നവംബര്‍-ഡിസംബര്‍ മാസങ്ങളായി സംസ്ഥാനത്ത് തദ്ദേശ തിരഞ്ഞെടുപ്പ് നടക്കാന്‍ പോകുകയാണ്. കോണ്‍ഗ്രസ് നേതൃത്വം നല്‍കുന്ന യുഡിഎഫില്‍ തദ്ദേശ തിരഞ്ഞെടുപ്പിനുള്ള അനൗദ്യോഗിക ചര്‍ച്ചകള്‍ ആരംഭിച്ചു. സീറ്റ് വിഭജനമാണ് മുന്നണി നേരിടുന്ന പ്രധാന തലവേദന. ഘടകകക്ഷികളെ തൃപ്തിപ്പെടുത്തി മുന്നോട്ടു കൊണ്ടുപോകുകയാണ് പ്രധാന വെല്ലുവിളി.
വാര്‍ഡ് പുനര്‍വിഭജനത്തിന്റെ അടിസ്ഥാനത്തില്‍ തദ്ദേശ സ്ഥാപനങ്ങളിലേക്കുള്ള പുതിയ സീറ്റുകളെ കുറിച്ച് ചര്‍ച്ച ആരംഭിച്ചു. സംവരണ വാര്‍ഡുകള്‍ കണ്ടെത്താനുള്ള നറുക്കെടുപ്പിനു ശേഷം മാത്രമേ സീറ്റി വിഭജനത്തില്‍ അന്തിമ രൂപമാകൂ.
2025 തദ്ദേശ തിരഞ്ഞെടുപ്പ് കോണ്‍ഗ്രസിനെ സംബന്ധിച്ചിടുത്തോളം ജീവന്‍മരണ പോരാട്ടമാണ്. 2026 ല്‍ സംസ്ഥാനത്ത് അധികാരം തിരിച്ചുപിടിക്കണമെങ്കില്‍ തദ്ദേശ തിരഞ്ഞെടുപ്പില്‍ നേട്ടമുണ്ടാക്കേണ്ടത് അത്യാവശ്യമാണ്. തദ്ദേശ സ്ഥാപനങ്ങളില്‍ മുന്നണിക്കു നേട്ടമുണ്ടാക്കാന്‍ സാധിച്ചില്ലെങ്കില്‍ 2026 ല്‍ കാര്യങ്ങള്‍ കഠിനമാകും. വാര്‍ഡ് കമ്മിറ്റി രൂപീകരണം, കുടുംബസംഗമങ്ങള്‍ എന്നിവയിലൂടെ താഴെ തട്ടിലുള്ള ജനങ്ങളുമായി കൂടുതല്‍ അടുപ്പം പുലര്‍ത്താനാണ് കോണ്‍ഗ്രസ് സംസ്ഥാന നേതൃത്വത്തിന്റെ പ്രധാന പദ്ധതി. തര്‍ക്കമുണ്ടാകാതെ അതാത് വാര്‍ഡ് കമ്മിറ്റികള്‍ കൂട്ടായി വേണം സ്ഥാനാര്‍ഥികളെ തീരുമാനിക്കാനെന്നും സംസ്ഥാന നേതൃത്വം നിര്‍ദേശം നല്‍കിയിട്ടുണ്ട്.
മുസ്ലിം ലീഗിലും ത്വരിതഗതിയിലാണ് ഒരുക്കങ്ങള്‍ നടക്കുന്നത്. സീറ്റ് ചര്‍ച്ചകള്‍ പ്രാദേശിക തലത്തില്‍ നടത്തണമെന്നാണ് സംസ്ഥാന നേതൃത്വത്തിന്റെ നിര്‍ദേശം. കഴിഞ്ഞ തവണ മത്സരിച്ച എല്ലാ സീറ്റുകളും വേണമെന്ന പിടിവാശി മുസ്ലിം ലീഗിനില്ല. കോണ്‍ഗ്രസുമായി ചില സീറ്റുകള്‍ വച്ചുമാറാന്‍ തയ്യാറാണ്. പുതിയ സീറ്റുകളില്‍ ജയസാധ്യത നോക്കി മുസ്ലിം ലീഗിന് പ്രാതിനിധ്യം നല്‍കണമെന്നും ലീഗ് നേതൃത്വം കോണ്‍ഗ്രസ് നേതൃത്വത്തോടു ആവശ്യപ്പെട്ടും.
കഴിഞ്ഞ തവണ മത്സരിച്ച എല്ലാ സീറ്റുകളും ഇത്തവണയും വേണമെന്ന നിലപാടിലാണ് കേരള കോണ്‍ഗ്രസ് (പി.ജെ.ജോസഫ് വിഭാഗം), കേരള കോണ്‍ഗ്രസ് (ജേക്കബ് വിഭാഗം). മാത്രമല്ല പുനര്‍നിര്‍ണയത്തിലൂടെ വരുന്ന പുതിയ സീറ്റുകളില്‍ ജയസാധ്യതയുള്ള സീറ്റുകളിലും ഇരു പാര്‍ട്ടികളും കണ്ണുവയ്ക്കുന്നു.
കൊല്ലത്ത് ശ്രദ്ധ കേന്ദ്രീകരിക്കാനാണ് ആര്‍.എസ്.പിയുടെ തീരുമാനം. രണ്ട് ടേമിലും ഒരു എംഎല്‍എ പോലും ഇല്ലാത്തതിനാല്‍ ഇത്തവണത്തെ തദ്ദേശ തിരഞ്ഞെടുപ്പ് നിര്‍ണായകം. തദ്ദേശ തിരഞ്ഞെടുപ്പില്‍ നേട്ടമുണ്ടാക്കിയില്ലെങ്കില്‍ അടുത്ത നിയമസഭാ തിരഞ്ഞെടുപ്പില്‍ കോണ്‍ഗ്രസ് ‘ഹൈജാക്ക്’ ചെയ്യുമോ എന്ന പേടിയും ആര്‍.എസ്.പിക്കുണ്ട്. വടകര മണ്ഡലത്തിലെ മൂന്ന് പഞ്ചായത്തുകള്‍ക്കൊപ്പം കൂടുതല്‍ സീറ്റ് ആവശ്യപ്പെടാന്‍ ആര്‍.എം.പി പദ്ധതിയിടുന്നുണ്ട്. യുഡിഎഫിനൊപ്പം നിന്ന് കൂടുതല്‍ സീറ്റുകളില്‍ മത്സരിക്കാനാണ് തീരുമാനം. ജയസാധ്യതയുള്ള സീറ്റ് വേണമെന്ന നിലപാടിലാണ് സിഎംപിയും ഫോര്‍വേഡ് ബ്ലോക്കും. പരമ്പരാഗതമായി യുഡിഎഫ് തോല്‍ക്കുന്ന സീറ്റുകള്‍ നല്‍കി എണ്ണം തികയ്ക്കാന്‍ നോക്കിയാല്‍ അതിനോടു യോജിക്കില്ലെന്നും യുഡിഎഫിലെ മുസ്ലിം ലീഗ് ഒഴികെയുള്ള ഘടകകക്ഷികള്‍ നിലപാടെടുത്തിട്ടുണ്ട്.
