ദുബായ്: മാൾ ഓഫ് ദി എമിറേറ്റ്‌സിനടുത്തുള്ള അൽ ബർഷ പ്രദേശത്തെ 14 നിലയുള്ള റെസിഡൻഷ്യൽ കെട്ടിടത്തിൽ ചൊവ്വാഴ്ച ഉച്ചകഴിഞ്ഞ് ഉണ്ടായ തീപിടുത്തം ദുബായ് സിവിൽ ഡിഫൻസ് നിയന്ത്രണവിധേയമാക്കി. മുന്നറിയിപ്പ് ലഭിച്ച് ആറ് മിനിറ്റിനുള്ളിൽ അഗ്നിശമന സേന സ്ഥലത്തെത്തി തീയണച്ചു. തീ അണയ്ക്കുന്നതിനായി ‘ഷഹീൻ ഡ്രോണുകൾ’ ആണ് സിവിൽ ഡിഫൻസ് വിന്യസിച്ചത്. അംബരചുംബികളായ കെട്ടിടങ്ങളിലെ തീപ്പിടിത്തം നിയന്ത്രിക്കുന്നതിനുള്ള സാങ്കേതികവിദ്യയുടെ വിപ്ലവകരമായ മുന്നേറ്റമാണ് ഷഹീൻ ഡ്രോണുകൾ.
200 മീറ്റർ വരെ ഉയരമുള്ള കെട്ടിടങ്ങളിൽ തീ അണയ്ക്കാൻ കഴിയുന്നവയാണ് ഈ ഡ്രോണുകൾ. 1200 ലിറ്റർ ശേഷിയുള്ള ടാങ്ക് ഇതിനോട് ബന്ധിപ്പിക്കാനാവും. തീ അണയ്ക്കുന്നതിനുള്ള വെള്ളമോ, ഫോമോ ഉപയോഗിച്ച് ഈ ഡ്രോണുകൾക്ക് തീ അണയ്ക്കാൻ കഴിയും. തീ അണയ്ക്കുന്നതിനുള്ള വെള്ളമോ, അല്ലെങ്കിൽ ഫോമോ ഉപയോഗിച്ച് അതിവേഗത്തിൽ ആകാശത്തുനിന്നുള്ള പിന്തുണ നൽകാൻ ഷഹീൻ ഡ്രോണുകൾക്ക് കഴിയും. ഈ അത്യാധുനിക സാങ്കേതികവിദ്യയുടെ ഉപയോഗം, ഉയർന്ന കെട്ടിടങ്ങളിലെ അപകടകരമായ തീപ്പിടിത്തങ്ങൾ കൂടുതൽ ഫലപ്രദമായി നേരിടാൻ സിവിൽ ഡിഫൻസിനെ സഹായിക്കുന്നു. ഇത് രക്ഷാപ്രവർത്തകർക്ക് ഉണ്ടാകാൻ സാധ്യതയുള്ള അപകടസാധ്യതകളും കുറയ്ക്കുന്നു.
അപകടത്തിൽ ആളപായമൊന്നും റിപ്പോർട്ട് ചെയ്തിട്ടില്ലെന്ന് അധികൃതർ സ്ഥിരീകരിച്ചു. തീപിടുത്തമുണ്ടായ സാലിഹ് ബിൻ ലഹേജ് കെട്ടിടം, മാൾ ഓഫ് ദി എമിറേറ്റ്‌സിൽ നിന്ന് ഏതാനും മീറ്റർ അകലെയാണ് സ്ഥിതി ചെയ്യുന്നത്, കഴിഞ്ഞ വർഷം ഡിസംബർ 30 ന് തീപിടുത്തമുണ്ടായ ഒരു റെസിഡൻഷ്യൽ ബ്ലോക്കിനോട് ചേർന്നാണ് ഇത് സ്ഥിതിചെയ്യുന്നത്. സമീപ മാസങ്ങളിൽ ഈ പ്രദേശത്ത് നിരവധി തീപിടുത്ത സംഭവങ്ങൾ ഉണ്ടായിട്ടുണ്ട്. മെയ് 13 ന് ഗ്യാസ് ചോർച്ചയെ തുടർന്ന് സമീപത്തുള്ള 13 നിലകളുള്ള അൽ സറൂണി കെട്ടിടത്തിൽ തീപിടുത്തമുണ്ടായി , ഇത് നിരവധി സ്ഥാപനങ്ങൾ ദീർഘകാലത്തേക്ക് അടച്ചുപൂട്ടാൻ കാരണമായി. ഷഹീൻ ഡ്രോണുകളുടെ കടന്നുവരവോടെ ബഹുനില കെട്ടിടങ്ങളിലെ തീപിടുത്തം സംബന്ധിച്ച അപകടങ്ങൾ വളരെ വേഗം മറികടക്കാൻ സാധിക്കുമെന്ന് സിവിൽ ഡിഫൻസ് അധികൃതർ വ്യക്തമാക്കി.
