മൈസൂരു: പ്രായപൂർത്തിയാകാത്ത പെൺകുട്ടികളെ ലൈംഗികവൃത്തിക്കായി വിൽപ്പനയ്ക്ക് വെച്ച സംഘം പിടിയിൽ. കർണ്ണാടകയിലെ മൈസൂരുവിലാണ് സെക്സ് റാക്കറ്റ് സംഘം പിടിയിലായത്. മൈസൂരു പൊലീസാണ് പ്രതികളെ അറസ്റ്റ് ചെയ്തത്. 20 ലക്ഷം രൂപയ്ക്കായിരുന്നു ആറാം ക്ലാസിൽ പഠിക്കുന്ന പെൺകുട്ടിയെ വിൽപ്പനയ്ക്ക് വെച്ചത്. നവമാധ്യമങ്ങളിലൂടെ പരസ്യം നൽകിയായിരുന്നു സെക്സ് റാക്കറ്റ് പ്രവർപ്പിച്ചിരുന്നത്.
കന്യകയായ പെൺകുട്ടികളുമായി ലൈംഗിക ബന്ധത്തിലേർപ്പെട്ടാൽ മാനസിക രോഗമടക്കമുള്ള രോഗങ്ങൾ ഭേദമാകുമെന്ന് വരെയുള്ള അന്ധവിശ്വാസങ്ങൾ സംഘം പ്രചരിപ്പിച്ചിരുന്നു. ഇത്തരത്തിൽ ഗുരുതര കുറ്റകൃത്യങ്ങളായിരുന്നു സംഘം നടത്തിക്കൊണ്ടിരുന്നത്. പെൺകുട്ടിയുടെ ചിത്രവും വീഡിയോയും വാട്സാപ്പ് വഴി ആവശ്യക്കാർക്ക് അയച്ചു കൊടുക്കുന്നതായിരുന്നു ഇവരുടെ രീതിയെന്നും പൊലീസ് പറഞ്ഞു. സംഭവത്തിന്റെ സത്യാവസ്ഥ അന്വേഷിക്കുന്നതിനായി സന്നദ്ധസംഘടനയിലെ ഒരംഗം ആവശ്യക്കാരനെന്ന വ്യജേന പ്രതികളിലൊരാളായ ശോഭ എന്ന സ്ത്രീയെ ബന്ധപ്പെട്ടു. സംഘം കുട്ടിയുടെ ചിത്രം അയച്ചു നൽകുകയും ശനിയാഴ്ച രണ്ടു മണിയോടെ കുട്ടിയെ എത്തിക്കാമെന്ന് അറിയിക്കുകയും ചെയ്തു. സംഘടനാ പ്രവർത്തകർ പൊലീസിനെ വിവരമറിയിക്കുകയും കുട്ടിയെ എത്തിക്കാനായി എത്തിയ ഇവരെ പിടി കൂടുകയുമായിരുന്നു.
പൊലീസ് പിടിയിലായപ്പോൾ ആറാം ക്ലാസുകാരി മകളാണെന്ന് പറഞ്ഞു. ശോഭയുടെ ഭർത്താവ് തുൾസി കുമാറിനേയും പൊലീസ് പിടികൂടിയിട്ടുണ്ട്. നിലവിൽ ശിശുക്ഷേമ പ്രവർത്തകരുടെ സംരക്ഷണയിലാണ് പെൺകുട്ടി. കർണാടക കേന്ദ്രീകരിച്ചുള്ള സെക്സ് റാക്കറ്റിൽ പ്രായപൂർത്തിയാകാത്ത പെൺകുട്ടികളും ഇരകളാകുന്നുണ്ടെന്നത് ഞെട്ടിക്കുന്നതാണ്.
