ന്യൂഡൽഹി: 90 മിനുട്ടിലേറെ വിമാനത്തിന്റെ ലാൻഡിങ് ഗിയർ കമ്പാർട്ടുമെന്റിനുള്ളിൽ ഒളിച്ചു യാത്ര ചെയ്ത് ബാലൻ ഡൽഹി വിമാനത്താവളത്തിലെത്തി. 13 വയസ്സ് പ്രായമുള്ള അഫ്ഗാനിസ്ഥാനിലെ കുണ്ടൂസ് സ്വദേശിയാണ് ബാലൻ. ഇറാനിലേക്ക് പോകാനാണ് കുട്ടി വിമാനത്തിൽ കയറിപ്പറ്റിയതതെന്ന് ദേശീയ മാധ്യമങ്ങൾ റിപ്പോർട്ടു ചെയ്യുന്നു.
സാധാരണ നടക്കാറുള്ള പരിശോധനയ്ക്കിടയിലാണ് വിമാനത്താവളത്തിലെ ജീവനക്കാർ കുട്ടിയെ കണ്ടെത്തിയത്. തുടർന്ന് കുട്ടിയെ സുരക്ഷാ ചുമതലയിലുണ്ടായിരുന്ന സി ഐ എസ് എഫ് ഉദ്യോഗസ്ഥർക്ക് കൈമാറി. വെളുത്ത പൈജാമയായിരുന്നു കുട്ടിയുടെ വേഷം. 94 മിനുട്ടാണ് ബാലൻ ഇത്തരത്തിൽ യാത്ര ചെയ്തത്. ചുവന്ന നിറത്തിലുള്ള ഒരു ഓഡിയോ സ്പീക്കർ മാത്രമാണ് കുട്ടിയിൽ നിന്നു കണ്ടെത്തിയത്. കുട്ടിയെ ഇമിഗ്രേഷൻ വിഭാഗം ഉദ്യോഗസ്ഥർ വിശദമായി ചോദ്യം ചെയ്തു.
ഇങ്ങനെ യാത്ര ചെയ്തവർ സാധാരണ ജീവനോടെ രക്ഷപ്പെടാറില്ലെന്നാണ് വിദഗ്ധർ പറയുന്നത്. 1996 ൽ പ്രദീപ് സെയ്നി വിജയ് സെയ്നി എന്നിങ്ങനെ പേരുള്ള 22 ഉം 19 ഉം വയസ്സുള്ള രണ്ടു സഹോദരങ്ങൾ ബ്രീട്ടീഷ് എയർവേയ്സിൽ ഡൽഹിയിൽ നിന്ന് ലണ്ടനിലേക്ക് യാത്ര ചെയ്തിരുന്നു. പ്രദീപ് സെയ്നി ലണ്ടനിൽ എത്തിയെങ്കിലും വിജയ് സെയ്ലി അവിടെ എത്തിയപ്പോഴേക്കും മരിച്ചിരുന്നു.
ഇത്ര ദൂരം അപകടകരമായ രീതിയിൽ എങ്ങനെ യാത്ര ചെയ്യാൻ കഴിഞ്ഞുവെന്നത് അത്ഭുതമായാണ് അധികൃതർ കാണുന്നത്. ഞായറാഴ്‍ച കാബൂളിൽ നിന്ന് പുറപ്പെട്ട ആർ ക്യു 4401 എന്ന വിമാനത്തിലാണ് ബാലൻ രഹസ്യമായി യാത്ര ചെയ്തത്. കാം എയർ കമ്പനിയുടേതാണ് വിമാനം.
