മുംബൈ: ഇന്ത്യയും പാകിസ്ഥാനും തമ്മിലുള്ള ക്രിക്കറ്റ് മത്സരത്തിനെതിരെ രാജ്യ വ്യാപകമായ വിമർശനം ഉയർന്നു. പഹൽഗാം ഭീകരാക്രമണത്തിലെ ഇരകളോടും അതിർത്തിയിൽ ജീവൻ നഷ്ടപ്പെട്ട ഇന്ത്യൻ സൈനികരോടും ഉള്ള അപമാനമാണിതെന്ന് പ്രതിപക്ഷ പാർട്ടികൾ ആരോപിച്ചു.
ഭീകരത അവസാനിക്കുന്നതുവരെ, പാകിസ്ഥാനുമായി ഒരു ബന്ധവും നിലനിർത്തരുത് എന്ന് ശിവസേന (യുബിടി) മേധാവി ഉദ്ധവ് താക്കറെ ശനിയാഴ്ച മുംബൈയിൽ നടത്തിയ പത്രസമ്മേളനത്തിൽ പറഞ്ഞു. ഓപ്പറേഷൻ സിന്ദൂർ നിർത്തിവച്ചതായി സർക്കാർ പ്രഖ്യാപിക്കുമോ എന്ന് ബിജെപിയെ ലക്ഷ്യം വച്ചുകൊണ്ട് അദ്ദേഹം ചോദിച്ചു, പഹൽഗാം ആക്രമണത്തിന്റെ മുറിവുകൾ കാരണമാക്കി മത്സരം കാണരുതെന്ന് താക്കറെ ദേശസ്നേഹികളോട് അഭ്യർത്ഥിച്ചു. ഈ ക്രിക്കറ്റ് മത്സരം ദേശീയ വികാരങ്ങളെ അപമാനിക്കുന്നതാണ്. നമ്മുടെ സൈനികർ അതിർത്തിയിൽ ജീവൻ ബലിയർപ്പിക്കുമ്പോൾ നമ്മൾ പാകിസ്ഥാനുമായി ക്രിക്കറ്റ് കളിക്കണോ?” താക്കറെ ചോദിച്ചു.
അതേസമയം, ഏക്‌നാഥ് ഷിൻഡെയുടെ നേതൃത്വത്തിലുള്ള ശിവസേന, മത്സരത്തെ എതിർക്കാൻ താക്കറെയ്ക്ക് ധാർമ്മിക അധികാരമില്ലെന്ന് വാദിച്ചുകൊണ്ട് അദ്ദേഹത്തിനെതിരെ തിരിച്ചടിച്ചു. അധികാരത്തിനു വേണ്ടി ഹിന്ദുത്വത്തെ ഉപേക്ഷിച്ച് പാകിസ്ഥാനെ സ്തുതിക്കുന്ന താക്കറെയ്ക്ക് പെട്ടെന്ന് ഇത്തരം മത്സരങ്ങളെ എതിർക്കാൻ കഴിയില്ല എന്ന് ഷിൻഡെ സേനയുടെ എംപിയും വക്താവുമായ നരേഷ് മസ്‌കെ പറഞ്ഞു.
ഡൽഹി മുൻ മന്ത്രിയും ആം ആദ്മി നേതാവുമായ സൗരഭ് ഭരദ്വാജും പാർട്ടി പ്രവർത്തകരും ചേർന്ന് ദേശീയ തലസ്ഥാനത്ത് പാകിസ്ഥാൻ കളിക്കാരുടെ പ്രതിമ കത്തിച്ചു.”പഹൽഗാം ആക്രമണത്തിൽ ഭർത്താക്കന്മാരെ നഷ്ടപ്പെട്ട നമ്മുടെ സ്ത്രീകൾക്ക് ഇത് വലിയ അപമാനമാണെന്നും നമ്മുടെ കേന്ദ്ര നേതൃത്വം ഇന്ത്യ-പാകിസ്ഥാൻ ക്രിക്കറ്റ് മത്സരവുമായി മുന്നോട്ട് പോകുന്നത് നല്ലതിനല്ലെന്നും ഭരദ്വാജ് മാധ്യമപ്രവർത്തകരോട് പറഞ്ഞു.
പഹൽഗാം ഭീകരാക്രമണത്തിൽ കൊല്ലപ്പെട്ട കാൺപൂർ വ്യവസായി ശുഭം ദ്വിവേദിയുടെ വിധവയായ ഐഷന്യ, മത്സരം ബഹിഷ്‌കരിക്കാൻ പൊതുജനങ്ങളോട് അഭ്യർത്ഥിച്ചു. ഇരകളുടെ കുടുംബങ്ങളുടെ വികാരങ്ങളെ ഇന്ത്യൻ ക്രിക്കറ്റ് കൺട്രോൾ ബോർഡ് (ബിസിസിഐ) അവഗണിച്ചുവെന്ന് ഐഷന്യ ആരോപിച്ചു. പാകിസ്ഥാനുമായി കളിക്കാനുള്ള തീരുമാനത്തെ കോൺഗ്രസ്, എൻസിപി (ശരദ് പവാർ വിഭാഗം), എഐഎംഐഎം നേതാക്കളും വിമർശിച്ചു.
രാജ്യത്ത് 140 കോടി ജനസംഖ്യയുണ്ട്. ഇത്രയും വിശാലമായ ഒരു രാജ്യത്ത് ക്രിക്കറ്റ് മത്സരത്തെക്കുറിച്ച് അഭിപ്രായ വ്യത്യാസങ്ങൾ ഉണ്ടാകാൻ സാധ്യതയുണ്ട് എന്നാണ് എൻ‌സി‌പിയുടെ തലവനായ മഹാരാഷ്ട്ര ഉപമുഖ്യമന്ത്രി അജിത് പവാർ അഭിപ്രായപ്പെട്ടത്. ഇരു രാജ്യങ്ങളും തമ്മിലുള്ള ബന്ധം വഷളായതിനാൽ ഒരു മത്സരവും ഉണ്ടാകരുതെന്ന് ചിലർക്ക് തോന്നിയേക്കാം. അതേസമയം, മറ്റുള്ളവർ ക്രിക്കറ്റിനെ പിന്തുണച്ചേക്കാം എന്നും പവാർ മാധ്യമപ്രവർത്തകരോട് പറഞ്ഞു.
