കൊച്ചി: കുട്ടിയെ തിരുത്താനും സ്കൂളിലെ അച്ചടക്കത്തിനുമായുള്ള ചൂരൽ പ്രയോഗം കുറ്റകരമല്ലെന്ന് ഹൈക്കോടതി. വിദ്യാർത്ഥിയുടെ കാലിൽ ചൂരൽ കൊണ്ട് അടിച്ചതിന്റെ പേരിൽ അധ്യാപകനെതിരെ പൊലീസെടുത്ത കേസ് റദ്ദാക്കിയ ഉത്തരവിലാണ് ഹൈക്കോടതിയുടെ നിരീക്ഷണം. അഞ്ചാം ക്ലാസ് വിദ്യാർത്ഥികളുടെ കാലിൽ അടിച്ച കേസാണ് കോടതി റദ്ദാക്കിയത്.
പരസ്പരം തമ്മിൽതല്ലുകയും പരസ്പരം തുപ്പുകയും ചെയ്തതിനാണ് അധ്യാപകൻ മൂന്നു കുട്ടികളുടെ കാലിൽ അടിച്ചത്. കുട്ടികളെ പ്രശ്നത്തിൽ നിന്ന് പിന്തിരിപ്പിക്കാനാണ് താൻ ഇത്തരമൊരു കാര്യം ചെയ്തതെന്ന് അധ്യാപകൻ വാദിച്ചിരുന്നു. വാദം കേട്ട ശേഷം ശരിയായ ലക്ഷ്യത്തോടെ കുട്ടികളെ അധ്യാപകനൊന്ന് അടിച്ചാൽ തെറ്റില്ലെന്ന് കോടതി പറഞ്ഞു.
കുട്ടിയുടെ ചുമതല അധ്യാപകനെ ഏൽപ്പിക്കുമ്പോൾ അത്തരത്തിലുള്ള അധികാരവും രക്ഷിതാക്കൾ കൈമാറുന്നുവെന്ന് ജസ്റ്റിസ് സി.പ്രതീപ് കുമാർ അഭിപ്രായപ്പെട്ടു. രക്ഷിതാവിന്റെ പരാതിയിൽ 2019 ൽ വടക്കാഞ്ചേരി പൊലീസ് ആയിരുന്നു അധ്യാപകനെതിരെ കേസെടുത്തത്.
തുടർന്ന് കേസ് റദ്ദാക്കണമെന്നാവശ്യപ്പെട്ട് അധ്യാപകൻ ഹൈക്കോടതിയെ സമീപിക്കുകയായിരുന്നു.
കുട്ടികൾക്ക് ഗുരുതരമായ പരുക്കുകളൊന്നും ഉണ്ടായിട്ടില്ല. നല്ല പൗരന്മാരായി വളരാനുള്ള ശിക്ഷയായിട്ടെ അതിനെ കാണാനാകൂവെന്ന് കോടതി അഭിപ്രായപ്പെട്ടു. പാലക്കാട് അഡീഷണൽ സെഷൻസ് കോടതിയിലെ നടപടികളും ഹൈക്കോടതി റദ്ദാക്കി. അധ്യാപകന്റെ നല്ല ഉദ്ദേശത്തെ രക്ഷിതാക്കൾ തിരിച്ചറിഞ്ഞില്ലെന്നും കോടതി പറഞ്ഞു.
