2021 ല്‍ അധികാരത്തിലെത്തിയ രണ്ടാം പിണറായി സര്‍ക്കാരിന്റെ ആദ്യ മന്ത്രിസഭായോഗത്തിലാണ് ‘അതിദരിദ്രരില്ലാത്ത കേരളം’ എന്ന സ്വപ്‌നത്തിലേക്കുള്ള ആദ്യ ചുവടുവയ്പ്പ്. ആദ്യ മന്ത്രിസഭാ യോഗത്തിലെ ആദ്യ തീരുമാനമെന്ന നിലയിലാണ് സര്‍ക്കാര്‍ ഈ പദ്ധതിയെ മുന്നോട്ടുവെച്ചത്. 2026 ല്‍ സര്‍ക്കാരിന്റെ കാലാവധി പൂര്‍ത്തിയാകുന്നതിനു മുന്‍പ് ‘അതിദാരിദ്ര്യമുക്ത കേരളം’ എന്ന പ്രഖ്യാപനം നടത്തണമെന്നും സര്‍ക്കാര്‍ തീരുമാനിച്ചിരുന്നു.
തദ്ദേശ ഭരണകൂടങ്ങളുടെ സഹായത്തോടെയാണ് സര്‍ക്കാര്‍ ഇപ്പോള്‍ ‘അതിദരിദ്രരില്ലാത്ത കേരളം’ എന്ന സ്വപ്നം യാഥാര്‍ഥ്യമാക്കുന്നത്. നവംബര്‍ ഒന്നിന് വൈകിട്ട് അഞ്ചിനു തിരുവനന്തപുരം സെന്‍ട്രല്‍ സ്റ്റേഡിയത്തില്‍ നടക്കുന്ന വിപുലമായ പരിപാടിയില്‍ മുഖ്യമന്ത്രി പിണറായി വിജയന്‍ കേരളത്തെ അതിദാരിദ്ര്യ മുക്ത സംസ്ഥാനമായി പ്രഖ്യാപിക്കും. സംസ്ഥാനത്തെ എല്ലാ മന്ത്രിമാരും ചടങ്ങില്‍ പങ്കാളികളാവും. സിനിമ താരങ്ങളായ മമ്മൂട്ടിക്കും മോഹന്‍ലാലിനുമൊപ്പം തെന്നിന്ത്യന്‍ സൂപ്പര്‍താരവും രാജ്യസഭാ എംപിയുമായ കമല്‍ഹാസനും മുഖ്യാതിഥിയാകും.
64,006 കുടുംബങ്ങളിലായി 1,03,099 പേരെയാണ് അതിദരിദ്രരായി സര്‍വെയിലൂടെ കണ്ടെത്തിയത്. ഭക്ഷണം, ആരോഗ്യം, വാസസ്ഥലം, വരുമാനം എന്നിവയിലെ ഇല്ലായ്മയുടെ, അഥവാ കുറവിന്റെ തോത് അടിസ്ഥാനമാക്കിയാണ് അതിദരിദ്രരെ നിര്‍ണയിച്ചത്. ഇവയെ ക്ലേശ ഘടകങ്ങളായി കാണുന്നു. അതുകൊണ്ടുതന്നെ ആവശ്യമായവര്‍ക്ക് ഭക്ഷണവും ആരോഗ്യ സേവനങ്ങളും താമസവും തൊഴിലും ഉറപ്പുവരുത്തുന്നതിലാണ് ഊന്നല്‍ നല്‍കുന്നത് 2025 നവംബര്‍ 1 ന് കേരളത്തെ അതിദാരിദ്ര്യ വിമുക്തമായി പ്രഖ്യാപിക്കാനാണ് ലക്ഷ്യമിട്ടിരിക്കുന്നത്.
പദ്ധതിയുടെ ആദ്യഘട്ട പ്രവര്‍ത്തനങ്ങള്‍ 2023 നവംബര്‍ ഒന്നിനു പൂര്‍ത്തിയാക്കാന്‍ സര്‍ക്കാരിനു സാധിച്ചിരുന്നു. ആദ്യ ഘട്ടത്തില്‍ തന്നെ 47.89 ശതമാനം പേരെ അതിദാരിദ്ര്യത്തില്‍ നിന്ന് മുക്തരാക്കാന്‍ കഴിഞ്ഞു. രണ്ടാം ഘട്ടത്തില്‍ 2024 നവംബര്‍ ഒന്നിനു മുന്‍പ് 90 ശതമാനം പേരെ അതിദാരിദ്ര്യത്തില്‍ നിന്ന് മുക്തരാക്കുന്നതിനാണ് ലക്ഷ്യമിട്ടത്. അതില്‍ ചെറിയ കാലതാമസം വന്നെങ്കിലും 2025 നവംബര്‍ ഒന്നിനു പ്രഖ്യാപനം നടത്തുകയെന്ന ലക്ഷ്യം സര്‍ക്കാര്‍ നിറവേറ്റുകയാണ്.
അതിജീവനത്തിനു ആവശ്യമായ അടിസ്ഥാന സൗകര്യങ്ങള്‍ ഇല്ലാത്തവരെയാണ് അതിദരിദ്രരായി കണക്കാക്കുന്നത്. തദ്ദേശ സ്ഥാപനങ്ങള്‍ വഴി നടത്തിയ സര്‍വെയും തുടര്‍ന്നുള്ള പ്രവര്‍ത്തനങ്ങളും പൂര്‍ണമായി വിജയം കണ്ടെന്നാണ് സര്‍ക്കാരിന്റെ അവകാശവാദം.
