ഡൽഹി: ട്രെയിനിലെ എസി കോച്ചുകളിൽ കാലങ്ങളായി ഉപയോഗിച്ചു വന്ന വെളുത്ത ബെഡ്ഷീറ്റ് മാറ്റാനൊരുങ്ങി റെയിൽവേ. ഇതിനായി രാജസ്ഥാനിലെ പരമ്പരാഗത കൈത്തറിയായ സാന്ഗനേരിയില് നിന്നുള്ള പ്രിന്റഡ് ബ്ലാങ്കറ്റ് കവറുകൾ റെയില്വേ യാത്രക്കാർക്കായി ഒരുക്കിക്കഴിഞ്ഞു. ദീര്ഘകാലം ഉപയോഗിക്കാവുന്ന എളുപ്പം കഴുകി ഉണക്കാവുന്ന കൈത്തറി പുതപ്പുകളാണ് തയ്യാറാക്കിയിരിക്കുന്നത്. മറ്റു കൈത്തറി ഉത്പന്നങ്ങളും ഉപയോഗിക്കാൻ റെയിൽവേക്ക് പദ്ധതിയുണ്ട്.
രാജസ്ഥാനിലെ പരമ്പരാഗത കൈത്തറിയാണ് സാൻഗനേരി. ഇന്ത്യയുടെ സമ്പന്നമായ കൈത്തറി പാരമ്പര്യത്തെ കൂടി രേഖപ്പെടുത്തുന്നവയാണ് പുതിയ പ്രിന്റഡ് ബ്ലാങ്കറ്റുകൾ. വിജയമെന്ന് കണ്ടാൽ കൂടുതൽ ട്രെയിനുകളിലേക്ക് വ്യാപിപ്പിക്കുമെന്നും റെയിൽവേ അധികൃതർ പറയുന്നു. ഓരോ സംസ്ഥാനങ്ങളിലും അതത് സംസ്ഥാനത്തെ കൈത്തറി ഉത്പന്നങ്ങള് ഉപയോഗിക്കാനും പദ്ധതിയുണ്ട്.
രാജസ്ഥാനിലെ ജയ്പൂരിനടുത്തുള്ള പ്രദേശമാണ് സാൻഗനേരി. മൃദുവായ പരുത്തി വസ്ത്രങ്ങളില് ഹാന്ഡ് ബ്ലോക്ക് ഉപയോഗിച്ച് പ്രിന്റ് ചെയ്തെടുക്കുന്നവയാണ് സാൻഗനേരി ബ്ലാങ്കറ്റുകൾ. ഓരോ വസ്ത്രങ്ങളിലും കലാകാരന്മാർ ഡിസൈനുകൾ നെയ്തെടുക്കുകയാണ് ചെയ്യുന്നത്. പ്രകൃതിയിലെ പുല്ലും പൂക്കളും ഇലകളുമെല്ലാം സാൻഗനേരിയുടെ ഡിസൈനുകളിൽ കാണാം.
ജയ്പൂരിലെ ഖാതിപുര റെയില്വേ സ്റ്റേഷനിലായിരുന്നു പദ്ധതിയുടെ ഉദ്ഘാടനം നടന്നത്. ജയ്പൂര്- അസര്വ സൂപ്പര്ഫാസ്റ്റ് എക്സ്പ്രസിൽ ആദ്യമായി ഈ ബ്ലാങ്കറ്റുകൾ യാത്രക്കാർക്ക് ഉപയോഗിക്കാനായി നൽകുകയും ചെയ്തു.
