തിരുവനന്തപുരം: ശബരിമല സ്വർണ്ണപ്പാളി മോഷണ വിവാദത്തിൽ പ്രതികരിച്ച് ദേവസ്വം ബോർഡ് മുൻ പ്രസിഡന്റ് എൻ വാസു. ഉണ്ണികൃഷ്ണൻ പോറ്റിയുമായി നേരിട്ട് ബന്ധമില്ലെന്നും പോറ്റി ഒരു കാര്യത്തിനും തന്നെ സമീപിച്ചിട്ടില്ല എന്നുമാണ് അദ്ദേഹം പ്രതികരിച്ചത്. സ്വർണപാളി, ദ്വാരപാലക ശിൽപങ്ങൾ എന്നിവ നവീകരണത്തിനായി നൽകുന്ന സമയത്ത് താൻ അവിടെ കമ്മീഷണറുടെയോ പ്രസിഡൻ്റിന്റെയോ സ്ഥാനം വഹിച്ചിരുന്നില്ല എന്നും താൻ പ്രസിഡന്റ് ആകുന്നതിന് മുൻപ് തന്നെ വാതിൽ മാറ്റാനുള്ള തീരുമാനമെടുത്തിരുന്നു എന്നും എൻ വാസു വ്യക്തമാക്കി.
ചെമ്പ് പാളിയാണ് നൽകിയത് എന്ന ഉണ്ണികൃഷ്ണൻ പോറ്റിയുടെ വാദത്തിൽ താനല്ല വിശദീകരണം നൽകേണ്ടതെന്നും പാളികൾ കൊണ്ടുപോകുമ്പോൾ താൻ അധികാരത്തിൽ ഉണ്ടായിരുന്നില്ല എന്നും അദ്ദേഹം പറഞ്ഞു. ക്രമക്കേടുകളെ കുറിച്ച് തനിക്ക് അറിവില്ലെന്നും സ്വർണം ചെമ്പായ വിഷയം അന്വേഷണത്തിലൂടെ പുറത്തുവരട്ടെയെന്നും വാസു പറഞ്ഞു. തൂക്കത്തിൽ വന്ന കുറവ് തൻറെ ശ്രദ്ധയിൽ ആരും കൊണ്ടുവന്നില്ല, അന്ന് ഒരു ആക്ഷേപവും ഉണ്ടാകാത്തതിനാൽ അന്വേഷിക്കേണ്ടി വന്നില്ലെന്നും അദ്ദേഹം കൂട്ടിചേർത്തു.
പോറ്റിയുടെ ഇ മെയിൽ ലഭിച്ചിരുന്നുവെന്നും ദേവസ്വം ബോർഡ് മുൻ പ്രസിഡന്റ് സ്ഥിരീകരിച്ചു. ”ആ ഇമെയിൽ തിരുവാഭരണം കമ്മീഷണർക്ക് കൈമാറി. കമ്മീഷണർക്ക് ഇമെയിൽ കൈമാറിയത് സ്വാഭാവിക നടപടിയാണ്. തിരുവാഭരണം കമ്മീഷണർ നടപടിയെടുത്തിട്ടില്ല. എന്റെ നടപടിയിൽ ഒരു പിശകും കാണുന്നില്ല” വാസു പ്രതികരിച്ചു. പരിശോധന നടത്തേണ്ട ഉത്തരവാദിത്തം തിരുവാഭരണം കമ്മീഷണർക്കാണെന്നും ഉദ്യോഗസ്ഥൻറെ റിപ്പോർട്ട് കിട്ടാതെ ഒന്നും ചെയ്യൻ കഴിയില്ലെന്നും അദ്ദേഹം വ്യക്തമാക്കി.
