കൊച്ചി:എം എസ് സി എൽസ 3 കപ്പൽ കേരള തീരത്തിനടുത്ത് മുങ്ങിയ സംഭവത്തിൽ സംസ്ഥാന സർക്കാരിന് 1200.62 കോടിയുടെ നഷ്ടപരിഹാരം നൽകാൻ ഹൈക്കോടതി ഉത്തരവിട്ടു. പരിസ്ഥിതിക്കുണ്ടായ നാശവും സാമ്പത്തിക നഷ്ടവും കണക്കിലെടുത്താണ് ഉത്തരവ്. മേയ് 24 ന് കൊച്ചി തീരത്തിനു സമീപം എം എസ് സി എൽസ തകരുകയായിരുന്നു.
വിഴിഞ്ഞം തുറമുഖത്തു നിന്നു പുറപ്പെട്ട സൈബീരിയൻ ചരക്കു കപ്പലായ എം എസ് സി എൽസ 3 തീരത്തു നിന്ന് 38 നോട്ടിക്കൽ മൈൽ തെക്കു പടിഞ്ഞാറു ഭാഗത്തു വെച്ച് അപകടത്തിൽ പെട്ടു. കപ്പലിൽ നിന്നു വീണ കണ്ടൈനറുകളും വിനാശകാരികളായ പ്ലാസ്റ്റിക് അവശിഷ്ടങ്ങളും സമുദ്രത്തിൽ പരിസ്ഥിതി മലിനീകരണമുണ്ടാക്കി. തുടർന്ന് സംസ്ഥാനസർക്കാർ അഡ്മിറാലിറ്റി സ്യൂട്ട് ഫയൽ ചെയ്തു. ഇതിലാണ് സംസ്ഥാന സർക്കാരിന് 1200 കോടി നഷ്ടപരിഹാരം നൽകാൻ ഉത്തരവിട്ടിരിക്കുന്നത്.
9531 കോടി രൂപയുടെ നഷ്ടപരിഹാരം ആവശ്യപ്പെട്ടായിരുന്നു സംസ്ഥാന സർക്കാർ കോടതിയെ സമീപിച്ചത്. 14.5 കിലോ മീറ്റർ ദൂരത്തായതിനാൽ കേരള സർക്കാരിന് അഡ്മിറാലിറ്റി സ്യൂട്ട് ഫയൽ ചെയ്യാൻ അവകാശമില്ലെന്നായിരുന്നു കമ്പനിയുടെ വാദം. സർക്കാർ ആവശ്യപ്പെട്ടിരിക്കുന്ന നഷ്ടപരിഹാരം യാഥാർത്ഥ്യത്തിനു നിരക്കാത്തതാണെന്നും കമ്പനി വാദിച്ചിരുന്നു. എന്നാൽ സംസ്ഥാന സർക്കാരിന്റെ വാദങ്ങൾ ഭാഗികമായി അംഗീകരിച്ച് ഹൈക്കോടതി ജസ്റ്റിസ് എം എ അബ്ദുൾ ഹക്കീം നഷ്ടപരിഹാരം നൽകാൻ ഉത്തരവിട്ടു.
184 മീറ്റർ നീളവും 26 മീറ്റർ വീതിയുമുള്ളതായിരുന്നു കപ്പൽ. കപ്പലിലുണ്ടായ 24 പേരെയും രക്ഷപ്പെടുത്തി. 640 കണ്ടൈനറുകളാണ് കപ്പലിലുണ്ടായിരുന്നത്. അപകടത്തെത്തുടർന്ന് കണ്ടൈനറുകളിലുണ്ടായിരുന്ന കാൽസ്യം കാർബൈഡ് ഉൽപ്പെടെയുള്ള രാസവസ്ഥുക്കൾ സമുദ്രത്തിൽ കലർന്നു. തുടർന്ന് സംഭവത്തെ സംസ്ഥാന ദുരന്തമായി കേരള സർക്കാർ പ്രഖ്യാപിക്കുകയും ചെയ്തിരുന്നു.
