കൊച്ചി: ഈ വർഷത്തെ ഓണാഘോഷം ഭിന്നശേഷിക്കുട്ടികൾക്കൊപ്പം ആഘോഷമാക്കി കൊച്ചി ലുലുമാൾ ജീവനക്കാർ. ഓണപ്പാട്ടും ഓണക്കളികളും സദ്യയുമൊരുക്കിയാണ് കുരുന്നുകൾക്കായി ലുലുമാളിലെ ജീവനക്കാർ ഓണവിരുന്ന് ഒരുക്കിയത്. എല്ലാവർഷവും വേറിട്ട പരിപാടികളോടെയാണ് ലുലുവിലെ ഓണാഘോഷം അരങ്ങേറുന്നത്. സമഗ്ര ശിക്ഷാ അഭിയാന്റെ കീഴിലുള്ള എറണാകുളം ഗേൾസ് ഹൈസ്കൂളിലെ പ്രത്യേക പരിഗണനയിലുൾപ്പെടുന്ന 30ലധികം വരുന്ന ഭിന്നശേഷി കുട്ടികളും അവരുടെ രക്ഷിതാക്കളും ലുലുവിന്റെ ഓണാഘോഷത്തിന്റെ ഭാഗമായി. രാവിലെ മാളിലൊരുക്കിയ പൂക്കളമത്സരത്തോടെ ലുലുവിലെ ഓണാഘോഷത്തിനു തുടക്കം കുറിച്ചു. മത്സരത്തിൽ ലുലുവിലെ ജീവനക്കാർ പങ്കാളികളായി. പ്രശസ്ത സ്പോട്സ് കമന്റേറ്ററും, മാധ്യമപ്രവർത്തകനുമായ ഷൈജു ദാമോദരനും ഭാര്യ ആശാ ഷൈജുവും വിധികർത്താക്കളായിരുന്നു.
ലുലുവിലെ വിവിധ ഡിവിഷനുകൾ ചേർന്നൊരുക്കിയ മാവേലി വേഷവും ശ്രദ്ധേയേയമായി. 13 മാവേലികൾ മത്സരത്തിൽ പങ്കെടുത്തു. കുട്ടികൾക്കുള്ള ഓണ കിറ്റ് ഷൈജു ദാമോദരനും ലുലു ഇന്ത്യ ഡയറക്ടർ ഫഹാസ് അഷറഫും ചേർന്ന് കൈമാറി. പഴയിടം തിരുമേനിയുടെ സദ്യവട്ടത്തോടെയായിരുന്നു ഈ വർഷത്തെ ജീവനക്കാരുടെ ഓണാഘോഷം വിപുലമാക്കിയത്. ഓണാഘോഷപരിപാടികളിൽ ലുലു ഇന്ത്യ എച്ച്.ആർ ഹെഡ് അനൂപ് മജീദ്, ലുലു ഇന്ത്യ പ്രോജക്ട് ഡയറക്ടർ ബാബു വർഗീസ്, മീഡിയ ഹെഡ് എൻ.ബി സ്വരാജ്, കൊച്ചി ലുലു റീജണൽ മാനേജർ സുധീഷ് നായർ, ലുലു മാൾസ് ഇന്ത്യ ഡയറക്ടർ ഷിബു ഫിലിപ്പ്, കൊച്ചി ലുലുമാൾ ജനറൽ മാനേജർ വിഷ്ണു രഘുനാഥ് തുടങ്ങിയവർ പ്രസംഗിച്ചു.
