തിരുവനന്തപുരം: എം ആർ അജിത് കുമാറിന് ബിവറേജസ് കോർപറേഷൻ ചെയർമാൻ സ്ഥാനം. എക്സൈസ് കമ്മിഷണർ ചുമതലയ്ക്ക് പുറമേയാണ് സർക്കാർ ബെവ്കോയുടെ ചെയർമാൻ സ്ഥാനം നൽകിയത്. ഹർഷിത അട്ടല്ലൂരിയായിരുന്നു ബെവ്കോയുടെ ചെയർമാന്റെയും മാനേജിങ് ഡയറക്ടറുടെയും ചുമതല വഹിച്ചിരുന്നത്. സർക്കാരിന്റെ പുതിയ ഉത്തരവ് പ്രകാരം എക്സൈസ് കമ്മിഷണറായ അജിത് കുമാറിനെ ചെയർമാൻ സ്ഥാനത്തേക്ക് നിയമിക്കുകയായിരുന്നു. ഹർഷിത അട്ടല്ലൂരി എംഡിയായി തുടരും എന്നാണ് ലഭിക്കുന്ന വിവരം.
2021 വരെ എക്സൈസ് കമ്മിഷണർ തന്നെയാണ് ബെവ്കോയുടെ ചെയർമാൻ സ്ഥാനവും വഹിച്ചിരുന്നത്. അതിന് ശേഷം യോഗേഷ് ഗുപ്ത ബെവ്കോയും തലപ്പത്തേക്ക് എത്തിയപ്പോൾ അദ്ദേഹത്തിന്റെ സീനിയോറിറ്റി പരിഗണിച്ച് സിഎംഡിയായാണ് നിയമിച്ചത്. പിന്നീട് വന്നവരും സിഎംഡിയായാണ് ചുമതല നിർവഹിച്ചിരുന്നത്.
