പമ്പ: ശബരിമലയുടെ സമഗ്രവികസനം ലക്ഷ്യമിട്ടുകൊണ്ടാണ് സർക്കാർ കഴിഞ്ഞ ദിവസം ആഗോള അയ്യപ്പ സംഗമം സംഘടിപ്പിച്ചത്. ശബരിമലയ്ക്കൊപ്പം തന്നെ പമ്പ, നിലയ്ക്കൽ, പരമ്പരാഗത പാത എന്നിവയുടെ സമഗ്രവികസനമാണ് മാസ്റ്റർപ്ലാനിൽ ഉൾക്കൊള്ളിച്ചിരിക്കുന്നത്. 2050 വരെയുള്ള വികസന സാധ്യതകള്‍ മുന്നില്‍ക്കണ്ടു കൊണ്ടാണ് കാര്യങ്ങള്‍ നീക്കുന്നതെന്നാണ് അയ്യപ്പ സംഗമ വേദിയിൽ മുഖ്യമന്ത്രി പിണറായി വിജയൻ പറഞ്ഞത്.
ശബരിമല സന്നിധാനത്തന്റെ വികസനത്തിനായി 2022-2027 വരെയുള്ള ആദ്യ ഘട്ടത്തിന് 600.47 കോടി രൂപയും, 2028-2033 വരെയുള്ള രണ്ടാം ഘട്ടത്തിന് 100.02 കോടി രൂപയും 2034-2039 വരെയുള്ള മൂന്നാം ഘട്ടത്തിന് 77.68 കോടി രൂപയും ഉള്‍പ്പെടെ, ആകെ 778.17 കോടി രൂപയാണ് ലേ ഔട്ട് പ്ലാന്‍ പ്രകാരം ചെലവ് കണക്കാക്കിയിരിക്കുന്നത്.
ലേ ഔട്ട് പ്ലാന്‍ പ്രകാരം പമ്പയുടെ വികസനത്തിനായി 2022-2027 വരെയുള്ള ആദ്യ ഘട്ടത്തിന് 184.75 കോടി രൂപയും 2028-2033 വരെയുള്ള രണ്ടാം ഘട്ടത്തിന് 22.73 കോടി രൂപയും ഉള്‍പ്പെടെ ആകെ 207.48 കോടി രൂപയും, ട്രെക്ക് റൂട്ടിന്റെ വികസനത്തിനായി 2022-2025 വരെയുള്ള ആദ്യ ഘട്ടത്തിന് 32.88 കോടി രൂപയും 2024-2026 വരെയുള്ള രണ്ടാം ഘട്ടത്തിന് 15.09 കോടി രൂപയും ഉള്‍പ്പെടെ ആകെ 47.97 കോടി രൂപയും ഉൾക്കൊള്ളിച്ചിരിക്കുന്നു.
സന്നിധാനം, പമ്പ, ട്രെക്ക് റൂട്ട് എന്നിവയുടെ വികസനത്തിനായി ലേ ഔട്ട് പ്ലാനുകള്‍ പ്രകാരം ആകെ ചെലവ് കണക്കാക്കിയിരിക്കുന്നത് 1,033.62 കോടി രൂപയാണ്. ശബരിമല മാസ്റ്റര്‍പ്ലാനില്‍ ഉള്‍പ്പെടുത്തി 2025-2030 കാലയളവില്‍ 314.96 കോടി രൂപയുടെ പദ്ധതികളും മാസ്റ്റർ പ്ലാനിന്റെ ഭാഗമാണ്. ഇങ്ങനെ ആകെ 1,033.62 കോടി രൂപയുടെ വികസന പദ്ധതികളാണ് ശബരിമലയ്ക്കായി ആസൂത്രണം ചെയ്തിരിക്കുന്നത്.
സുപ്രധാന മാറ്റങ്ങൾ
ക്ഷേത്രത്തിനോടു ചേർന്നുള്ള അപ്പം, അരവണ നിർമാണശാല മാറ്റി സ്ഥാപിക്കും. ആഴിക്കു സമീപമുള്ള പ്രസാദ മണ്ഡപത്തിനോടു ചേർന്നാണ് പുതിയ ശാല.
ആസൂത്രണം ഇല്ലാതെ നിർമിച്ച സന്നിധാനത്തെ എല്ലാ കെട്ടിടങ്ങളും ഘട്ടംഘട്ടമായി പൊളിക്കണം.
കാൽനടയായി തീർഥാടകർ സഞ്ചരിക്കുന്ന വഴിയിലൂടെയുള്ള ട്രാക്ടർ, ഡോളി, ആംബുലൻസ് യാത്ര ഒഴിവാക്കണം. പ്രത്യേക പാത ഒരുക്കണം.
30,000 തീർ‍ഥാടകർക്ക് മകരജ്യോതി ദർശനത്തിനായി കാത്തിരിക്കാനുള്ള പ്രത്യേക സ്ഥലം ഒരുക്കണം.
പമ്പ ഹിൽടോപ് പാർക്കിങ് ഗ്രൗണ്ടിൽനിന്നു ഗണപതി കോവിലിലേക്കു സുരക്ഷാ പാലം
