ഗാസ: ഇസ്രായേൽ ഗാസ യുദ്ധം അവസാനിപ്പിക്കാൻ ലക്ഷ്യമിട്ട് അമേരിക്കൻ പ്രസിഡന്റ് ഡോണൾഡ് ട്രംപിന്റെ ഇരുപതിന സമാധാന പദ്ധതിയിലെ നിർദ്ദേശങ്ങൾ മുൻനിർത്തി കെയ്‌റോയിൽ നടക്കുന്ന ചർച്ചയിൽ ഉപാധികൾവെച്ച് മുന്നോട്ടുവെച്ച് ഹമാസ്. ചർച്ചയിൽ ആറ് ഉപാധികളാണ് ഹമാസ് മുന്നോട്ടുവെച്ചിട്ടുള്ളത്. ഇതിൽ പ്രധാന ഉപാധി ഇസ്രയേൽ സൈന്യം പൂർണമായും യുദ്ധത്തിൽ നിന്ന് പിന്മാറണം എന്നതാണ്. ഗാസയിൽ സ്ഥിരമായ വെടിനിർത്തൽ വേണമെന്ന ആവശ്യവും ഹമാസ് മുന്നോട്ടുവെച്ചു.
ഗാസയുടെ പുനർനിർമ്മാണം, നിയന്ത്രണങ്ങളില്ലാതെ സഹായം അനുവദിക്കണം, ഗാസയിലേക്ക് തിരിച്ചെത്താൻ ജനങ്ങളെ അനുവദിക്കണം, കൃത്യമായ കരാറിന്റെ അടിസ്ഥാനത്തിലായിരിക്കണം തടവുകാരുടെ കൈമാറ്റം തുടങ്ങിയവയാണ് ഹമാസ് മുന്നോട്ടുവെച്ച മറ്റ് ഉപാധികൾ. ഹമാസ് വക്താവ് ഫൗസി ബർഹൂമാണ് ഈ ആ ഉപാധികൾ മുന്നോട്ടുവെച്ചത്. മുൻപ് പല തവണയായി സമാധാന ചർച്ചകളെ ടുതർന്ന് വെടിനിർത്തൽ തീരുമാനമെടുക്കാൻ തുനിഞ്ഞെങ്കിലും നെതന്യാഹുവിന്റെ അട്ടിമറികളാണ് അതിൽ നിന്ന് പിന്നോട്ട് വലിച്ചത് എന്ന് ഹമാസ് പറയുന്നു. ഇത്തവണയും അതിന് സാധ്യതയുണ്ടെന്നും അതിനാൽ ഐക്യരാഷ്ട്രസഭയും അമേരിക്കയും മറ്റ് മധ്യസ്ഥ രാജ്യങ്ങളും ഇടപെട്ട് അട്ടിമറി നീക്കത്തിൽ നിന്ന് നെതന്യാഹുവിനെ തടയണമെന്നും ഹമാസ് ആവശ്യപ്പെട്ടു. ഇസ്രായേൽ ഗാസയിൽ നടത്തുന്ന വംശഹത്യ രണ്ട് വർഷം പിന്നിടുകയാണ്. ഇതിനിടെയാണ് യുദ്ധം അവസാനിപ്പിക്കാൻ ലക്ഷ്യമിട്ട് കെയ്‌റോയിൽ നിർണായക ചർച്ചകൾ പുരോഗമിക്കുന്നത്.
സെപ്റ്റംബർ 29ന് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായി ട്രംപ് നടത്തിയ കൂടിക്കാഴ്ചയിലായിരുന്നു ഗാസ യുദ്ധത്തിൽ ഇരുപതിന സമാധാന പദ്ധതി മുന്നോട്ടുവെച്ചത്. ഹമാസ് ബന്ദികളാക്കിയ ഇസ്രായേലികളെ മോചിപ്പിക്കണം, ഗാസയിൽ ഹമാസ് അധികാരം ഒഴിയുകയും നിരായുധീകരണം ചെയ്യണം എന്നുമാണ് പ്രധാന ഉപാധികൾ ഇതിന് പകരം ഇസ്രായേൽ തടവിലുള്ള പലസ്തീനികളെ വിട്ടയക്കും എന്നും പദ്ധതിയിൽ പറഞ്ഞിരുന്നു. പദ്ധതി ഹമാസ് ഭാഗികമായി അംഗീകരിക്കുകയും മറ്റ് ഉപാധികളുടെ മേൽ ചർച്ചകൾ വേണമെന്ന് വ്യക്തമാക്കുകയും ചെയ്തിരുന്നു.
