കോഴിക്കോട്: പാളയം മാർക്കറ്റ് കല്ലുത്താൻ കടവിലേക്ക് മാറ്റുന്നത് സംബന്ധിച്ച് വൻ സംഘർഷത്തിനിടയിൽ മുഖ്യമന്ത്രി പിണറായി വിജയൻ വേദിയിലെത്തി. നല്ലത് അംഗീകരിക്കാൻ ചിലർക്ക് പ്രയാസമുണ്ടെന്നും അതാണ് ഇവിടെ ഇപ്പോള്‍ കാണുന്നതെന്നും അതൊന്നും അംഗീകരിക്കേണ്ട കാര്യമില്ലെന്നും മുഖ്യമന്ത്രി പ്രസംഗത്തിൽ പറഞ്ഞു. എന്താണ് നല്ല കാര്യത്തെ അംഗീകരിക്കാത്തത്? എന്താണ് ഇതിനുപിന്നിലെ ചേതോവികാരം? നാടിന് ഗുണം ചെയ്യുന്ന കാര്യം അംഗീകരിക്കേണ്ടത് അല്ലേ? മത്സരം തെരഞ്ഞെടുപ്പിൽ മാത്രമാണ്. തെരഞ്ഞെടുപ്പ് കഴിഞ്ഞാൽ വികസനത്തെ പിന്തുണക്കണമെന്നും അദ്ദേഹം പറഞ്ഞു.
പാളയത്ത് വ്യാപാരികളും തൊഴിലാളികളും നടത്തിയ പ്രതിഷേധമാണ് വലിയ സംഘർഷത്തിലേക്ക് എത്തിയത്. പാളയത്ത് നിന്നും കല്ലുത്താൻ കടവിലേക്ക് മാറ്റിയ പുതിയ മാർക്കറ്റ് കെട്ടിടം ഇന്ന് മുഖ്യമന്ത്രി പിണറായി വിജയൻ ഉദ്ഘാടനം ചെയ്യാനിരിക്കെയാണ് പ്രതിഷേധം ഉണ്ടായത്. മാർക്കറ്റ് മാറ്റുന്നതിൽ എതിർക്കുന്നവരും അനുകൂലിക്കുന്നവരും തമ്മിലാണ് സംഘർഷമുണ്ടായത്.
കല്ലുത്താൻ കടവിലേക്ക് മാർക്കറ്റ് മാറ്റുന്നതിന് എതിരെ ഒരു വിഭാഗം വ്യാപാരികൾ പ്രതിഷേധിച്ചിരുന്നു. ഇതിനിടെയാണ് പുതിയ മാർക്കറ്റ് വരുന്നതിനെ അനുകൂലിക്കുന്നവർ പ്രകടനവുമായി എത്തിയത്. അനുകൂലികളെ പ്രതിഷേധാക്കാർ കൂകി വിളിച്ചതാണ് സംഘർഷത്തിലേക്ക് നയിച്ചത്. തുടർന്ന് പൊലീസ് ഇടപ്പെട്ടതോടെ ഉന്തും തള്ളുമുണ്ടാവുകയും സംഘർഷമുണ്ടാവുകയും ചെയ്തു. അതേസമയം സമരവുമായി മുന്നോട്ട് പോകുമെന്ന ഉറച്ച നിലപാടിലാണ് പ്രതിഷേധക്കാർ.
