ഗുരുവായൂർ: ആനക്കോട്ടയിലെ കൊമ്പന്‍ ഗോകുലിന് അണുബാധയേറ്റാണ് മരണമെന്ന് പോസ്റ്റ് മോർട്ടം റിപ്പോര്‍ട്ട്. മറ്റൊരാനയുടെ കുത്തേറ്റ് പരുക്കേറ്റ ഗുരുവായൂർ കൊമ്പന്റെ അന്ത്യം സംഭവിച്ചത് ശ്വാസകോശ അണുബാധ മൂര്‍ച്ഛിച്ചതുമൂലമെന്നാണ് പോസ്റ്റ് മോർട്ടം റിപ്പോര്‍ട്ട്. ഫോറസ്റ്റ് വെറ്റിനറി സർജൻ നൽകിയ പ്രാഥമിക റിപ്പോർട്ടിലാണ് വിവരങ്ങളുള്ളത്. കുത്തേറ്റ് കിടപ്പിലായ ഗോകുലിന് മർദ്ദനമേറ്റിരുന്നു. എന്നാൽ ഇത് മരണകാരണമല്ലെന്ന് ദേവസ്വം അഡ്മിനിസ്ട്രേറ്റർ പറഞ്ഞു.
കൊയിലാണ്ടി മണക്കുളങ്ങര ക്ഷേത്രോത്സവത്തിനിടയിൽ മറ്റൊരു ആനയുടെ കുത്തേറ്റ് ഗോകുലിന് ആഴത്തില്‍ മുറിവേറ്റിരുന്നു. ഫെബ്രുവരിയിലാണ് ഗോകുലിനു ഗുരുവായൂര്‍ ദേവസ്വത്തിലെത്തന്നെ പീതാംബരന്‍ എന്ന ആനയുടെ കുത്തേറ്റത്. ആനയിടഞ്ഞ് മൂന്നുപേര്‍ കൊല്ലപ്പെടുകയും ചെയ്തിരുന്നു.
സംഭവത്തിനിടെ കുത്തേറ്റ ഗോകുലിന് ആന്തരികാവയവങ്ങള്‍ക്ക് ക്ഷതം ഉണ്ടായിട്ടുണ്ട്. കുത്തേറ്റ മുറിവിൽ പഴുപ്പുണ്ടായി. ആ മുറിവ് വലിയൊരു ദ്വാരം പോലെയായിരുന്നു. മുറിവുണങ്ങിയെങ്കിലും ശ്വാസകോശത്തിന് മാരകമായ അണു ബാധയുമുണ്ടായി. കരൾ രോഗവുമുണ്ടായി. റിപ്പോർട്ടിൽ പറയുന്നു.
ഗോകുലിന്റെ തിരിച്ചുവരവ് പ്രതീക്ഷിച്ചിരിക്കെ പാപ്പാൻമാരിൽനിന്നും മർദ്ദനമേറ്റിരുന്നു. സെപ്റ്റംബര്‍ ഒന്‍പതിന് രാത്രി പത്തിനായിരുന്നു സംഭവം. ഡ്യൂട്ടിയിലുള്ള സുരക്ഷാ ഉദ്യോഗസ്ഥന്‍ മർദ്ദന വിവരം ആനക്കോട്ടയിലെ മേലുദ്യോഗസ്ഥരെ അറിയിച്ചിരുന്നു. പാപ്പാന്‍ ജി.ഗോകുല്‍, മൂന്നാം പാപ്പാന്‍ കെ.എ. സത്യന്‍ എന്നിവരെ ദേവസ്വം അഡ്മിനിസ്ട്രേറ്റര്‍ ഒ.ബി. അരുണ്‍കുമാര്‍ അന്വേഷണ വിധേയമായി സസ്പെന്‍ഡ് ചെയ്തു. എന്നാൽ ഈ മർദ്ദനം മരണത്തിന് കാരണമല്ലെന്ന് അഡ്മിനിസ്ട്രേറ്റര്‍ പറയുന്നു.
