പത്തനംതിട്ട: രാഷ്ട്രപതിയുടെ ശബരമല സന്ദർശനം ഇന്നോ ഇന്നലെയോ പെട്ടന്നെടുത്ത തീരുമാനമായിരുന്നില്ല. മികച്ച വിലയിരുത്തലുകൾ നടത്തി പ്രോട്ടോകോൾ മാനദണ്ഡലത്തിൽ പല തവണ പരിശോധനകൾ നടത്തിയിട്ടും പാളിച്ച പറ്റി. രാഷ്ട്രപതി ശബരിമല സന്ദർശനത്തിനായി നിലയ്ക്കലിൽ ഹെലികോപ്ടർ ഇറങ്ങുമെന്നാണ് പൊലീസിനും ഇന്റലിജൻസിനും മുൻകുട്ടി അറിയിച്ചത്. ഇതനുസരിച്ച് പൊലീസ് മേധാവിയുടെ മേൽനോട്ടത്തിൽ സുരക്ഷ മുന്നൊരുക്കങ്ങൾ ക‍ൃത്യമാക്കിയിരുന്നു. ഇന്നലെ ശക്തമായ മഴ പെയ്തതോടെയാണ് നിലയ്ക്കലിലെ ഹെലികോപ്ടർ ലാൻഡിങ്ങ് ഒഴിവാക്കി പകരം പ്രമാടത്തെ ഇൻഡോർ സ്റ്റേഡിയത്തിലേക്ക് മാറ്റിയത്. സുരക്ഷാ വീഴ്ചയില്ലെന്ന് പോലീസ് മേധാവി ആവർത്തിക്കുമ്പോഴും ഏകോപനത്തിലെ പാളിച്ചകളാണ് കല്ലുകടിയാകുന്നതും.
താഴ്ന്നത് വ്യോമസേനയുടെ ചോപ്പർ
രാഷ്ട്രപതി ദ്രൗപദി മുർമുവിന്റെ ഹെലികോപ്റ്ററിന്റെ ടയറുകൾ ഹെലിപാഡിലെ കോൺക്രീറ്റിൽ താഴ്ന്നതിന് പിന്നാലെയാണ് സംഭവം വിവാദമായത്. സാധാരണ കേരളത്തിലെ യാത്രകളിൽ മന്ത്രിമാർ ഉപയോഗിക്കുന്നത് വാടക ഹെലികോപ്റ്ററുകളാണ്. എന്നാൽ വ്യോമസേനയുടെ ചോപ്പർ ഹെലികോപ്ടർ പ്രമാടത്തെ ഇൻഡോർ സ്റ്റേഡിയത്തിൽ ലാൻഡ് ചെയ്യുമ്പോൾ തന്നെ താത്കാലികമായി പണിത സിമന്റ് ഹെലിപ്പാഡിൽ ഹെലികോപ്റ്ററിന്റെ ടയറുകൾ ഉറച്ചിരുന്നു. ആംഡ് പൊലീസിലെ ഉദ്യോഗസ്ഥരും അഗ്നിശമന സേനാംഗങ്ങളും ചേർന്നാണ് പിന്നീട് പണിപ്പെട്ടാണ് ഹെലികോപ്റ്റർ ഇവിടെ നിന്ന് ഉയർത്തിയത്.
യാതൊരു സുരക്ഷാവീഴ്ചയും ഉണ്ടായിട്ടില്ലെന്ന് സംസ്ഥാന പൊലീസ് മേധാവി റവാഡ ചന്ദ്രശേഖർ ആവർത്തിക്കുമ്പോഴും ഹെലികോപ്റ്റർ ലാൻഡ് ചെയ്തതിലെ സാങ്കേതിക പ്രശ്നമാണ് പൊലീസ് മേധാവി പറയുന്നതും. ഹെലിപാഡ് വളരെ വൈകിയാണ് തയാറാക്കിയത്. ലാൻഡ് ചെയ്യാൻ നേരത്തെ തന്നെ ക്രമീകരണമുണ്ടാക്കിയിരുന്നതായും അദ്ദേഹം പറഞ്ഞു. നിശ്ചയിച്ച സ്ഥലത്ത് നിന്ന് അഞ്ചടി മാറിയാണ് ഹെലികോപ്റ്റർ ലാൻഡ് ചെയ്യത്. ഇവിടം സെറ്റാകാത്ത കോൺക്രീററ്റായിരുന്നെന്നും പരിശോധനയിൽ വ്യക്തമായതായും പൊലീസ് മേധാവി പ്രതികരിച്ചു.
പരസ്പരം പഴിചാരി വകുപ്പുകൾ
പൊലീസിന്റെ ഭാഗത്ത് നിന്നുള്ള സുരക്ഷാ വീഴ്ച ഒരു തരത്തിലുമുണ്ടായിട്ടില്ലെന്ന് വാദിക്കുമ്പോൾ തന്നെ അഗ്നിശമന സേനയുടെ തലയിലിട്ട് തടിയൂരാനാണ് പൊതുമരാമത്ത് വകുപ്പിന്റെ ശ്രമം. അഗ്നിശമന സേന ചൂണ്ടിക്കാട്ടിയ ഇടത്താണ് ഹെലിപ്പാട് നിർമ്മിച്ചതെന്ന് പൊതുമരാമത്ത് വകുപ്പിന്റെ വിശദീകരണം. ചെളിയും പൊടിപടലങ്ങളും ലാൻഡിങ്ങിന് വെല്ലുവിളിയാകുമെന്ന് അറിയിച്ചതോടെയാണ് ഇവിടെ കോൺക്രീറ്റ് ചെയ്തത്. എന്നാൽ വായുസേനാ അംഗങ്ങളുടെ സാന്നിധ്യത്തിലും അവരുടെ നിർദേശവും തേടിയ ശേഷമാണ് കോൺക്രീറ്റ് ചെയ്തതെന്ന് പൊതുമരാമത്ത് വകുപ്പ്പറയുന്നതോടെ പ്രശ്നം എയർഫോഴ്സിന്റെ തലയിലായി. കോൺക്രീറ്റ് ചെയ്ത് 12 മണിക്കൂർ മുൻപ് നടത്തിയ ലാൻഡിങ്ങാണ് വിവാദമായതും.
