ക്ഷേമ പെന്‍ഷന്‍, നാള്‍വഴികള്‍

കേരളത്തില്‍ ക്ഷേമ പെന്‍ഷന്‍ രണ്ടായിരം രൂപയാക്കി ഉയര്‍ത്തിയിരിക്കുകയാണ്. 2021 ല്‍ അധികാരത്തിലെത്തിയ രണ്ടാം പിണറായി സര്‍ക്കാരിന്റെ സുപ്രധാന പ്രഖ്യാപനങ്ങളില്‍ ഒന്നായിരുന്നു ക്ഷേമ പെന്‍ഷന്‍ രണ്ടായിരത്തിലേക്ക് എത്തിക്കല്‍. സര്‍ക്കാരിന്റെ കാലാവധി പൂര്‍ത്തിയാകാന്‍ ആറ് മാസം കൂടി ശേഷിക്കെയാണ് അധികാരത്തിലെത്തിയപ്പോള്‍ നടത്തിയ സുപ്രധാന പ്രഖ്യാപനം സാധ്യമാക്കിയിരിക്കുന്നത്.

1980 ലാണ് ക്ഷേമ പെന്‍ഷന്‍ പദ്ധതി ആരംഭിക്കുന്നത്. ഇ.കെ.നായനാര്‍ നേതൃത്വം നല്‍കിയ ഇടതുപക്ഷ സര്‍ക്കാരാണ് പദ്ധതിക്കു തുടക്കമിട്ടത്. അന്ന് 45 രൂപ മാത്രമായിരുന്നു പെന്‍ഷന്‍ ആയി ലഭിച്ചിരുന്നത്. അതിനുശേഷം എത്തിയ യുഡിഎഫ് സര്‍ക്കാര്‍ ക്ഷേമ പെന്‍ഷനു വേണ്ടത്ര പ്രാധാന്യം നല്‍കിയില്ല. 1982-87 കാലയളവില്‍ ക്ഷേമ പെന്‍ഷന്‍ 45 ആയി തുടര്‍ന്നു. കെ.കരുണാകരന്‍ ആയിരുന്നു മുഖ്യമന്ത്രി.

പിന്നീട് 1987 ല്‍ അധികാരത്തിലെത്തിയ നായനാര്‍ സര്‍ക്കാര്‍ ആണ് 45 രൂപയായിരുന്ന ക്ഷേമ പെന്‍ഷന്‍ 15 രൂപ വര്‍ധിപ്പിച്ച് 60 രൂപയാക്കിയത്. 1991 മുതല്‍ 96 വരെ യുഡിഎഫാണ് കേരളം ഭരിച്ചത്. ഈ കാലയളവിലും ക്ഷേമ പെന്‍ഷന്‍ വര്‍ധനവ് നടപ്പിലാക്കിയില്ല. കരുണാകരനും എ.കെ.ആന്റണിയും മുഖ്യമന്ത്രിമാരായി. എന്നാല്‍ ക്ഷേമ പെന്‍ഷന്‍ 60 രൂപയായി തുടര്‍ന്നു. 1996-2001 കാലയളവില്‍ ഇ.കെ.നായനാര്‍ നേതൃത്വം നല്‍കിയ ഇടതുപക്ഷ സര്‍ക്കാര്‍ ക്ഷേമ പെന്‍ഷന്‍ 60 രൂപ വര്‍ധിപ്പിച്ച് 120 ആക്കി ഉയര്‍ത്തി. 2001-2006 കാലയളവില്‍ യുഡിഎഫ് സര്‍ക്കാര്‍ ഭരിച്ചെങ്കിലും പതിവ് പല്ലവി തുടര്‍ന്നു. എ.കെ.ആന്റണിയും ഉമ്മന്‍ചാണ്ടിയും ആയിരുന്നു ഈ കാലയളവില്‍ മുഖ്യമന്ത്രിമാര്‍.

2006 ല്‍ അധികാരത്തിലെത്തിയ വി.എസ്.അച്യുതാനന്ദന്‍ സര്‍ക്കാരാണ് 120 രൂപയായിരുന്ന ക്ഷേമ പെന്‍ഷന്‍ 380 രൂപ കൂട്ടി 500 ലേക്ക് എത്തിച്ചത്. മാത്രമല്ല മുന്‍ സര്‍ക്കാരിന്റെ കാലത്തെ കുടിശിക കൊടുത്തുതീര്‍ക്കുകയും ചെയ്തു. 2011-2016 കാലയളവില്‍ ഭരിച്ച ഉമ്മന്‍ചാണ്ടി സര്‍ക്കാരിന്റെ കാലത്താണ് ക്ഷേമ പെന്‍ഷന്‍ 600 രൂപയാക്കുന്നത്. നേരത്തെ ഉണ്ടായിരുന്നതില്‍ നിന്ന് 100 രൂപയുടെ വര്‍ധനവ് മാത്രം. ഉമ്മന്‍ചാണ്ടി സര്‍ക്കാരിന്റെ കാലത്ത് മാസങ്ങളോളം ക്ഷേമ പെന്‍ഷന്‍ കുടിശികയായി. ഈ കുടിശിക പിന്നീട് കൊടുത്തുതീര്‍ത്തത് 2016 ല്‍ അധികാരത്തിലെത്തിയ ഒന്നാം പിണറായി വിജയന്‍ സര്‍ക്കാരാണ്.

വാതില്‍പ്പടി പെന്‍ഷന്‍ പദ്ധതിയിലൂടെ ക്ഷേമ പെന്‍ഷനെ കൂടുതല്‍ ജനകീയമാക്കാനും ഒന്നാം പിണറായി സര്‍ക്കാരിനു സാധിച്ചു. 2021 ല്‍ ഒന്നാം പിണറായി സര്‍ക്കാരിന്റെ കാലാവധി കഴിയുമ്പോള്‍ ക്ഷേമ പെന്‍ഷന്‍ തുക 1600 ലേക്ക് എത്തിയിരുന്നു, അഞ്ച് വര്‍ഷം കൊണ്ട് ആയിരം രൂപയുടെ വര്‍ധനവ് നടപ്പിലാക്കി. ഒടുവില്‍ രണ്ടാം പിണറായി സര്‍ക്കാര്‍ വാഗ്ദാനം ചെയ്തതുപോലെ ഇപ്പോള്‍ ക്ഷേമ പെന്‍ഷന്‍ 2000 രൂപയിലേക്ക് എത്തിച്ചിരിക്കുന്നു. നവംബര്‍ മുതലാണ് ക്ഷേമ പെന്‍ഷന്‍ 2000 രൂപയായി ലഭിക്കുക.