വാഷിംഗ്ടൺ: ഇന്ത്യൻ ടെക്ക് കമ്പനികൾക്ക് തിരിച്ചടിയായി എച്ച് വൺ ബി വിസയുടെ അപേക്ഷ ഫീസ് കുത്തനെ വർധിപ്പിച്ച് അമേരിക്കൻ പ്രസിഡന്റ് ഡോണൾ‍ഡ് ട്രംപ്. നിലവിൽ 1700നും 4500 ഡോളറിനും ഇടയിലായിരുന്ന ഫീസാണ് ഒരു ലക്ഷം ഡോളർ ആയി ഉയർത്തിയത്. ഇന്ത്യൻ ഐടി പ്രൊഫഷനലുകൾക്കും ചെറുകിട കമ്പനികൾക്കും ഈ ഫീസ് താങ്ങാനാകാത്തതാണ്. എന്നാൽ, അമേരിക്കക്കാർക്ക് ടെക്നോളജി രംഗത്ത് അവസരങ്ങൾ വർദ്ധിപ്പിക്കാനുള്ള നടപടിയായാണ് ഫീസിൽ വർധനവ് വരുത്തിയത് എന്ന് ട്രംപ് പ്രതികരിച്ചു.
വിദ്യാഭ്യാസവും പരിശീലനവും വൈദഗ്ധ്യവും ആവശ്യമുള്ള തൊഴിൽ മേഖലകളിൽ വിദേശത്ത് നിന്നുള്ള പ്രഫഷണലുകളെ നിയമിക്കാൻ അനുവദിക്കുന്ന നോൺ-ഇമിഗ്രന്റ് വിസയാണ് എച്ച് വൺ ബി. എഞ്ചിനീയറിംഗ്, വിവരസാങ്കേതികവിദ്യ, ശാസ്ത്രം, ഫിനാൻസ്, വൈദ്യശാസ്ത്രം തുടങ്ങിയ തൊഴിൽ മേഖലകളിലാണ് ഇത് ഉപയോഗിക്കുന്നത്. അമേരിക്കയിലെ തൊഴിലുടമകളാണ് ഈ വിസക്ക് അപേക്ഷിക്കുന്നത്.
“ഉയർന്ന വൈദഗ്ധ്യമുള്ള ജോലികൾക്കായി ഏറ്റവും മികച്ച വിദേശ ഉദ്യോഗാർഥികളെ കൊണ്ടുവരാനാണ് എച്ച് വൺ ബി വിസ നൽകുന്നതിലൂടെ ഉദ്ദേശിക്കുന്നത്. എന്നാൽ, വർഷം 60,000 ഡോളർ വരെ കുറഞ്ഞ ശമ്പളത്തിൽ ജോലി ചെയ്യാൻ തയ്യാറുള്ള വിദേശ തൊഴിലാളികളെ എത്തിക്കാനുള്ള ഒരു മാർഗ്ഗമായി ഇതു മാറി. സാങ്കേതികവിദ്യാ തൊഴിലാളികൾക്ക് സാധാരണയായി യു.എസ്. നൽകുന്ന 1,00,000ൽ പരം ഡോളർ ശമ്പളത്തേക്കാൾ വളരെ കുറവാണ് വിസ ഫീസ്.” ട്രംപ് പറഞ്ഞു, ഈ തീരുമാനത്തെ ടെക് വ്യവസായം എതിർക്കില്ലെന്നും അവർ വളരെ സന്തുഷ്ടരായിരിക്കുമെന്നും അദ്ദേഹം കൂട്ടിചേർത്തു.
മൂന്ന് വർഷത്തെ കാലാവധിയുള്ള എച്ച് വൺ ബി വിസ പിന്നീട് കാലാവധി നീട്ടാനും സാധിക്കുന്നതാണ്. എച്ച് വൺ ബി വിസകൾ ഏറ്റവും കൂടുതൽ ലഭിക്കുന്നത് ഇന്ത്യക്കാർക്ക് ആയതിനാൽ ഇതിൽ കനത്ത തിരിച്ചടി ലഭിക്കുന്നതും ഇന്ത്യാക്കാർക്ക് തന്നെയാകും. കഴിഞ്ഞ മൂന്ന് വർഷത്തിനിടയിൽ ആകെ അനുവദിച്ച എച്ച് വൺ ബി വിസകളിൽ 73 ശതമാനവും ഇന്ത്യക്കാർക്കായിരുന്നു.
