ഇസ്ലാമാബാദ്:ബുധനാഴ്ചയും ഇരുപതിലേറെ പാക്-അഫ്ഗാൻ സൈനികർക്ക് ജീവൻ നഷ്ടമായ ഏറ്റുമുട്ടൽ താത്കാലികമായി അവസാനിച്ചു. 48 മണിക്കൂർ വെടിനിർത്തൽ പ്രഖ്യാപിച്ചിട്ടുണ്ട്. ഇന്ത്യൻ സമയം 6.30 നാണ് വെടി നിർത്തൽ പ്രാബല്യത്തിൽ വന്നത്.
ക്രിയാത്മകമായ പരിഹാരം കണ്ടെത്താന്‍ ഇരുപക്ഷവും ചര്‍ച്ചയിലൂടെ ശ്രമിക്കുമെന്ന് പാക്കിസ്ഥാൻ പറഞ്ഞതായി റോയിറ്റേഴ്‌സ് റിപ്പോര്‍ട്ട് ചെയ്തു. അഫ്ഗാനിസ്താന്‍ വെടിനിര്‍ത്തല്‍ ആവശ്യപ്പെട്ടതായി പാക് അധികൃതർ പറയുന്നു. അഫ്ഗാന്‍ – പാക് അതിര്‍ത്തിയായ ഡ്യൂറന്‍ഡ് ലൈനിനോടു ചേര്‍ന്നുള്ള പാക് ജില്ലയായ ചമന്‍, അഫ്ഗാന്‍ ജില്ലയായ സ്പിന്‍ ബോള്‍ദക് എന്നിവിടങ്ങളിലായിരുന്നു പ്രധാനമായും ഏറ്റുമുട്ടൽ നടന്നത്.
അഫ്ഗാനിസ്താനിലെ താലിബാനും തെഹ്‌രീകെ താലിബാന്‍ പാകിസ്താന്(ടിടിപി) എന്ന പാക്കിസ്ഥാനിലെ താലീബാൻ അനുകൂല സംഘടനയുമാണ് അതിർത്തിയിൽ പ്രകോപനമില്ലാതെ ആക്രമണം ആരംഭിച്ചതെന്നാണ് പാക്കിസ്ഥാൻ സൈന്യം പറയുന്നത്. തുടർന്ന് ഭീകര താവളങ്ങളും അഫ്ഗാന്റെ സൈനികപോസ്റ്റുകളും തകർത്തതായും അവർ അവകാശപ്പെട്ടിരുന്നു. ഏകദേശം 200-ഓളം അഫ്ഗാന്‍ സൈനികരെ വധിച്ചതായി പാക് സൈന്യം പറയുന്നത്.
അതേസമയം അഫ്ഗാനിസ്ഥാന് സ്വന്തം അതിർത്തി സംരക്ഷിക്കേണ്ടതുണ്ടെന്നും അതിനാൽ ഒരാക്രമണത്തിനും മറുപടിയില്ലാതെ പോകില്ലെന്നുമായിരുന്നു താലീബാൻ വക്താവ് സബീഹുള്ള മുജാഹിദ് പറഞ്ഞത്. പാക്കിസ്ഥാൻ അവരുടെ രാജ്യത്തെ ഐഎസ് ഭീകരർക്കെതിരെ കണ്ണടയ്ക്കുകയാണെന്നും ഐഎസ് അംഗങ്ങളെ പുറത്താക്കാനോ അഫ്ഗാൻ ഭരണകൂടത്തിന് കൈമാറാനോ തയ്യാറാകണമെന്നും സബീഹുള്ള മുജാഹിദ് പറഞ്ഞിരുന്നു.
ഐഎസ് ഭീകരരെ താലീബാൻ നേരത്തേ തന്നെ അഫ്ഗാനിസ്താനിൽ നിന്ന് പുറത്താക്കിയെന്നും എന്നാൽ അവർ പഷ്തൂൺഖ്വാ മേഖലയിൽ കേന്ദ്രീകരിച്ചതായും താലീബാൻ വക്താവ് പറഞ്ഞിരുന്നു. പാക്കിസ്ഥാനിലെ കറാച്ചി, ഇസ്ലാമാബാദ് വീമാനത്താവളം വഴി ഈ കേന്ദ്രത്തിലേക്ക് ആളുകൾ പരിശീലനത്തിനായി എത്തുന്നതായും ഇവർ ആരോപിക്കുന്നു. അഫ്ഗാനിസ്താനിൽ നടക്കുന്ന ആക്രമണങ്ങൾ ഇവിടെയാണ് ആസൂത്രണം ചെയ്യുന്നത്. ഖത്തറും സൗദി അറേബ്യയും അഭ്യര്‍ഥിച്ചതിനാലാണ് പാകിസ്താന് നേരേയുള്ള വ്യോമാക്രമണം തങ്ങള്‍ നിര്‍ത്തിയതെന്നും സബീഹുള്ള മുജാഹിദ് നേരത്തേ വ്യക്തമാക്കിയിരുന്നു.
