വാഷിങ്ടൺ: ചൈനീസ് ഇറക്കുമതികൾക്ക് നവംബർ 1 മുതൽ 155 ശതമാനം തീരുവ ചുമത്താനുള്ള പദ്ധതിയിൽ ഉറച്ച തീരുമാനവുമായി യുഎസ് പ്രസിഡൻറ് ഡൊണാൾഡ് ട്രംപ്. അതേസമയം, ചൈനയുമായി സൗഹൃദബന്ധം നിലനിർത്താനാണ് താൻ ആഗ്രഹിക്കുന്നതെന്നും അദ്ദേഹം വ്യക്തമാക്കി. റഷ്യയിൽ നിന്നുള്ള എണ്ണയുടെ ഏറ്റവും വലിയ ഇറക്കുമതിക്കാരനായ ചൈനയ്‌ക്കെതിരെ പുതുതായി തീരുവ ഏർപ്പെടുത്തുമോ എന്ന ചോദ്യത്തിന് മറുപടിയായാണ് ട്രംപിന്റെ ഈ പരാമർശം.
“നവംബർ 1 മുതൽ ചൈനീസ് ഇറക്കുമതികൾക്ക് ഏകദേശം 155 ശതമാനം തീരുവ ചുമത്തും. ഇത് അവർക്ക് സഹിക്കാൻ എളുപ്പമാകില്ലെന്ന് ഞാൻ കരുതുന്നു,” ട്രംപ് പറഞ്ഞു. ചൈനയോടൊപ്പം നല്ല ബന്ധം നിലനിർത്താനാണ് താൻ ആഗ്രഹിക്കുന്നതെങ്കിലും, യുഎസ് പതിറ്റാണ്ടുകളായി അന്യായമായ വ്യാപാരരീതികൾ സഹിച്ചുവെന്നും അത് അവസാനിപ്പിക്കാനുള്ള നടപടികൾ അനിവാര്യമാണെന്നും ട്രംപ് വ്യക്തമാക്കി.
“ഞാൻ ചൈനയോട് നല്ല രീതിയിൽ പെരുമാറാൻ ആഗ്രഹിക്കുന്നു. എന്നാൽ ബിസിനസ്സ് മനോഭാവമില്ലാത്ത മുൻ പ്രസിഡൻമാരുടെ കാലത്ത് ചൈന ഞങ്ങളെ വളരെയധികം ദുരുപയോഗം ചെയ്തു. അവർക്ക് അനുകൂലമായി നയങ്ങൾ നടപ്പാക്കാൻ യുഎസ് അനുവദിച്ചു,” അദ്ദേഹം ചൂണ്ടിക്കാട്ടി. യൂറോപ്യൻ യൂണിയൻ, ജപ്പാൻ, ദക്ഷിണ കൊറിയ തുടങ്ങിയ രാജ്യങ്ങളുമായുള്ള പുതിയ വ്യാപാര കരാറുകൾ യുഎസിന്റെ ദേശീയ താൽപ്പര്യം സംരക്ഷിക്കാനാണ് ലക്ഷ്യമിടുന്നത് എന്നും ട്രംപ് വ്യക്തമാക്കി.
“ഞാൻ യൂറോപ്യൻ യൂണിയനുമായി ഒരു കരാർ ഉണ്ടാക്കി. ഞാൻ ജപ്പാനുമായും ദക്ഷിണ കൊറിയയുമായും ഒരു കരാർ ഉണ്ടാക്കി. ഈ കരാറുകളിൽ പലതും മികച്ചതാണ്. ഇത് ദേശീയ സുരക്ഷയെക്കുറിച്ചാണ്. തീരുവകൾ ഉള്ളതുകൊണ്ടാണ് എനിക്ക് ഇത് ചെയ്യാൻ കഴിഞ്ഞത്. യുഎസിലേക്ക് നൂറുകണക്കിന് ബില്യൺ ഡോളറുകൾ, ട്രില്ല്യൺ ഡോളറുകൾ പോലും ഞങ്ങൾക്ക് ലഭിക്കുന്നു. ഞങ്ങൾ കടം തിരിച്ചടയ്ക്കാൻ തുടങ്ങും,” ട്രംപ് പറഞ്ഞു.
