തുടർന്നുവന്ന ലോഗോ മാറ്റാനൊരുങ്ങുകയാണ് കേന്ദ്രസർക്കാർ. മലയാളിയായ അരുൺ ഗോകുൽ ആണ് ലോഗോ ഡിസൈൻ ചെയ്തത്. 857 ഡിസൈനുകളെ പിന്തള്ളിയാണ് തൃശൂർ ചാലക്കുടി സ്വദേശിയായ അരുൺ ഗോകുലിന്റെ ഡിസൈൻ ആധാറിന്റെ ഔദ്യോഗിക ലോഗോ ആയി തെരഞ്ഞെടുക്കപ്പെട്ടത്.
വളരെ യാദൃശ്ചികമായാണ് താൻ മത്സരത്തിൽ പങ്കെടുത്തതെന്ന് അരുൺ പറയുന്നു.
തൃശൂരിലുള്ള ഒരു സുഹൃത്ത് വഴി മത്സരത്തെക്കുറിച്ച് അവസാന നിമിഷമാണ് അറിഞ്ഞതെന്ന് അരുൺ പറഞ്ഞു. ലളിതവും ചിരിക്കുന്ന മുഖവുമുള്ളതായിരിക്കണം ലോഗോ എന്നായിരുന്നു അരുണിന് കിട്ടിയ നിർദേശം. ഇതനുസരിച്ച് എല്ലാ പ്രായത്തിലുള്ളവർക്കും ഇഷ്ടം തോന്നുന്ന ലോഗോ ആധാറിനായി ഒരുക്കുകയായിരുന്നു അരുൺ. മെക്കാനിക്കൽ എൻജിനീയറായ അരുൺ മുൻപ് ചിത്രങ്ങൾ വരയ്ക്കാറുണ്ടായിരുന്നു. എന്നാൽ ഡിസൈനിങ്ങിൽ തനിക്ക് വലിയ പ്രവർത്തിപരിചയം ഇല്ലെന്നും അരുൺ പറയുന്നു.
ആദ്യമായാണ് ഇത്തരമൊരു മത്സരത്തിൽ പങ്കെടുത്തതെന്ന് അരുൺ ഗോകുൽ പറയുന്നു. താൻ ഡിസൈൻ ചെയ്ത ലോഗോ തെരഞ്ഞെടുക്കപ്പെട്ടതിൽ വലിയ സന്തോഷത്തിലാണ് താനെന്ന് അരുൺ ഗോകുൽ പറഞ്ഞു.
