ന്യൂഡൽഹി: ട്രംപിന്റെ യുഎസ് ഭരണകൂടം എച്ച് വൺ ബി വിസ ഫീസ് വധിപ്പിച്ചതിന് പിന്നാലെ ഇന്ത്യൻ തൊഴിലാളികളെ സ്വാഗതം ചെയ്ത് ജർമനി. കഴിഞ്ഞദിവസം സാമൂഹികമാധ്യമമായ എക്സിൽ പോസ്റ്റ് ചെയ്ത വീഡിയോയിലൂടെ ഉയർന്ന വൈദഗ്ധ്യമുള്ള ഇന്ത്യക്കാരെ ജർമനിയിലേക്ക് സ്വാഗതം ചെയ്യുകയായിരുന്നു ഇന്ത്യയിലെ ജർമൻ സ്ഥാനപതിയായ ഡോ. ഫിലിപ്പ് അക്കേർമാൻ. സ്വാഗതം ചെയ്തതിനൊപ്പം ജർമനിയിലെ തൊഴിലവസരങ്ങൾ വിശദീകരിക്കുകയും ഒരു രാത്രി കൊണ്ട് മാറുന്നതല്ല ജർമനിയിലെ നിയമങ്ങൾ എന്ന് പറഞ്ഞ് ട്രംപിനെ പരിഹസിക്കുകയും ചെയ്തു.
”ജർമനിയിൽ ജോലിചെയ്യുന്ന ഇന്ത്യക്കാരേക്കുറിച്ച് സംസാരിക്കാനുള്ള നല്ല നിമിഷമാണിത്. ജർമനിയിൽ ഏറ്റവുംകൂടുതൽ സമ്പാദിക്കുന്നവരിൽ ഇന്ത്യക്കാരുമുണ്ട്. ജർമനിയിൽ ജോലിചെയ്യുന്ന ശരാശരി ഇന്ത്യക്കാരൻ ശരാശരി ജർമൻ തൊഴിലാളിയെക്കാൾ കൂടുതൽ വരുമാനം നേടുന്നു. നമ്മുടെ സമൂഹത്തിനും അതിന്റെ ക്ഷേമത്തിനും ഇന്ത്യക്കാർ വലിയ സംഭാവന നൽകുന്നു എന്നതാണ് ഈ ഉയർന്ന ശമ്പളം വാങ്ങുന്നതിന്റെ അർഥം. ഞങ്ങൾ കഠിനാധ്വാനത്തിലും മികച്ച ആളുകൾക്ക് മികച്ച ജോലികൾ നൽകുന്നതിലും വിശ്വസിക്കുന്നു.
ഞങ്ങളുടെ കുടിയേറ്റ നയം ഒരു ജർമൻ കാറിനെപ്പോലെയാണ് പ്രവർത്തിക്കുന്നത്. അത് വിശ്വസനീയവും ആധുനികവുമാണ്. അത് അങ്ങോട്ടും ഇങ്ങോട്ടും തിരിയാതെ ഒരു നേർരേഖയിൽ പോകും. ഉയർന്ന വേഗത്തിൽ പോകുമ്പോൾ ബ്രേക്കിടേണ്ടിവരുമെന്ന് നിങ്ങൾ ഭയപ്പെടേണ്ടതില്ല. ഒരു രാത്രി കൊണ്ട് ഞങ്ങൾ ഞങ്ങളുടെ നിയമങ്ങൾ മാറ്റില്ല. ഉയർന്ന വൈദഗ്ധ്യമുള്ള ഇന്ത്യക്കാരെ ഞങ്ങൾ ജർമനിയിലേക്ക് സ്വാഗതംചെയ്യുന്നു” അക്കേർമാൻറെ എക്സിലെ വീഡിയോയിൽ പറയുന്നു.
ഐടി, മാനേജ്‌മെന്റ്, സയൻസ്, ടെക് മേഖലകളിൽ ഇന്ത്യക്കാർക്കുള്ള തൊഴിലവസരങ്ങൾ, സ്ഥിരതയാർന്ന കുടിയേറ്റ നയങ്ങൾ എന്നിവയുള്ളതിനാൽ ജർമനി വേറിട്ടുനിൽക്കുന്ന രാജ്യമാണെന്നും അദ്ദേഹം എക്സിൽ കുറിച്ചു.
സെപ്റ്റംബർ 19ന് ആണ് ട്രംപ് ഭരണകൂടം എച്ച് വൺ ബി വിസ ഫീസ് ഒരുലക്ഷം ഡോളറായി ഉയർത്തിയത്. നേരത്തെ 1700നും 4500 ഡോളറിനും ഇടയിലായിരുന്നു ഈ ഫീസ്. ഇന്ത്യയിൽ നിന്നുള്ള ടെക്ക് പ്രൊഫഷണലുകൾ ഉൾപ്പടെയുള്ളവർക്ക് വൻ തിരിച്ചടിയാകുന്നതാണ് യുഎസിന്റെ എച്ച് വൺ ബി വിസ ഫീസ് ഉയർത്തിക്കൊണ്ടുള്ള തീരുമാനം. എച്ച് വൺ ബി വിസകൾ ഏറ്റവും കൂടുതൽ ലഭിക്കുന്നത് ഇന്ത്യക്കാർക്കാണ്. കഴിഞ്ഞ മൂന്ന് വർഷത്തിനിടയിൽ ആകെ അനുവദിച്ച എച്ച് വൺ ബി വിസകളിൽ 73 ശതമാനവും ഇന്ത്യക്കാർക്കായിരുന്നു. ഈ സാഹചര്യത്തിൽ ഇന്ത്യക്കാരെ സ്വാഗതം ചെയ്ത് ജർമനി രംഗത്തെത്തിയത് ശ്രദ്ധേയമാണ്.
