കീവ്: ഉക്രെയ്‌നിന്റെ വടക്കൻ സുമി മേഖലയിലെ റെയിൽവേ സ്റ്റേഷനിൽ റഷ്യ നടത്തിയ വ്യോമാക്രമണത്തിൽ 30 പേർ കൊല്ലപ്പെട്ടു. ആക്രമണം തീവ്രവാദ പ്രവർത്തനമാണെന്ന് പ്രസിഡന്റ് വോളോഡിമർ സെലെൻസ്‌കി പ്രസ്താവിച്ചു.
തകർന്ന ഒരു ട്രെയിൻ ബോഗി തീപിടുത്തത്തിൽ കത്തുന്നത് ഉൾപ്പെടെ കാണിക്കുന്ന ഒരു വീഡിയോ സെലെൻസ്‌കി എക്‌സിൽ പോസ്റ്റ് ചെയ്തു. സുമി മേഖലയിലെ ഷോസ്റ്റ്കയിലെ റെയിൽവേ സ്റ്റേഷനിൽ നടന്ന ക്രൂരമായ റഷ്യൻ ഡ്രോൺ ആക്രമണത്തിൽ എല്ലാ അടിയന്തര സേവനങ്ങളും എത്തിച്ചെന്നും പരിക്കേറ്റവരെക്കുറിച്ചുള്ള എല്ലാ വിവരങ്ങളും ശേഖരിച്ചു വരികയാണെന്നും റീജിയണൽ ഗവർണർ ഒലെ ഹ്രിഹോറോവ് പറഞ്ഞതായി റോയിട്ടേഴ്‌സ് റിപ്പോർട്ട് ചെയ്തു.
റഷ്യയുമായുള്ള സമാധാന ചർച്ചകൾ സ്തംഭിച്ചതിൽ നിരാശനായ സെലെൻസ്‌കി, റഷ്യയ്‌ക്കെതിരെ ശക്തമായ നടപടിയെടുക്കണമെന്ന് ആവശ്യപ്പെട്ടു. ലോകം അവഗണിക്കാൻ പാടില്ലാത്ത ഭീകരതയാണിത്. എല്ലാ ദിവസവും റഷ്യ ആളുകളുടെ ജീവൻ അപഹരിക്കുന്നു. എല്ലാവരും യുദ്ധത്തിനെതിരെ ഒന്നിക്കണം, വാമൊഴിയായി പറഞ്ഞാൽ മാത്രം പോരാ. ശക്തമായ നടപടി ആവശ്യമാണ്, സെലെൻസ്‌കി കൂട്ടിച്ചേർത്തു.
